Mirzapur ના ‘મુન્ના ભૈયા’ બન્યો રિષભ પંત, આ જાણીતા ડાયલોગ સાથે કરેલી પોસ્ટ સોશિયલ મીડિયામાં થઇ વાયરલ

ઈંગ્લેન્ડ સામે રમાયેલી સીમિત ઓવરોની શ્રેણીમાં શાનદાર પ્રદર્શનથી રિષભ પંત (Rishabh Pant) ની ચર્ચા દરેક જગ્યાએ થઈ રહી છે. છેલ્લી ODI મેચમાં રિષભ પંતે પોતાની વન-ડે કારકિર્દીની પ્રથમ સદી ફટકારીને ભારતને ઇંગ્લેન્ડની ધરતી પર શ્રેણી વિજય અપાવ્યો હતો. પરંતુ વનડે સીરીઝ પુરી થયા બાદ સોશિયલ મીડિયા પર રિષભ પંતનો એક નવો અને અલગ જ અવતાર જોવા મળી રહ્યો છે. રિષભ પંતે પોતાને જાણીતી વેબ સિરીઝ મિર્ઝાપુરના મુન્ના ભૈયા તરીકે ગણાવ્યા છે.

રિષભ પંતે ટ્વિટર પર પોતાની બે ફોટો શેર કરી છે. આ તસવીરોમાં રિષભ પંત ખુરશી પાસે ઉભો છે. આ તસવીરો પોસ્ટ કરતા રિષભ પંત (Rishabh Pant) એ લખ્યું, ” ઔર હમ એક નયા નિયમ એડ કર દે રહે હૈ, મિર્ઝાપુર કી ગદ્દી પર બૈઠને વાલા કભી ભી નિયમ બદલ શકતા હૈઃ મુન્ના ભૈયા.”

મિર્ઝાપુરના ડાયલોગ સોશિયલ મીડિયામાં ખુબ વાયરલ થઇ રહ્યા છે

તમને જણાવી દઈએ કે મિર્ઝાપુર વેબ સિરીઝની બંને સીઝન ખૂબ જ લોકપ્રિય રહી છે. આ જ શ્રેણી દરમિયાન મુન્ના ભૈયા નામના પાત્રએ નિયમ બદલતા સંવાદ કહ્યા હતા. આ ડાયલોગની સોશિયલ મીડિયા પર પણ ખૂબ ચર્ચા થઈ હતી.

જોકે રિષભ પંતનું નામ પણ આજકાલ સોશિયલ મીડિયા પર ચર્ચામાં છે. ટેસ્ટ હોય કે ODI હોય કે T20 રિષભ પંતે દરેક ફોર્મેટમાં પોતાને ફિટ સાબિત કર્યો છે. હાલમાં રિષભ પંત ત્રણેય ફોર્મેટમાં ટીમ ઇન્ડિયા માટે નંબર વન પરફોર્મર ખેલાડી છે. રિષભ પંત પણ પોતાના શાનદાર પ્રદર્શન દ્વારા ભાવિ સુકાની તરીકે દાવો કરી રહ્યો છે. રિષભ પંતને હાલમાં જ સાઉથ આફ્રિકા સામેની ટી-20 સિરીઝમાં કેપ્ટનશિપની તક મળી છે.