IPL 2022: વિરાટ કોહલીને આ મેચથી ’36’ નો આંકડો, ચેન્નાઈ થી લઈને અમદાવાદ સુધી ના બદલાઈ કહાની

IPLના ઈતિહાસમાં સૌથી વધુ રનનો રેકોર્ડ ભલે વિરાટ કોહલી (Virat Kohli) ના નામે હોય, પરંતુ દિગ્ગજ ભારતીય બેટ્સમેન છેલ્લી કેટલીક સીઝનથી તેમાં રન માટે સંઘર્ષ કરી રહ્યો છે. IPL 2022 ની સીઝન તેના માટે દુઃસ્વપ્ન જેવી રહી, જ્યાં તેણે દરેક રન માટે તરસવુ પડ્યું છે. આ દરમિયાન, તે એક-બે પ્રસંગોએ રંગમાં આવતો જોવા મળ્યો હતો, પરંતુ એકંદરે તે નિષ્ફળ રહ્યો છે. તેની આ નિષ્ફળતા પ્લેઓફ સુધી ચાલુ રહી, જ્યાં તેનું બેટ પ્રથમ એલિમિનેટરમાં અને પછી બીજા ક્વોલિફાયરમાં કોઈ કમાલ કરી શક્યું ન હતું. આ સાથે જ એક સંયોગ સામે આવ્યો છે, જે બતાવે છે કે વિરાટ કોહલીને બીજી ક્વોલિફાયર બિલકુલ પસંદ નથી.

IPL 2022 ની બીજી ક્વોલિફાયર મેચ રાજસ્થાન રોયલ્સ અને રોયલ ચેલેન્જર્સ બેંગ્લોર વચ્ચે શુક્રવારે 27 મેના રોજ અમદાવાદમાં રમાઈ હતી. આ મેચમાં બેંગ્લોરે પ્રથમ બેટિંગ કરી હતી. ટીમને વિરાટ કોહલી અને ફાફ ડુ પ્લેસિસની તેમની ઓપનિંગ જોડી પાસેથી ઝડપી શરૂઆતની જરૂર હતી, પરંતુ તે થઈ શક્યું નહીં અને આ વખતે કારણ હતું વિરાટ કોહલી, જે બીજી ઓવરમાં જ આઉટ થઈ ગયો. પ્રખ્યાત કૃષ્ણાએ કોહલીને પોતાનો શિકાર બનાવ્યો હતો. તે માત્ર 7 રન બનાવી શક્યો હતો.

2011, 2015 અને હવે 2022 ની એક જેવી કહાની

આ રીતે ફરી એક વખત વિરાટ કોહલી IPLની કોઈપણ સિઝનની બીજી ક્વોલિફાયર મેચમાં કોઈ અસર વિના આઉટ થઈ ગયો. અગાઉ 2011માં બેંગ્લોર અને મુંબઈ ઈન્ડિયન્સ ચેન્નાઈના એમએ ચિદમ્બરમ સ્ટેડિયમમાં સિઝનના બીજા ક્વોલિફાયરમાં ટકરાયા હતા. આ મેચમાં પણ બેંગ્લોરે પ્રથમ બેટિંગ કરી હતી અને કોહલી માત્ર 8 રન બનાવી શક્યો હતો. ત્યારબાદ 2015માં પણ બેંગ્લોરને બીજી ક્વોલિફાયર રમવાની તક મળી અને મેચ રાંચીમાં થઈ, જ્યાં બેંગ્લોર ચેન્નાઈ સુપર કિંગ્સનો સામનો કરી રહ્યું હતું. ફરી એકવાર કોહલી નિષ્ફળ રહ્યો હતો અને માત્ર 12 રન બનાવીને આઉટ થયો હતો. યોગાનુયોગ બેંગ્લોરે ત્રણેય વખત પ્રથમ બેટિંગ કરી હતી.

આરસીબી માટે આશાનું નાનું કિરણ રહ્યુ હતુ

કોહલી માટે આ એક ખરાબ સંયોગ હોઈ શકે છે, પરંતુ જો આપણે તેની ટીમને બેંગ્લોરના દ્રષ્ટિકોણથી જોઈએ તો આમાં તેના માટે આશાનું કિરણ જોવા મળે છે. વાસ્તવમાં 2011ની આઈપીએલ સીઝન પણ 10 ટીમો વચ્ચે રમાઈ હતી. કોહલી તે મેચમાં સિંગલ ડિજિટ એટલે કે યુનિટ ફિગર પર આઉટ થયો હતો. તે મેચમાં બેંગ્લોરે મુંબઈને હરાવ્યું હતું અને ટીમ ફાઇનલમાં પહોંચી હતી. એટલે કે બેંગલોરવાસીઓ આશા રાખી શકે છે કે આવું જ કંઈક ફરી એકવાર પુનરાવર્તન થાય અને જો આવું થશે તો બેંગ્લોર અને કોહલી વધુ નિરાશ નહીં થાય એમ લાગી રહ્યુ હતુ.