PAK vs WI: વેસ્ટ ઇન્ડિઝ ટીમની સુરક્ષા માટે પાકિસ્તાને 46 DSP સહિતનો વિશાળ કાફલો તૈનાત કર્યો, ન્યુઝીલેન્ડ વાળી થવાનો ડર!

T20 અને ODI શ્રેણી માટે વેસ્ટ ઈન્ડિઝ (West Indies) ની ટીમ ગુરુવારે પાકિસ્તાન (Pakistan) પહોંચી હતી. વેસ્ટ ઈન્ડિઝ કરતા પાકિસ્તાન ક્રિકેટ માટે આ પ્રવાસ વધુ મહત્વનો છે. પીસીબી છેલ્લા કેટલાક સમયથી ઘણી મુશ્કેલીઓનો સામનો કરી રહ્યું છે. દરમિયાન, વેસ્ટ ઈન્ડિઝનો આ પ્રવાસ PCB માટે આંતરરાષ્ટ્રીય સ્તરે સુરક્ષિત અને મજબૂત યજમાન તરીકે પોતાને સાબિત કરવાની તક છે. T20 વર્લ્ડ કપ પહેલા ન્યૂઝીલેન્ડ (New Zealand) ની ટીમે પાકિસ્તાન પહોંચીને પ્રવાસ રદ્દ કરી દીધો હતો.

આ પછી ઈંગ્લેન્ડે પણ પાકિસ્તાન ન જવાનો નિર્ણય લીધો હતો. આ કારણે સમગ્ર આંતરરાષ્ટ્રીય ક્રિકેટમાં PCB નું ઘણું અપમાન થયું હતું. ન્યૂઝીલેન્ડની ટીમ સુરક્ષાની દૃષ્ટિએ પાકિસ્તાનથી પરત ફરી હતી. તેણે મેચની શરૂઆત પહેલા જ પ્રવાસ રદ કરવાનો નિર્ણય લીધો હતો. સાથે જ ઈંગ્લેન્ડે પણ પ્રવાસ ન કરવાનો નિર્ણય લીધો હતો. આ વખતે PCB એ વેસ્ટ ઈન્ડિઝની ટીમ માટે વિસ્તૃત સુરક્ષા વ્યવસ્થા કરી છે. બોર્ડ ઇચ્છતું નથી કે કોઇપણ કચાશને કારણે તેના પર કોઇ પ્રશ્ન ઉઠાવવામાં આવે.

સુરક્ષાની સંપૂર્ણ યોજના તૈયાર

વેસ્ટ ઈન્ડિઝની ટીમની સુરક્ષા માટે સંપૂર્ણ પ્લાન તૈયાર કરવામાં આવ્યો છે. આ પ્લાન એડિશનલ ઈન્સ્પેક્ટર જનરલ ઈમરાન યાકુબ મિન્હાસ અહેમદની અધ્યક્ષતામાં તૈયાર કરવામાં આવ્યો હતો. આ પ્રવાસ માટે કરાંચી પોલીસના 46 ડીએસપી, 13 વરિષ્ઠ અધિકારીઓને ફરજ પર મૂકવામાં આવ્યા છે. આ ઉપરાંત 315 એનજીઓ, 3822 કોન્સ્ટેબલ અને હેડ કોન્સ્ટેબલ, 50 મહિલા ગાર્ડ, રેપ ફોર્સના 500 કોન્સ્ટેબલ અને 889 કમાન્ડો મુલાકાતી ટીમની સુરક્ષા માટે જવાબદાર રહેશે.

નેશનલ સ્ટેડિયમ, તેના રૂટ, પાર્કિંગ એરિયા, હોટલ અને અન્ય જગ્યાઓ સુરક્ષાની જવાબદારી તેઓ લેશે. સ્ટેડિયમ અને હોટલની સુરક્ષા માટે સ્પેશિયલ બ્રાન્ચના લોકોને સાદા કપડામાં ફરજ પર મુકવામાં આવશે. તે જ સમયે, શસ્ત્રો અને વ્યૂહાત્મક ટીમ પણ કટોકટીની સ્થિતિમાં સ્ટેન્ડબાય પર રહેશે.

PCB માટે વેસ્ટ ઈન્ડિઝનો પાકિસ્તાન પ્રવાસ મહત્વપૂર્ણ

2009માં પાકિસ્તાનમાં શ્રીલંકાની ક્રિકેટ ટીમની બસ પર આતંકી હુમલો થયો હતો. ત્યારપછી લાંબા સમયથી પાકિસ્તાનમાં કોઈ મેચ રમાઈ નહોતી. ધીમે ધીમે ટીમોએ પાકિસ્તાનનો પ્રવાસ શરૂ કર્યો. આ પછી, ઇંગ્લેન્ડ અને ન્યુઝીલેન્ડનો પ્રવાસ રદ્દ થવાને કારણે પીસીબી ફરીથી શંકાના દાયરામાં આવી ગયું હતું. હવે પાકિસ્તાનના પ્રવાસે ગયેલી વેસ્ટ ઈન્ડિઝે બોર્ડ અને ચાહકોને નવી આશા આપી છે.

વેસ્ટ ઈન્ડિઝની ટીમ ગુરુવારે કરાચી પહોંચી હતી. જ્યાં તેનો કોરોના ટેસ્ટ થયો હતો. હવે ખેલાડીઓનો કોરોના રિપોર્ટ નેગેટિવ ન આવે ત્યાં સુધી હોટલમાં ક્વોરેન્ટાઈન હેઠળ રહેવું પડશે. બંને દેશો વચ્ચે પ્રથમ T20 13 ડિસેમ્બરે કરાચીના નેશનલ સ્ટેડિયમમાં રમાશે.

આ પણ વાંચોઃ  IND VS SA: ટીમ ઇન્ડિયાને ઓમિક્રોન વેરિઅન્ટથી સુરક્ષીત રાખવા માટે દક્ષિણ આફ્રિકાનો ખાસ પ્લાન, આલીશાન રિસોર્ટ સીલ

આ પણ વાંચોઃ Ashes 2021: ઇંગ્લેન્ડના આ બે દિગ્ગજ ઓસ્ટ્રેલિયા સામેની ટેસ્ટ મેચમાં જૂનિયરોને પાણી પિવડાવતા નજર આવ્યા, તસ્વીરો થઇ વાયરલ