U-19 World Cup: ભારતીય ટીમ ઈંગ્લેન્ડ સામે ઐતિહાસિક જીતની ખુશીમાં મેદાન પર ઝૂમવા લાગી, જુઓ Video

ભારતીય યુવા મહિલા ખેલાડીઓએ જે કામ કર્યુ છે તેનાથી દેશ ભરની યુવતીઓ અને મહિલાઓ જ નહીં સૌ કોઈ ગર્વ લઈ રહ્યુ છે. દેશની દિકરીઓએ એ કામ કર્યુ છે, જે કમાલ કરવા માટે સિનિયર મહિલા ભારતીય ટીમ કરવા વર્ષોથી રાહ જોઈ રહ્યુ છે. ભારતને મહિલા વર્ગમાં પ્રથમ વાર વિશ્વ ચેમ્પિયન બનવાનો મોકો ભારતીય યુવાન દિકરીઓએ અપાવ્યો છે. શેફાલી વર્માની કેપ્ટનશિપ ધરાવતી યુવા મહિલા ટીમે આઈસીસી અંડર 19 મહિલા વિશ્વકપ ટ્રોફી પોતાના નામે કરી છે. ફાઈનલ મેચમાં મજબૂત ઈંગ્લેન્ડની ટીમને હરાવીને ભારતે ચેમ્પિયન ટાઈટલ મેળવ્યુ છે. જે ઐતિહાસિક જીત બાદ ભારતીય ખેલાડીઓએ ખૂબ જશ્ન મનાવ્યો હતો.

ભારતે ટોસ જીતીને પ્રથમ ઈંગ્લેન્ડને બેટિંગ માટે આમંત્રણ આપ્યુ હતુ. શેફાલીએ બિછાવેલી જાળમાં મજબૂત ઈંગ્લીશ ટીમની બેટરો ફસાઈ ગઈ હતી અને એક બાદ અંગ્રેજ ખેલાડીઓ ક્રિઝ અને પેવેલિયન વચ્ચેનુ અંતર ઝડપથી માપવા લાગી હતી. ભારતીય મહિલા બોલરોએ આ માટે કમાલની બોલિંગ કરી હતી અને ચેમ્પિયન બનવાના મિજાજથી મેદાને ઉતરીને સફળતા મેળવી હતી. 68 રનમાં ઓલઆઉટ કરી ભારતે સરળતાથી લક્ષ્ય પાર કરી લીધુ હતુ.

ખૂબ મનાવ્યો જશ્ન

ઐતિહાસિક જીતની ખુશી પણ એવી જ હોય એ સ્વાભાવિક છે. ભારતીય મહિલા ખેલાડીઓએ દક્ષિણ આફ્રિકાના મેદાનમાં પહેલા બોલ અને બાદમાં બેટથી ધમાલ મચાવ્યા બાદ જશ્નનો ધમાલ મચાવ્યો હતો. ટીમ ઈન્ડિયાની દિકરીઓએ બોલીવુડના જાણિતા ગીત પર ડાન્સ કર્યો હતો. કારા ચશ્મા ગીત પર ખૂબ ઉત્સાહથી યુવા ક્રિકેટરો ઝૂમવા લાગી હતી. મોટા ભાગની યુવા ખેલાડીઓ આ ડાન્સની ધમાલમાં સામેલ થઈ અને ગીતના અંત સુધી નાચવામાં લીન રહી હતી.

રિશિતા બસુ. સૌમ્યા તિવારી ડાન્સ કરવામાં સૌથી આગળ રહી હતી. આ સિવાય તિતાસ સાધુ, પાર્શ્વી ચોપરાએ પણ જોરદાર ડાન્સ કર્યો હતો. આ ઐતિહાસિક જીતની ચમક ટીમ ઈન્ડિયાના ખેલાડીઓના ચહેરા પર સ્પષ્ટ જોઈ શકાતી હતી. જીત બાદ ટીમ ઈન્ડિયાના ખેલાડીઓએ આખું મેદાન ધૂમ મચાવી દીધું હતું. આ ખેલાડીઓએ બાઉન્ડ્રી પર દર્શકોનું અભિવાદન કર્યું હતું. ટ્રોફી ઉપાડતી વખતે સમગ્ર ટીમનો ઉત્સાહ જોવા જેવો હતો. એક પછી એક ટીમના ખેલાડીઓએ ટ્રોફી સાથે ફોટોગ્રાફ્સ માટે પોઝ આપ્યા હતા.