IPL 2023: અમદાવાદના નરેન્દ્ર મોદી સ્ટેડિયમમાં રમાશે ઓપનીંગ મેચ, જાણો ગુજરાત સહિતની દરેક ટીમના શેડ્યૂલ

IPL 2023 ના શેડ્યૂલને BCCI એ શુક્રવારે જારી કરી દીધુ છે. અમદાવાદના નરેન્દ્ર મોદી સ્ટેડિયમમાં આગામી સિઝનની ટૂર્નામેન્ટની ઓપનિંગ મેચ રમાનારી છે. 31 માર્ચે શરુ થનારી ટૂર્નામેન્ટની પ્રથમ મેચ ગુજરાત ટાઈટન્સ અને ચેન્નાઈ સુપર કિંગ્સ વચ્ચે રમાનારી છે. હાર્દિક અને પંડ્યા અને મહેન્દ્રસિંહ ધોનીની ટીમ સિઝનની શરુઆતે જ એકબીજા સાથે ટકરાઈને અભિયાનની શરુ કરશે. ટૂર્નામેન્ટમાં તમામ 10 ટીમોને 2 જુદા જુદા ગ્રુપમાં વહેંચી દેવામાં આવી છે. બંને ગ્રુપમાં પાંચ-પાંચ ટીમો રહેશે.

ગ્રુપ A માં મુંબઈ ઈન્ડિયન્સ, કોલકાતા નાઈટ રાઈડર્સ, દિલ્લી કેપિટલ્સ, લખનૌ સુપર જાયન્ટ્સ અને રાજસ્થાન રોયલ્સનો સમાવેશ થાય છે. ગ્રુપ B માં ગુજરાત ટાઈટન્સ, ચેન્નાઈ સુપર કિંગ્સ, પંજાબ કિંગ્સ, રોયલ ચેલેન્જર્સ બેંગ્લોર અને સનરાઈઝર્સ હૈદરાબાદનો સમાવેશ થાય છે. લીગ સ્ટેજમાં કુલ 14-14 મેચો રમશે. ત્યાર બાદ 3 પ્લેઓફ મેચ અને બાદમાં ફાઈનલ મેચ રમાશે. આગામી સિઝનમાં કુલ 70 લીગ મેચ રમાશે. ત્યાર બાજ 3 પ્લેઓફ અને અંતમાં ફાઈનલ મેચ રમાશે. આમ આખીય ટૂર્નામેન્ટમાં કુલ 74 મેચ રમાશે. આ દરમિયાન 18 દિવસ ડબલ હેડર રહેશે, જેમાં એક જ દિવસમાં બે મેચો રમાશે. જ્યારે ફાઈનલ મેચ 28 મેના રોજ રમાશે.

રોયલ ચેલેન્જર્સ બેંગ્લોર

ફાફ ડુ પ્લેસીસની કેપ્ટનશિપ ધરાવતી રોયલ ચેલેન્જર્સ બેંગ્લોરની ટીમ પોતાની પ્રથમ મેચ 2 એપ્રિલે બેંગ્લુરુમાં રમશે. આરસીબીની પ્રથમ મેચ રોહિત શર્માની કેપ્ટનશિપ ધરાવતી મુંબઈ ઈન્ડિયન્સ સામે રમનારી છે.

સનરાઈઝર્સ હૈદરાબાદ

હૈદરાબાદની ટીમ પોતાના અભિયાનની શરુઆત ટૂર્નામેન્ટમાં 2 એપ્રિલે શરુ કરનાર છે. પ્રથમ મેચ રાજસ્થાન રોયલ્સ સામે હૈદરાબાદમાં રમાશે.

મુંબઈ ઈન્ડિયન્સ

આઈપીએલમાં સૌથી વધુ પાંચ વાર ટાઈટલ વિજેતા ટીમ પોતાની સફર સિઝનમાં 2 એપ્રિલથી શરુ કરશે. પોતાની પ્રથમ મેચ રોયલ ચેલેન્જર્સ બેંગ્લોર સામે રમશે. જે મેચ બેંગ્લુરુમાં રમાશે.

લખનૌ સુપર જાયન્ટ્સ

દિલ્લી કેપિટલ્સ સામે પ્રથમ મેચમાં ઉતરીને લખનૌની ટીમ પોતાના અભિયાનની શરુઆત કરશે. લખનૌની ટીમનુ સુકાન કેએલ રાહુલના હાથમાં છે. ટીમ પોતાના હોમગ્રાઉન્ડ લખનૌમાં જ પ્રથમ મેચ રમશે.

ગુજરાત ટાઈટન્સ

વર્તમાન ચેમ્પિયન ટીમ ગુજરાત ટાઈટન્સ ટાઈટલ બચાવવા માટે મેદાને ઉતરશે. હાર્દિક પંડ્યાની આગેવાની ધરાવતી ગુજરાતની ટીમ અમદાવાદમાં સિઝનની ઓપનીંગ મેચમાં ચેન્નાઈ સામે મેદાને ઉતરશે.

પંજાબ કિંગ્સ

મોહાલીમાં પોતાના ઘર આંગણે જ પંજાબ કિંગ્સ પ્રથમ મેચ રમીને ટૂર્નામેન્ટમાં પોતાના અભિયાનની શરુઆત કરશે. 1 એપ્રિલે કોલકાતા નાઈટ રાઈડર્સ સામે ટીમ મેદાને ઉતરશે.

દિલ્લી કેપિટલ્સ

1 એપ્રિલે દિલ્લી કેપિટલ્સ ટીમ લખનૌ સુપર જાયન્ટ્સ સામે મેદાને ઉતરશે. આ મેચ લખનૌમાં રમાનારી છે.

રાજસ્થાન રોયલ્સ

ગત સિઝનમાં રનર્સ અપ રહેનારી ટીમ રાજસ્થાન રોયલ્સ આગામી સિઝનમાં પોતાનુ અભિયાન 2 એપ્રિલે શરુ કરશે. સનરાઈઝર્સ હૈદરાબાદ સામે પોતાની પ્રથમ મેચ હૈદરાબાદમાં રમશે.

કોલકાતા નાઈટ રાઈડર્સ

1 એપ્રિલે કોલકાતા નાઈટ રાઈડર્સ ટીમ પંજાબ કિંગ્સ સામે મોહાલીમાં સિઝનની પ્રથમ મેચ રમશે. કેકેઆર ટીમનુ સુકાન શ્રેયસ અય્યર સંભાળી રહ્યો છે.