Rinku Singh Dance Video: UP T20 League 2026ની ફાઇનલમાં રિંકુ સિંહનો જોરદાર ડાન્સ થયો વાયરલ, આ ખેલાડીની સદીએ મેરઠને બનાવ્યું ચેમ્પિયન

UPT20 League 2026ની ફાઇનલમાં મેરઠ મેવરિક્સે શાનદાર રમત સાથે ચેમ્પિયનનો ખિતાબ પોતાના નામે કર્યો છે. રિંકુ સિંહની આગેવાની હેઠળ રમતી મેરઠની ટીમે નિર્ણાયક મુકાબલામાં લખનૌ ફાલ્કન્સને 94 રનથી હરાવીને ટ્રોફી પર કબજો કર્યો. મેરઠ માટે આ જીત ખાસ રહી, કારણ કે ટીમે UPT20માં બીજી વખત ચેમ્પિયન બનવાની સિદ્ધિ મેળવી છે.

દિવયાંશ જોશીનો આક્રમક અંદાજ

મેરઠની આ જીત પાછળ સૌથી મોટો ફાળો યુવા બેટ્સમેન દિવ્યાંશ જોશીનો રહ્યો. ફાઇનલ જેવી મહત્વની મેચમાં દિવ્યાંશે શરૂઆતથી જ આક્રમક ક્રિકેટ રમ્યું અને લખનૌના બોલિંગ આક્રમણને સતત નિશાન બનાવ્યું. તેની બેટિંગમાં પાવર અને ટાઇમિંગનો અદભૂત સમન્વય જોવા મળ્યો.

દિવ્યાંશે માત્ર 40 બોલમાં 105 રન ફટકારીને મેરઠના સ્કોરને મજબૂત આધાર આપ્યો. તેની ઇનિંગ દરમિયાન તેણે 12 ચોગ્ગા અને 7 છગ્ગા ફટકાર્યા. જોકે તેની ઇનિંગનું સૌથી મોટું આકર્ષણ તેની સદી રહી. તેણે માત્ર 37 બોલમાં ત્રણ આંકડાનો સ્કોર પૂર્ણ કર્યો, જેના કારણે UPT20માં સૌથી ઝડપી સદીનો નવો રેકોર્ડ તેના નામે નોંધાયો.

મેરઠે આપ્યો 204 રનનો પડકાર

દિવ્યાંશની શાનદાર સદીના સહારે મેરઠ મેવરિક્સે નિર્ધારિત 20 ઓવરમાં 7 વિકેટના નુકસાન પર 203 રન બનાવ્યા. આ રીતે લખનૌ ફાલ્કન્સને ચેમ્પિયન બનવા માટે 204 રનનું લક્ષ્ય મળ્યું. ફાઇનલમાં 200થી વધુનો સ્કોર હાંસલ કરવો લખનૌ માટે પહેલેથી જ મોટો પડકાર હતો. મેરઠને પોતાના બોલિંગ વિભાગ પર વિશ્વાસ હતો અને ટીમે શરૂઆતથી જ લખનૌના બેટ્સમેનો પર દબાણ બનાવવાનું શરૂ કર્યું.

અંતે લખનૌની આખી ટીમ માત્ર 16 ઓવરમાં 109 રન બનાવીને ઓલઆઉટ થઈ ગઈ. પરિણામે મેરઠે ફાઇનલ 94 રનથી જીતીને ચેમ્પિયનશિપ પોતાના નામે કરી.

વિશાલ ચૌધરીની બોલિંગે પણ કમાલ કર્યો

મેરઠની જીતમાં માત્ર દિવ્યાંશની સદી જ મહત્વપૂર્ણ રહી નહોતી. ટીમના બોલરો પણ ફાઇનલમાં સંપૂર્ણ લયમાં જોવા મળ્યા. ખાસ કરીને વિશાલ ચૌધરીએ ચાર વિકેટ ઝડપીને લખનૌની રનચેઝને મોટો ફટકો આપ્યો. 204 રનના લક્ષ્ય સામે 109 રનમાં સમેટાઈ જવું મેરઠના બોલિંગ પ્રદર્શનની મજબૂતી દર્શાવે છે.

રિંકુ સિંહની કેપ્ટન્સીમાં ફરી ચેમ્પિયન

મેરઠ મેવરિક્સની સફળતામાં કેપ્ટન રિંકુ સિંહનું નેતૃત્વ પણ ચર્ચામાં રહ્યું. તેમની આગેવાની હેઠળ મેરઠે UPT20ની દરેક સિઝનમાં ફાઇનલ સુધી પહોંચવાની નોંધપાત્ર સિદ્ધિ મેળવી છે. હવે ટીમે બીજી વખત ચેમ્પિયન બનીને પોતાની સ્થિતિ વધુ મજબૂત કરી છે.

ફાઇનલમાં જીત મળ્યા બાદ રિંકુ સિંહનો ખુશીભર્યો અંદાજ પણ જોવા મળ્યો. ટ્રોફી જીત્યા બાદ તેઓ મેદાન પર જ ડાન્સ કરતા નજરે પડ્યા હતા. ટીમના અન્ય ખેલાડીઓ સાથે રિંકુએ જીતની ઉજવણી કરી અને આ ક્ષણ ચાહકો માટે પણ ખાસ બની ગઈ.

રિંકુ માટે આ માત્ર ટીમની જીત નહોતી. તેમની કેપ્ટન્સીમાં મેરઠે ફરી એક વખત ખિતાબ જીત્યો હોવાથી તેમની નેતૃત્વ ક્ષમતા પણ ચર્ચામાં આવી છે.

આ પણ વાંચો: દુનિયાનો નકશો હવે બદલાશે? 1569ના નકશાને ટક્કર આપશે UNનો આ નવો World Map