Ashes 2023 : મોઈન અલીને તેની કમબેક ટેસ્ટમાં ICCએ ફટકાર્યો દંડ, આંગળી પર સ્પ્રે કરવાની મળી સજા

મોઇન અલી રવિવારે તેનો 36મો જન્મદિવસ ઉજવી રહ્યો છે અને તેના જન્મદિવસ પર જ તેને લાખો રૂપિયાનું નુકસાન થયું છે. તેને માત્ર લાખોનું નુકસાન જ નહીં પરંતુ તેના ખાતામાં એક ડીમેરિટ પોઈન્ટ પણ જોડવામાં આવ્યો હતો. ICCએ પણ તેને આ સજા તે મેચમાં આપી હતી જેમાં તે 2 વર્ષ બાદ નિવૃત્તિમાંથી પાછો આવ્યો હતો. ઇંગ્લિશ ઓલરાઉન્ડર મોઈન એશિઝ શ્રેણીની પ્રથમ ટેસ્ટમાં નિવૃત્તિમાંથી પરત ફર્યો હતો.

ICCએ મોઈન અલીને દંડ ફટકાર્યો

આ મેચમાં તે ICCની આચાર સંહિતાના ઉલ્લંઘનનો દોષી સાબિત થયો હતો. તેને મેચ ફીના 25 ટકા દંડ ફટકારવામાં આવ્યો છે. તેની એક ટેસ્ટ મેચની ફી 15 લાખ રૂપિયાની નજીક છે અને 25 ટકા દંડ એટલે કે તેને 3.75 લાખ રૂપિયાનો દંડ ભરવો પડશે. ICCના નિવેદન અનુસાર, મોઈનને કલમ 2.20નો ભંગ કરવા બદલ દોષી ઠેરવવામાં આવ્યો છે. હકીકતમાં, પ્રથમ ટેસ્ટના બીજા દિવસની સમાપ્તિની 5 ઓવર પહેલા, મોઇન તેના હાથ પર સ્પ્રે કરતો જોવા મળ્યો હતો.

મોઇનને શા માટે સ્પ્રે કરવાની જરૂર પડી

મોઈન લાંબા સમયથી લાલ બોલથી બોલિંગ કરી શક્યો ન હતો. આવી સ્થિતિમાં, જ્યારે તે લાંબા સમય પછી લાલ બોલથી બોલિંગ કરી, ત્યારે તેની આંગળીઓ સૂજી ગઈ હતી કારણ કે લાલ બોલની સીમ ઉંચી હોય છે. જેના કારણે તેને પોતાની આંગળીઓ પર સ્પ્રે કરવાની જરૂર પડી, પરંતુ તેણે આવું કરતા પહેલા અમ્પાયર સાથે વાત કરી ન હતી.

આ પણ વાંચોઃ Kapil Dev 175 : 40 વર્ષ પહેલા આજના દિવસે કપિલ દેવે 175 રનની યાદગાર ઈનિંગ રમી ભારતના વર્લ્ડ કપ અભિયાનમાં પ્રાણ ફૂંક્યો હતો

લીચની જગ્યાએ મોઈનનો કર્યો સમાવેશ

36 વર્ષીય મોઈન અલીએ આ પહેલા સપ્ટેમ્બર 2021માં છેલ્લી ટેસ્ટ મેચ રમી હતી. આ પછી તેણે નિવૃત્તિ લઈ લીધી હતી, પરંતુ સ્પિનર ​​જેક લીચની ઈજાને કારણે મોઈન એશિઝ માટે નિવૃત્તિમાંથી પાછો ફર્યો હતો. તેણે પ્રથમ ટેસ્ટના બીજા દિવસે 2 વિકેટ ઝડપી હતી.

જાડેજાને પણ દંડ ફટકારવામાં આવ્યો હતો

આ વર્ષે માર્ચમાં ભારતીય ઓલરાઉન્ડર રવિન્દ્ર જાડેજાને પણ આ જ કારણસર મેચ ફીના 25 ટકા દંડ ફટકારવામાં આવ્યો હતો. બોર્ડર ગાવસ્કર ટ્રોફીની પ્રથમ ટેસ્ટ મેચમાં તેણે આંગળી પર ક્રીમનો ઉપયોગ કર્યો હતો. તેણે મેદાન પરના અમ્પાયરને પણ આ અંગે જાણ કરી ન હતી.