જીંદગી અને મોત વચ્ચે ખાલી ગણતરીની સેકન્ડ અને મહિલા પોલીસે દેવદૂત બનીને મહિલાનો બચાવ્યો જીવ, જુઓ ધ્રુજાવી દેતો વીડિયો

ભરૂચ રેલવે સ્ટેશને ચાલુ ટ્રેનમાંથી ઉતરવાના પ્રયાસ દરમિયાન મોતના મુખ તરફ ધકેલાઈ ગયેલી એક મહિલા માટે રેલવે પ્રોટેક્શન ફોર્સની એક મહિલા કોન્સ્ટેબલ દેવદૂતના સ્વરૂપમાં અવતરી હતી. ટ્રેનમાંથી ઉતરતી મહિલા કચડાઈ જાય તે પહેલા તેને સલામત પ્લેટફોર્મ તરફ ખેંચી લઈ તેનો જીવ બચાવ્યો હતો. આ સમગ્ર ઘટના સીસીટીવી કેમેરામાં કેદ થઇ છે.

આ ઘટના ભરૂચ રેલ્વે સ્ટેશન ખાતે બની હતી. ઘટના અંગે માહિતી આપતા વડોદરા ડિવિઝનના વિભાગીય સુરક્ષા કમિશનર રામશંકર સિંઘે જણાવ્યું કે,ભરૂચ RPF વિભાગમાં મહિલા કોન્સ્ટેબલ તરીકે રોશની સિંઘ ભરૂચ રેલવે સ્ટેશને ફરજ પર હતા ત્યારે પ્લેટફોર્મ ડ્યુટી દરમિયાન એક મહિલાનો જીવ જોખમમાં જણાયો હતો. ગુજરાત એક્સપ્રેસ ટ્રેનમાંથી એક મહિલા ચાલુ ટ્રેનમાંથી ઉતરતી લપસી પડી હતી.આ સમયે રોશની સિંઘ નજીક હતા જેમણે મહિલાને બહારની તરફ ખેંચી તેનો જીવ બચાવ્યો હતો.મહિલા પોલીસકર્મીની બહાદુરીની જાણ વડોદરા ડિવિઝનલ રેલ્વે મેનેજર જિતેન્દ્ર સિંઘને થતા તેઓએ રોશની સિંઘને પુરસ્કાર આપવાની પણ જાહેરાત કરી હતી.