ગુજરાતની સૌથી મોટી નગરપાલિકાના બણકા ફૂગતી નવસારી વિજલપોર નગરપાલિકાએ વિકાસના નામે આટો વાઢ્યો હોય તેવી સ્થિતિનું નિર્માણ થયું છે. નવસારી અને વિજલપોર એમ બે અલગ અલગ પાલિકાનું એકત્રીકરણ થયા બાદ વસ્તીમાં વધારો થતા ગટર વ્યવસ્થામાં પણ નવો સુધારો કરવાની તાતી જરૂરિયાત ઊભી થઈ હતી.
કબીરપોર જીઆઇડીસી વિસ્તારમાં મિલો આવેલી છે અને આ મિલોને કારણે ગંદા પાણી છોડવામાં આવી રહ્યા હોવાથી આસપાસના સ્થાનિકો મુશ્કેલીમાં મુકાયા છે. કારણ કે આ કુદરતી કાંસમાંથી સીધું પાણી નદી નાળામાં ઠલવાતું હોય છે. જેને કારણે નદી પ્રદૂષિત થઈ રહી છે. પાલિકા દ્વારા હજી સુધી ગટર વ્યવસ્થાના અપગ્રેડેશન માટેની કામગીરી નહીં કરાતા સ્થાનિકોમાં રોષ છે.
નવસારી વિજલપોર નગરપાલિકાનું એકત્રીકરણ થયાને અઢી વર્ષ જેટલો સમય વીતી ગયો. છતાં ગાયકવાડી સમયની ગટર વ્યવસ્થામાં કોઈ સુધારો ન થયો હોવાના આક્ષેપ થઈ રહ્યા છે. નવા આઠ ગામોને પાલિકા વિસ્તારમાં જોડવામાં આવ્યા ત્યાર બાદ હજી સુધી પાલીકા ગટર વ્યવસ્થા માટે પ્લાન ગડી રહી હોવાના વાયદાઓ આપી રહી છે.. જોકે નક્કર કામગીરી થાય તેને માટે પણ લોકો રાહ જોઈને બેઠા છે.
ગટરની ગંદકી એ સ્થાનિકોના આરોગ્ય સામે સવાલો ઉભા કરી રહી છે. મિલોની ગંદકી કુદરતી કાસમાં છોડાતા સમગ્ર શહેરના વિસ્તારોમાં આ ગંદકી ફેલાઈ રહી છે. વહેલી તકે પાલિકા આ અંગે કાર્યવાહી કરે તે શહેરીજનોની અને હાલના સમયની તાતી જરૂરિયાત છે.
ગુજરાતના તમામ સમાચાર અને બ્રેકિંગ ન્યૂઝ ગુજરાતીમાં વાંચો tv9gujarati.com પર
ગુજરાત ના તમામ જિલ્લાના સમાચાર વાંચવા માટે જોડાયેલા રહો…