Wimbledon 2022: રશિયા અને બેલારુસના ખેલાડીઓ પર લાગ્યો પ્રતિબંધ, ડેનિલ મેદવેદેવ સહિત ઘણા ખેલાડીઓ OUT થયા
TV9 GUJARATI | Edited By: Nirupa Duva
Apr 21, 2022 | 3:40 PM
અત્યાર સુધી રશિયા અને બેલારુસના ખેલાડીઓને WTA અને ATP દ્વારા ટુર્નામેન્ટમાં રમવા પર પ્રતિબંધ ન હતો અને તેઓ તેમના દેશના ધ્વજ અને નામ વગર રમતા હતા.
Follow us on
Wimbledon 2022: યુક્રેન પર રશિયાના હુમલા (Ukraine Russia War) બાદથી રશિયન ખેલાડીઓ અને ટીમો પર આંતરરાષ્ટ્રીય ટૂર્નામેન્ટમાં રમવા પર પ્રતિબંધ મૂકવામાં આવ્યો છે. આ મામલે ટેનિસ જગતમાં પહેલીવાર ખેલાડીઓ પર પ્રતિબંધ લગાવવાનો નિર્ણય લેવામાં આવ્યો છે, આ નિર્ણય વિશ્વની સૌથી પ્રતિષ્ઠિત ગ્રાન્ડ સ્લેમ ટૂર્નામેન્ટ વિમ્બલ્ડન (Wimbledon)ની આયોજક ઓલ ઈંગ્લેન્ડ ક્લબ દ્વારા લેવામાં આવ્યો છે. અઠવાડિયાની અટકળો બાદ આખરે ઓલ ઈંગ્લેન્ડ ક્લબે આ વર્ષની ટુર્નામેન્ટમાં ભાગ લેવા પર રશિયન ખેલાડીઓ પર પ્રતિબંધ મૂક્યો છે.
રશિયા સિવાય બેલારુસના ખેલાડીઓને પણ આ વર્ષે એન્ટ્રી નહીં મળે કારણ કે યુક્રેન પરના હુમલામાં બેલારુસે રશિયાને સહકાર આપ્યો હતો. આ પ્રતિબંધ બાદ વિશ્વના બીજા નંબરના ખેલાડી રશિયાના ડેનિલ મેદવેદેવ જેવા દિગ્ગજ ખેલાડી વિમ્બલ્ડન (Daniil Medvedev)માં જોવા નહીં મળે.
લંડનમાં 27 જૂનથી શરૂ થઈ રહેલા વર્ષના ત્રીજા ગ્રાન્ડ સ્લેમમાં આ રશિયન અને બેલારુસ ખેલાડીઓ પર પ્રતિબંધની અટકળો ઘણા દિવસોથી ચાલી રહી હતી. જો કે અત્યાર સુધી WTA, મહિલા ટેનિસ ટૂર્નામેન્ટ સંસ્થા અને પુરુષોની સંસ્થા ATP, તેમની ટુર્નામેન્ટમાં આવા નિયંત્રણો લગાવતા ન હતા અને બંને દેશોના ખેલાડીઓને તેમના દેશના ધ્વજ અને નામ વિના પ્રવેશવાની મંજૂરી આપી હતી. બીજી તરફ ઈન્ટરનેશનલ ટેનિસ ફેડરેશને ડેવિસ કપ અને બિલી જીન કિંગ કપમાં બંને દેશોના પ્રવેશ પર પ્રતિબંધ મૂક્યો હતો.
રશિયાને વિમ્બલ્ડનનો લાભ નહીં લેવા દઈએ
બુધવાર 20 એપ્રિલના રોજ ઓલ ઈંગ્લેન્ડ ક્લબે એક નિવેદન બહાર પાડીને રશિયન અને બેલારુસિયન ખેલાડીઓના પ્રવેશ પર પ્રતિબંધની જાહેરાત કરી. તેમાં કહેવામાં આવ્યું છે કે ઓલ ઈંગ્લેન્ડ ક્લબ એન્ડ ચેમ્પિયનશિપ (વિમ્બલ્ડન) મેનેજમેન્ટ, યુક્રેન યુદ્ધથી પ્રભાવિત લોકોની સાથે છે અને સમગ્ર વિશ્વની જેમ તેઓ પણ રશિયન કાર્યવાહીની નિંદા કરે છે. નિવેદનમાં એમ પણ કહેવામાં આવ્યું છે કે, વિમ્બલ્ડનની પ્રતિષ્ઠાને જોતા તેઓ રશિયાને તેમના ખેલાડીઓ દ્વારા તેનો ફાયદો ઉઠાવવા દેશે નહીં. તેણે વધુમાં કહ્યું, અમે ચેમ્પિયનશિપ 2022 માટે રશિયા અને બેલારુસના ખેલાડીઓની એન્ટ્રી સ્વીકારીશું નહીં.
ઘણા દિગ્ગજો જોવા નહીં મળે
રશિયા-બેલારુસ સામેની આ કાર્યવાહી બાદ આ વખતે ટૂર્નામેન્ટ ઘણા મોટા ખેલાડીઓ વગર યોજાશે. આમાં સૌથી મોટું નામ રશિયાના ટોપ મેન્સ સિંગલ પ્લેયર ડેનિલ મેદવેદેવનું છે. ગયા વર્ષે નોવાક જોકોવિચને હરાવીને યુએસ ઓપનનો ખિતાબ જીતનાર મેદવેદેવ વિશ્વનો નંબર 2 ખેલાડી છે. તેણે થોડા અઠવાડિયા પહેલા નંબર વન રેન્ક પણ હાંસલ કર્યો હતો. તેના સિવાય બે વખતની ઓસ્ટ્રેલિયન ઓપન ચેમ્પિયન અને ભૂતપૂર્વ વર્લ્ડ નંબર વન બેલારુસની વિક્ટોરિયા અઝારેન્કા પણ રમી શકશે નહીં. રશિયા અને બેલારુસના ખેલાડીઓ પર પ્રતિબંધ લાગ્યો છે.
આ પણ વાંચો :