
ક્રિકેટમાં ઘણા એવા ખેલાડીઓ છે જેમને આ રમત સાથે પહેલા કોઈ જ લેવાદેવા ન હતી. છતાં તેમણે આ રમતમાં બાદમાં પોતાની છાપ છોડી હતી. કેટલાકે બેટથી આવું કર્યું તો કેટલાકે બોલની મદદથી પોતાનું નામ બનાવ્યું. વેસ્ટ ઈન્ડિઝનો 6 ફૂટ 7 ઈંચ ઊંચો કર્ટલી એમ્બ્રોસ આ મામલે બીજી કેટેગરીમાં આવે છે. દમદાર રેકોર્ડ ધરાવતા આ બોલરનો ઓસ્ટ્રેલિયામાં એક બોલિંગ સ્પેલ આજે પણ કોઈ ભૂલી શક્યું નથી.
પોતાની ધારદાર બોલિંગના આધારે કર્ટલી એમ્બ્રોસે આ ક્રિકેટમાં પોતાનું વર્ચસ્વ જમાવ્યું હતું. ખાસ કરીને ઓસ્ટ્રેલિયા તેનો ખતરનાક બોલિંગ સ્પેલ આજસુધી કોઈ ક્રિકેટ ફેન ભૂલી શક્યા નથી. એમ્બ્રોસે તે સ્પેલ નાખ્યાને હવે 31 વર્ષ થઈ ગયા છે, જે ટેસ્ટ ઈતિહાસના શ્રેષ્ઠ સ્પેલ્સમાંથી એક ગણાય છે.
કર્ટલી એમ્બ્રોસે માત્ર 32 બોલમાં 1 રન આપીને ઓસ્ટ્રેલિયાની 7 વિકેટ ઝડપી હતી. 30 જાન્યુઆરીથી શરૂ થયેલી તે ટેસ્ટ મેચ પર્થમાં રમાઈ હતી અને ઓસ્ટ્રેલિયાની ટીમ તેની પ્રથમ ઈનિંગમાં 2 વિકેટે 85 રન બનાવ્યા બાદ સારી સ્થિતિમાં હતી. પરંતુ, તે પછી એમ્બ્રોસ બોલિંગ કરવા આવ્યો અને આખી બાજી જ પલટાઈ ગઈ હતી.
કર્ટલી એમ્બ્રોસના તે 32 બોલે મેચનું પરિણામ જ બદલી નાખ્યું. તેણે 32 બોલના ગાળામાં એક પછી એક વિકેટ ઝડપી ઓસ્ટ્રેલિયાની બેટિંગને વેરવિખેર કરી નાખી. ફ્રન્ટ ફૂટ પર રહેલી ઓસ્ટ્રેલિયાની ટીમ બેક ફૂટ પર આવી ગઈ અને પરિણામ એ આવ્યું કે આખી ટીમ 119 રન બનાવીને ઓલઆઉટ થઈ ગઈ. 8 ઓસ્ટ્રેલિયન બેટ્સમેનોએ માત્ર 34 રનમાં વિકેટ ગુમાવી હતી. જેમાં એમ્બ્રોસે માત્ર 1 રન આપીને 7 વિકેટ લીધી હતી.
30 જાન્યુઆરી 1993ના રોજ એમ્બ્રોસ દ્વારા બોલ કરવામાં આવેલા તે સ્પેલ પછી, વેસ્ટ ઈન્ડિઝની ટીમે ફરી એકવાર પર્થ ટેસ્ટમાં પ્રભુત્વ જમાવ્યું અને જીત મેળવી. બાદમાં વેસ્ટ ઈન્ડિઝે ઓસ્ટ્રેલિયાને પર્થ ટેસ્ટમાં એક દાવ અને 25 રનથી હરાવ્યું હતું, જેનો હીરો એમ્બ્રોસ હતો.
તેમાં કોઈ શંકા નથી કે કર્ટલી એમ્બ્રોસે વિશ્વ ક્રિકેટમાં લાંબુ અંતર કાપ્યું છે. પરંતુ, તેણે જ્યાંથી આ સફર શરૂ કરી હતી તે જગ્યાને જોઈને કોઈ કહી શકે નહીં કે એક દિવસ તે ક્રિકેટમાં આટલી પ્રસિદ્ધિ મેળવશે. એમ્બ્રોસ એક સુથારનો પુત્ર હતો. 7 ભાઈ-બહેનોમાં તે માતા-પિતાનું ચોથું સંતાન હતો. ઘરમાં ક્રિકેટનું વાતાવરણ ન હતું, સિવાય કે તેની માતા ક્રિકેટની ચાહક હતી.
કર્ટલી એમ્બ્રોસની મનપસંદ રમત બાસ્કેટબોલ હતી. આ માટે તે અમેરિકા પણ શિફ્ટ થવાનો હતો. જો કે આ દરમિયાન તે ક્રિકેટ સાથે પણ જોડાયેલો રહ્યો. પછી તેની માતાએ તેને પ્રોત્સાહન આપ્યું અને આ ક્રિકેટમાં તેની રુચિ વધુ વધી. 20 વર્ષની ઉંમરે તેણે ક્લબ કક્ષાએ રમવાનું શરૂ કર્યું. 1985-86માં ફર્સ્ટ ક્લાસમાં પદાર્પણ કર્યા બાદ, વેસ્ટ ઈન્ડિઝની ટીમમાં પ્રવેશ કર્યો.
આ પણ વાંચો : આઈસ સ્પીડ સ્કેટિંગમાં ભારતનો વાગ્યો ડંકો, યુવા સ્કેટરે મેડલ જીતી રચ્યો ઈતિહાસ