Ranji Trophy 2022: વડોદરા ના આ ક્રિકેટર પર તૂટ્યો દુઃખનો પહાડ, પુત્રી બાદ પિતાનુ પણ અવસાન
વિષ્ણુ સોલંકી (Vishnu Solanki) ના પિતાનું રવિવારે સવારે નિધન થયું હતું, પરંતુ બરોડાના બેટ્સમેને તેની ટીમની રણજી ટ્રોફી (Ranji Trophy) મેચ બાદ જ પરિવારમાં પાછા ફરવાનું નક્કી કર્યું હતું.
બરોડા (Baroda Cricket Team) ના ક્રિકેટર વિષ્ણુ સોલંકી (Vishnu Solanki) તેમના જીવનના એવા ભયંકર તબક્કામાંથી પસાર થઈ રહ્યા છે, જેની કોઈ કલ્પના પણ ન કરી શકે. પોતાની ટીમ માટે રણજી ટ્રોફી (Ranji Trophy) રમી રહેલા વિષ્ણુને થોડા જ દિવસોમાં બે સૌથી મોટી દુર્ઘટનાનો સામનો કરવો પડ્યો છે. હાલમાં જ વિષ્ણુની નવજાત પુત્રીએ આ દુનિયાને અલવિદા કહી દીધું હતું. તે આ દુઃખમાંથી સંપૂર્ણ રીતે બહાર પણ ન આવી શક્યો અને હવે વિષ્ણુના પિતાએ પણ તેને છોડી ચાલ્યા ગયા છે. વિષ્ણુ સોલંકીના પિતાનું 27 ફેબ્રુઆરી રવિવારના રોજ અવસાન થયું હતું.
મળતી માહિતી મુજબ, વિષ્ણુને સોમવારે સવારે પિતાના મૃત્યુના સમાચાર મળ્યા. પરંતુ તેણે તેની ટીમ પ્રત્યેની નિષ્ઠા પૂરી કરવાનું પસંદ કર્યું. વિષ્ણુ પોતાના ઘરથી હજારો કિલોમીટર દૂર કટકમાં બરોડા અને ચંદીગઢ વચ્ચે રમાયેલી મેચના અંતિમ દિવસે મેદાનમાં હતો. તેણે તેના પરિવારને કહ્યું કે તે મેચ પૂરી કરીને ઘરે પરત ફરશે. બરોડા અને ચંદીગઢની આ મેચ ડ્રો રહી હતી.
પુત્રીના અવસાન બાદ સદી ફટકારી હતી
તેના અંગત જીવનને હચમચાવી દેનારા આ બે મોટા અકસ્માતો છતાં, વિષ્ણુએ તેમની બહાદુરી અને લડાયકતા દર્શાવી અને ક્રિકેટ અને તેમની ટીમ પ્રત્યેની તેની જવાબદારી નિભાવી. થોડા દિવસ પહેલા તેની દીકરીનું બિમારીના કારણે અવસાન થયું હતું. તેના અંતિમ સંસ્કાર કર્યા પછી, તે ટીમ સાથે પાછો ફર્યો અને પછી શુક્રવાર, 25 ફેબ્રુઆરીએ તેણે કટકમાં ચંદીગઢ સામે શાનદાર સદી રમી.
સોલંકીની સદીથી બરોડાને પોઈન્ટ
વિષ્ણુના 104 રનની મદદથી બરોડાએ 517 રનનો મોટો સ્કોર બનાવ્યો અને ચંદીગઢ પર 349 રનની જંગી લીડ લીધી. આ ધાર ટીમ માટે ફાયદાકારક હતી. ચંદીગઢે તેનો બીજો દાવ 7 વિકેટે 473 રન સાથે પૂરો કર્યો અને આ રીતે મેચ પણ ડ્રો રહી, પરંતુ વિષ્ણુની સદીની મદદથી બરોડાને મળેલી પ્રથમ ઈનિંગની લીડથી ટીમને 3 પોઈન્ટ મળ્યા.
વડોદરાનો રહેવાસી વિષ્ણુ વિનોદ છેલ્લા 6 વર્ષથી બરોડાની ટીમનો ભાગ છે અને ટીમ માટે સતત રન બનાવી રહ્યો છે. તેણે અત્યાર સુધીમાં 25 ફર્સ્ટ ક્લાસ મેચમાં 42ની એવરેજથી 1679 રન બનાવ્યા છે, જેમાં 6 સદી અને 8 અડધી સદી સામેલ છે.
આ પણ વાંચોઃ IND vs SL: ભારતીય ટીમની બસમાંથી કારતુસ મળી આવતા ખળભળાટ, મોહાલી ટેસ્ટ માટે કોહલી સહિતના ખેલાડી ચંદીગઢ પહોંચ્યા છે
આ પણ વાંચોઃ Ranji Trophy 2022: ચિરાગ જાનીની બેવડી સદી બાદ જાડેજાના સ્પિનનો જાદુ, સૌરાષ્ટ ટીમનો ઇનિંગ્સથી શાનદાર વિજય