IND vs IRE: આયર્લેન્ડનો હીરો પહેલા જ બોલ પર શિવમ દુબેનો શિકાર બન્યો, સતત બીજી મેચમાં આ બેટ્સમેનને કર્યો આઉટ

IND vs IRE 2nd T20I: પહેલી ટી20 મેચમાં આયર્લેન્ડ સામે મળેલી નિરાશાજનક હાર બાદ ભારતીય બોલરોએ બીજી મેચમાં જોરદાર વાપસી કરી. બેલફાસ્ટના સિવિલ સર્વિસ ક્રિકેટ ક્લબ ખાતે રમાયેલી બીજી ટી20માં ટીમ ઈન્ડિયાએ આયર્લેન્ડને મોટો સ્કોર બનાવતા રોકવામાં સફળતા મેળવી. આ જીતમાં ફાસ્ટ બોલરો ઉપરાંત ઓલરાઉન્ડર શિવમ દુબેની ભૂમિકા પણ નિર્ણાયક રહી.

મેચ દરમિયાન આયર્લેન્ડે શરૂઆતમાં વિકેટો ગુમાવી હોવા છતાં હેરી ટેક્ટર અને બેન કેલિટ્ઝ વચ્ચે સારી ભાગીદારી થઈ હતી. બંનેએ મળીને ભારતીય બોલરો પર દબાણ બનાવ્યું અને આયર્લેન્ડને મજબૂત સ્થિતિમાં પહોંચાડ્યું. એક સમયે એવું લાગી રહ્યું હતું કે પહેલી મેચની જેમ આયર્લેન્ડ ફરી એકવાર મેચ પર પકડ બનાવી લેશે.

પરંતુ કેપ્ટન શ્રેયસ અય્યરે યોગ્ય સમયે શિવમ દુબેને બોલિંગમાં લાવવાનો નિર્ણય લીધો અને આ નિર્ણય ટીમ માટે ટર્નિંગ પોઇન્ટ સાબિત થયો. દુબેએ પોતાની ઓવરના ચોથા બોલ પર બેન કેલિટ્ઝને આઉટ કરીને 65 રનની મહત્વપૂર્ણ ભાગીદારી તોડી. કેલિટ્ઝે માત્ર 23 બોલમાં 37 રનની આક્રમક ઇનિંગ રમી હતી. નોંધનીય છે કે સતત બીજી મેચમાં દુબેએ કેલિટ્ઝની વિકેટ ઝડપી હતી.

પહેલા જ બોલ પર ક્લીન બોલ્ડ

બેન કેલિટ્ઝના આઉટ થયા બાદ અનુભવી બેટ્સમેન ગેરેથ ડેલાની ક્રિઝ પર આવ્યો, જેણે પહેલી મેચમાં 49 રનની વિસ્ફોટક ઇનિંગ રમીને ભારતને હાર અપાવવામાં મહત્વની ભૂમિકા ભજવી હતી. જોકે આ વખતે ડેલાની એક પણ રન બનાવી શક્યો નહીં. શિવમ દુબેએ તેને પહેલા જ બોલ પર ક્લીન બોલ્ડ કરી દીધો. સીમ મૂવમેન્ટ સાથે આવેલા બોલે સીધા સ્ટમ્પ્સ ઉખાડી નાખ્યા અને ડેલાની ખાતું પણ ખોલી શક્યો નહીં.

દુબે હેટ્રિક તો પૂર્ણ કરી શક્યો નહીં, પરંતુ સતત બે બોલમાં બે વિકેટ લઈને તેણે આયર્લેન્ડની ઇનિંગની ગતિ સંપૂર્ણપણે અટકાવી દીધી. આ ઝટકાઓ બાદ આયર્લેન્ડની ટીમ મોટી ભાગીદારી ઊભી કરી શકી નહીં અને 20 ઓવરમાં માત્ર 154 રન સુધી જ સીમિત રહી.

હેરી ટેક્ટરે સૌથી વધુ 53 રનની લડાયક ઇનિંગ રમી

ભારત તરફથી શિવમ દુબેએ 2 મહત્વપૂર્ણ વિકેટ ઝડપી, જ્યારે ડેબ્યૂ કરનાર યુવા ઝડપી બોલર પ્રિન્સ યાદવે સૌથી વધુ 3 વિકેટ લીધી. અર્શદીપ સિંહે 2 અને હર્ષિત રાણાએ 1 વિકેટ મેળવી. આયર્લેન્ડ તરફથી હેરી ટેક્ટરે સૌથી વધુ 53 રનની લડાયક ઇનિંગ રમી, પરંતુ તે પોતાની ટીમને મોટા સ્કોર સુધી પહોંચાડી શક્યો નહીં.

હરમનપ્રીત કૌરની તોફાની અડધી સદીથી ભારતે ઓસ્ટ્રેલિયા સામે 170/4નો પડકારજનક સ્કોર ઉભો કર્યો