Virat Kohli: વિરાટ કોહલીને BCCI એ સન્માનજનક રીતે કેપ્ટનશિપ છોડી દેવા આપ્યો હતો બે દિવસનો સમય, પરંતુ વાત નહીં માનતા હટાવાયો!

રોહિત શર્મા (Rohit Sharma) T20 બાદ ODI ટીમનો પણ કેપ્ટન બની ગયો છે. બુધવારે, એક મોટી જાહેરાત કરતી વખતે, BCCIએ વિરાટ કોહલી (Virat Kohli) ની જગ્યાએ રોહિત શર્માને મર્યાદિત ઓવરોના ફોર્મેટની કમાન સોંપી. મોટા સમાચાર એ છે કે વિરાટ કોહલી ODI ટીમની કમાન છોડવા માંગતો નથી. તે વર્લ્ડ કપ 2023માં ટીમ ઈન્ડિયા (Team India) નું નેતૃત્વ કરવા ઈચ્છતો હતો, પરંતુ BCCIની યોજના અલગ હતી. અહેવાલો અનુસાર, BCCIએ વિરાટ કોહલીને કેપ્ટનશિપ છોડવા માટે 48 કલાકનો સમય આપ્યો હતો પરંતુ તેણે તેમ કર્યું ન હતું.

સાડા ​​ચાર વર્ષ સુધી ટીમ ઈન્ડિયાની કેપ્ટનશીપ કરનાર વિરાટ કોહલીને બીસીસીઆઈ સન્માનજનક રસ્તો આપવા ઈચ્છતી હતી, પરંતુ તેણે બોર્ડની વાત ન માની, જેના પછી તેને કેપ્ટનશિપ પરથી હટાવી દેવામાં આવ્યો. તમને જણાવી દઈએ કે વિરાટ કોહલીએ એક કેપ્ટન તરીકે ઘણું બધું હાંસલ કર્યું છે પરંતુ તે ICC ટ્રોફી જીતી શક્યો નથી અને આ જ બાબત તેની વિરુદ્ધ ગઈ હતી. વિરાટના નેતૃત્વમાં ટીમ ઈન્ડિયા ચેમ્પિયન્સ ટ્રોફી 2017, વર્લ્ડ કપ 2019 અને T20 વર્લ્ડ કપ 2021 જીતી શકી નથી.

કેપ્ટન તરીકે વિરાટ કોહલીનું પ્રદર્શન

જીતના સંદર્ભમાં, વિરાટ કોહલી ભારતનો સર્વકાલીન શ્રેષ્ઠ ODI કેપ્ટન છે. વિરાટની કેપ્ટન્સીમાં ટીમ ઈન્ડિયાએ 95માંથી 65 મેચ જીતી હતી અને તેની જીતની ટકાવારી 68 ટકાથી વધુ હતી. વિરાટ કોહલીના નેતૃત્વમાં ભારતે 19માંથી 15 દ્વિપક્ષીય શ્રેણી જીતી છે. વિરાટની કપ્તાનીમાં ટીમ ઈન્ડિયાએ ઓસ્ટ્રેલિયા, દક્ષિણ આફ્રિકા, ન્યુઝીલેન્ડ, વેસ્ટ ઈન્ડિઝ, શ્રીલંકામાં શ્રેણી જીતી હતી.

આ આંકડાઓ પરથી સ્પષ્ટ થાય છે કે કેપ્ટન તરીકે વિરાટ કોહલીનું કદ કેવું હતું. એટલું જ નહીં, વિરાટ કોહલીએ કેપ્ટન તરીકે પણ શાનદાર બેટિંગ કરી હતી. તેણે 72.65ની સરેરાશથી 5449 રન બનાવ્યા જેમાં 21 સદી અને 27 અડધી સદી સામેલ છે. છેલ્લા 20 વર્ષમાં તમામ ભારતીય કેપ્ટનોની સદીઓ ઉમેરવામાં આવે તો તેનો આંકડો પણ 19 થઈ જાય છે. તે સ્પષ્ટ છે કે વિરાટ કોહલીએ કેપ્ટન તરીકે પોતાની આગવી છાપ છોડી છે, જેને કદાચ કોઈ નકારી શકશે નહીં.

રોહિત શર્મા સામે મોટો પડકાર!

આગામી બે વર્ષ રોહિત શર્મા માટે પડકારજનક છે. રોહિત શર્મા માટે પ્રથમ પડકાર દક્ષિણ આફ્રિકા સામેની વનડે શ્રેણી છે, જ્યાં તે જીત સાથે શરૂઆત કરવા માંગશે. ટીમ ઈન્ડિયાએ વર્ષ 2022માં જ ઓસ્ટ્રેલિયામાં T20 વર્લ્ડ કપ રમવાનો છે અને 2023માં વર્લ્ડ કપ ભારતમાં છે અને રોહિત શર્મા અને રાહુલ દ્રવિડની જોડી ટીમ ઈન્ડિયાને ચેમ્પિયન બનાવશે તેવી આશા રાખવામાં આવશે.

આ પણ વાંચોઃ Virat kohli: વિરાટ કોહલીને વન ડે કેપ્ટન પદે થી કેમ હટાવ્યો, જાણો 4 મોટા કારણો

આ પણ વાંચોઃ Vijay Hazare 2021: સૌરાષ્ટ્ર ટીમે ઉત્તર પ્રદેશ સામે 32 રને વિજય મેળવ્યો, હાર્વિક દેસાઇનુ અર્ધશતક, ચિરાગ જાનીની 5 વિકેટ