આઇપીએલ 2023માં આજે 64મી ગ્રુપ સ્ટેજ મેચમાં પંજાબ કિંગ્સનો સામનો દિલ્હી કેપિટલ્સ સામે થશે. પંજાબ કિંગ્સના કેપ્ટન શિખર ધવન અને દિલ્હીના કેપ્ટન ડેવિડ વોર્નર વચ્ચે આ મુકાબલો હિમાચલ પ્રદેશના ધર્મશાલામાં રમાશે. ધર્મશાલા પંજાબનું આઇપીએલમાં હોમ ગ્રાઉન્ડ છે. પંજાબ કિંગ્સ છેલ્લી 5 મેચમાંથી 3 મેચ હારી છે તો 2 મેચ જીતી છે. વાત કરીએ દિલ્હી કેપિટલ્સની તો તે પણ છેલ્લી 5 મેચમાંથી ત્રણ મેચ હારી છે અને 2 મેચ જીતી છે. દિલ્હીની ટીમ પ્લેઓફ રેસમાંથી બહાર થઇ ગઇ છે. પંજાબની ટીમ પાસે પ્લેઓફમાં પહોંચવાની હજુ પણ તક છે.
શિખર ધવને તેની આઇપીએલ કારકિર્દીમાં અત્યાર સુધી રેકોર્ડ 748 ફોર ફટકારી છે. શિખર ધવને 215 મેચની 214 ઇનિંગમાં 748 ફોર ફટકારી છે. શિખર ધવન એક માત્ર ખેલાડી છે જેણે આઇપીએલમાં 700 થી વધુ ફોર ફટકારી છે. શિખર ધવન આજે દિલ્હી સામે બે ફોર ફટકારીને 750 નો આંકડો પ્રાપ્ત કરી શકે છે.
આઇપીએલમાં શિખર ધવને અત્યાર સુધી 147 સિક્સ ફટકારી છે. તે દિલ્હી સામે ત્રણ સિક્સ વધુ ફટકારીને 150 ના આંકડા પર પહોંચી જશે. અત્યાર સુધી 9 ભારતીય ક્રિકેટરોએ 150 થી વધુ સિક્સ ફટાકારી છે. તો આજની મેચમાં શિખર ધવન એક માત્ર બેટ્સમેન બની શકે છે જેણે આઇપીએલમાં 150 સિક્સ અને 750 ફોર ફટકારી હોય.
શિખર ધવને આઇપીએલમાં 215 મેચમાં 35.67 ની એવરેજ અને 127.16 ની સ્ટ્રાઇક રેટ સાથે 6600 રન કર્યા છે. શિખર ધવને આઇપીએલમાં 2 સદી અને 50 અડધી સદી ફટકારી છે. ધવને બેટિંગમાં 748 ફોર તો 147 સિક્સ ફટકારી છે. આમ તેણે 3874 રન તો ફોર અને સિકસ થી જ કર્યા છે. જે લગભગ તેના રનના 60 ટકા જેટલા છે. શિખર ધવનની નજર દિલ્હી સામેની મેચમાં ફક્ત તેના રેકોર્ડ પર જ નહીં પણ એક યાદગાર ઇનિંગ રમીને પંજાબને પ્લેઓફમાં જીવંત રાખવા પર પણ હશે.