Viral Video: પક્ષી પ્રેમની અનોખી મિસાલ: ગુમ થયેલા પોપટ ‘માઉ’ને શોધી લાવનારને મળશે ₹50 હજારનું ઇનામ

આગ્રામાં પક્ષી પ્રેમનો એક અનોખો કિસ્સો સામે આવ્યો છે. અહીં આવાસ વિકાસ કાન્હા રેસિડેન્સના નિવાસી એડવોકેટ સુનીલ કુમાર પોતાના પાલતુ માદા પોપટ ‘માઉ’ ગુમ થયા બાદ તેની શોધમાં સતત લાગેલા છે. આ સાથે જ તેમણે જાહેરાત કરી છે કે જે પણ વ્યક્તિ માઉને સુરક્ષિત શોધીને પાછો લાવશે અથવા તેના વિશે સચોટ માહિતી આપશે, તેને 50 હજાર રૂપિયાનું ઇનામ આપવામાં આવશે.

તેમણે જણાવ્યું કે માર્ચ 2025માં માનસિક સ્વાસ્થ્ય સંસ્થાન પાસે તેમને એક ઇજાગ્રસ્ત પોપટનું બચ્ચું મળ્યું હતું, જે ઊડવામાં અસમર્થ હતું. તેમણે તેની સારવાર કરાવી અને તેને એડોપ્ટ કરી લીધું. આ પછી માઉ પરિવારનો જ સભ્ય બની ગયો. તે ક્યારેય પાંજરામાં રહ્યો નથી અને પરિવાર જ્યાં પણ જતો હતો, માઉ પણ તેમની સાથે જ રહેતો હતો. મંદિર જવાથી લઈને ઘરના દરેક કામ સુધી તે પરિવાર સાથે જ રહેતો હતો. એડવોકેટ સુનીલ કુમારે જણાવ્યું છે કે તેમણે માર્ચ મહિનામાં એક રેસ્ટોરન્ટમાં માઉનો જન્મદિવસ પણ ખૂબ જ ધામધૂમથી ઉજવ્યો હતો.

માઉ ગુમ થતાં આખો પરિવાર આઘાતમાં

13 જુલાઈથી માઉ ગુમ થયા પછી આખો પરિવાર ઊંડા આઘાતમાં છે. એડવોકેટ સુનીલ કુમારનું કહેવું છે કે માઉના ઘર બહાર ગયા પછી ઘરમાં ખાવા-પીવાનું પણ બંધ થઈ ગયું છે. પરિવારના તમામ સભ્યો તેની સુરક્ષિત વાપસી માટે ભગવાનને પ્રાર્થના કરી રહ્યા છે. તેની શોધ માટે પક્ષીઓને અવાજથી આકર્ષિત કરતી એક ટીમને પણ કામ પર લગાડવામાં આવી છે. પરિવારનું કહેવું છે કે માઉને પાછો લાવવા માટે શક્ય તમામ પ્રયાસો કરવામાં આવી રહ્યા છે અને તેમને આશા છે કે તે ટૂંક સમયમાં પોતાના ઘરે પરત ફરશે.

સૃષ્ટિ સાથે ખાતી-પીતી હતી માઉ

માઉ પરિવારની દીકરી સૃષ્ટિની સૌથી વધુ નજીક હતી. સૃષ્ટિએ જણાવ્યું કે માઉ તેની સાથે જ ખાતી, પીતી અને ઊંઘતી હતી. જ્યારે તેને ભૂખ લાગતી ત્યારે તેને પૂછવામાં આવતું કે ખાવામાં શું જોઈએ છે અને તે પોતાની પસંદગી પણ બતાવી દેતી હતી. સૃષ્ટિના જણાવ્યા અનુસાર, માઉને પમ્પકિન સીડ્સ (કોળાના બીજ) સૌથી વધુ પસંદ હતા. પરિવારનું કહેવું છે કે માઉ તેમના માટે માત્ર એક પાલતુ પક્ષી નથી, પરંતુ ઘરનો સભ્ય છે અને તેના વગર આખો પરિવાર પોતાને અધૂરો અનુભવી રહ્યો છે.

પરિવારે જગ્યાએ જગ્યાએ લગાવ્યા પોસ્ટર

માઉની શોધ માટે પરિવારે શહેરમાં જગ્યાએ જગ્યાએ પોસ્ટર અને હોર્ડિંગ્સ લગાવ્યા છે. બોદલા ચોકડી સહિત અનેક સ્થળોએ લોકો પાસે મદદની અપીલ કરવામાં આવી રહી છે. માઉની ઓળખ તેની નીચેની ચાંચ અને પાંખો પર બનેલા કાળા ડાઘ પરથી થઈ શકે છે. પરિવારે જાહેરાત કરી છે કે જે પણ વ્યક્તિ માઉને સુરક્ષિત શોધીને પાછો લાવશે અથવા તેના વિશે સચોટ માહિતી આપશે, તેને 50 હજાર રૂપિયાનું ઇનામ આપવામાં આવશે.

આખરે જાતેજ ઘરે આવી ગયો માઉ

જે પોપટની શોધમાં સમગ્ર આગ્રામાં લાખો રૂપિયાના હોર્ડિંગ્સ લાગી ગયા હતા, તે આખરે પોતે જ પોતાનું ઘર શોધીને પરત આવી ગયો છે. માઉને શોધી લાવનાર વ્યક્તિ માટે ₹50,000ના ઈનામની જાહેરાત પણ કરવામાં આવી હતી. આ દરમિયાન ઘણા લોકોએ દેશી પોપટ પકડીને ઈનામ મેળવવાનો પ્રયાસ કર્યો હતો, પરંતુ અસલી માઉ આખરે પોતે જ પોતાના ઘરે પહોંચી ગયો. માઉના પુનરાગમનથી સમગ્ર પરિવારમાં ખુશીનો માહોલ છે; સાચે જ કહેવાય છે ને કે, ‘પોતાનું ઘર એ પોતાનું જ ઘર હોય છે!’

જુઓ Video

ટ્રેનના AC ફર્સ્ટ ક્લાસ કેબિનનો દરવાજો તોડી તસ્કરો ₹1.10 લાખ રોકડા અને કિંમતી સામાન ચોરી ગયા