ઇન્ટરનેટ વગર ફોનમાં LIVE TV! ભારતમાં આવી રહ્યો છે દુનિયાનો પહેલો D2M ફીચર ફોન, ડેટા વગર ચાલશે ટીવી

ભારતમાં મોબાઇલ ટેક્નોલોજીના ક્ષેત્રમાં એક નવી ક્રાંતિ આવવાની તૈયારીમાં છે. દક્ષિણ કોરિયાની કંપની ખુશટેકે દાવો કર્યો છે કે તેણે દુનિયાનો પહેલો D2M (Direct-to-Mobile) ફીચર ફોન તૈયાર કર્યો છે, જેનું ઉત્પાદન ભારતમાં થઈ રહ્યું છે. આ ફોનની સૌથી મોટી ખાસિયત એ છે કે તેમાં ઇન્ટરનેટ, Wi-Fi કે મોબાઇલ ડેટા વગર પણ ફ્રીમાં LIVE TV ચેનલો જોઈ શકાશે.

ઇન્ટરનેટ વગર ફોનમાં ચાલશે LIVE TV

આ ફોન D2M ટેક્નોલોજી પર આધારિત છે. તેમાં ATSC 3.0 બ્રોડકાસ્ટ ટેક્નોલોજીનો ઉપયોગ કરવામાં આવ્યો છે, જેના કારણે મોબાઇલ નેટવર્ક અથવા ઇન્ટરનેટ વિના સીધા ટીવી સિગ્નલ પ્રાપ્ત કરી શકાય છે. સારા સિગ્નલ માટે ફોનમાં ઇન-બિલ્ટ એક્સટેન્ડેબલ એન્ટેના પણ આપવામાં આવ્યો છે. કંપનીનો દાવો છે કે આ ટેક્નોલોજી ખાસ કરીને એવા વિસ્તારોમાં ખૂબ ઉપયોગી સાબિત થઈ શકે છે જ્યાં ઇન્ટરનેટ કનેક્ટિવિટી નબળી હોય છે. ભારતમાં છેલ્લા કેટલાક સમયથી D2M ટેક્નોલોજીના વિવિધ પરીક્ષણો પણ ચાલી રહ્યા છે.

ફીચર ફોનમાં મળશે જરૂરી સ્પેસિફિકેશન્સ

ફોનમાં 2.4 ઇંચનું QVGA TFT ડિસ્પ્લે આપવામાં આવ્યું છે, જેનું રિઝોલ્યુશન 320×240 પિક્સેલ છે. ફોન 2G અને 4G LTE નેટવર્કને સપોર્ટ કરે છે, પરંતુ તેમાં 5G સુવિધા ઉપલબ્ધ નહીં હોય. આ ડિવાઇસ ThreadX ઓપરેટિંગ સિસ્ટમ પર ચાલે છે અને તેમાં Unisoc UMS9117-L પ્રોસેસર આપવામાં આવ્યો છે. સાથે 64MB RAM અને 128MB ઇન્ટરનલ સ્ટોરેજ મળશે, જેને microSD કાર્ડ દ્વારા 128GB સુધી વધારી શકાય છે. ફોનમાં ડ્યુઅલ નાનો સિમ સપોર્ટ પણ આપવામાં આવ્યો છે.

કેમેરા, બેટરી અને અન્ય સુવિધાઓ

ફોનના પાછળના ભાગમાં 0.3 મેગાપિક્સલ કેમેરા અને ટોર્ચ આપવામાં આવી છે. ઓડિયો માટે 0.8W મોનો સ્પીકર અને 3.5mm હેડફોન જેક ઉપલબ્ધ છે. ફોનમાં 1800mAh રિમૂવેબલ બેટરી આપવામાં આવી છે, જેને જરૂર પડે ત્યારે સરળતાથી બદલી શકાય છે. ચાર્જિંગ માટે USB Type-C પોર્ટ આપવામાં આવ્યો છે. ઉપરાંત Bluetooth 5.0 અને FM Radio જેવી સુવિધાઓ પણ મળશે. કંપની અનુસાર ફોનમાં કોલિંગ, LIVE TV, ડિજિટલ પેમેન્ટ અને જરૂરી યુટિલિટી એપ્સ પહેલેથી જ ઇન્સ્ટોલ મળશે. હાલમાં ફોન ઉત્પાદન તબક્કામાં છે અને ટૂંક સમયમાં ભારતીય બજારમાં લોન્ચ થઈ શકે છે. અહેવાલો મુજબ Lava અને Nokia જેવી કંપનીઓ પણ D2M ટેક્નોલોજી આધારિત ફીચર ફોન પર કામ કરી રહી છે.

કૅન્સરના દર્દીઓ માટે મોટો ઝટકો! હવે કીમોથેરાપીની જરૂરી દવાઓ થશે મોંઘી, સારવારનો ખર્ચ વધવાની ભીતિ