37 ચોગ્ગા-છગ્ગા, 318 રન… ભારતીય કેપ્ટનની જોરદાર સદી, ટીમ ઈન્ડિયાએ ઈંગ્લેન્ડને ભણાવ્યો પાઠ

ભારત અને ઈંગ્લેન્ડની મહિલા ટીમો વચ્ચે 3 મેચની ODI શ્રેણી રમાઈ રહી છે. ડરહામના રિવરસાઈડ ગ્રાઉન્ડ ખાતે રમાયેલી ત્રીજી ODI મેચમાં, ભારતીય મહિલા ક્રિકેટ ટીમની કેપ્ટન હરમનપ્રીત કૌરે શાનદાર સદી ફટકારીને ઘણા મોટા રેકોર્ડ તોડી નાખ્યા. આ મેચમાં હરમનપ્રીતે શાનદાર ઈનિંગ રમી અને ટીમ ઈન્ડિયાને મોટા સ્કોર સુધી પહોંચાડી. હરમનપ્રીત કૌરે 1 વર્ષ પછી ODIમાં સદી ફટકારી હતી.

હરમનપ્રીત કૌરની કેપ્ટન ઈનિંગ

આ મેચમાં હરમનપ્રીત કૌરે પોતાની કેપ્ટન ઈનિંગથી ઈંગ્લિશ બોલરોને ખૂબ જ પરેશાન કર્યા હતા. તેની ઈનિંગ શાનદાર શોટ્સથી ભરેલી હતી, જેમાં લોંગ-ઓન અને મિડવિકેટ તરફ રમાયેલા શોટ્સે ચાહકોનું ખૂબ મનોરંજન કર્યું હતું. હરમનપ્રીત કૌરે સદી સુધી પહોંચવા માટે ફક્ત 82 બોલ લીધા હતા અને આ તેની ODI કારકિર્દીની સાતમી સદી હતી. આ ઈનિંગમાં, તેણે કુલ 84 બોલનો સામનો કર્યો અને 102 રન બનાવ્યા, જેમાં 14 ચોગ્ગાનો સમાવેશ થાય છે.

હરમનપ્રીતના વનડેમાં 4000 રન પૂર્ણ

આ ઈનિંગ દરમિયાન, હરમનપ્રીત કૌર વનડેમાં 4000 રન પૂરા કરનારી ત્રીજી ભારતીય બની. તેના પહેલા ફક્ત ભારતીય વાઈસ કેપ્ટન સ્મૃતિ મંધાના અને ભૂતપૂર્વ કેપ્ટન મિતાલી રાજ જ આ સિદ્ધિ મેળવી શકી હતી. આ સિવાય હરમનપ્રીત કૌરે મિતાલી રાજ પછી ઈંગ્લેન્ડમાં 1000 વનડે રન બનાવનારી બીજી ભારતીય ક્રિકેટર બનીને ઈતિહાસ રચ્યો હતો. તેણે 20 રનનો આંકડો પાર કરીને આ સિદ્ધિ મેળવી હતી.

ટીમ ઈન્ડિયાએ મોટો સ્કોર બનાવ્યો

હરમનપ્રીત કૌરની આ ઈનિંગને કારણે ટીમ ઈન્ડિયા આ મેચમાં મોટો સ્કોર બનાવવામાં સફળ રહી. ભારતીય ટીમે 50 ઓવરમાં 5 વિકેટ ગુમાવીને 318 રન બનાવ્યા. હરમનપ્રીતની સાથે જેમિમા રોડ્રિગ્સે પણ ઉપયોગી યોગદાન આપ્યું. તેણીએ 50 રન બનાવ્યા. આ પહેલા સ્મૃતિ મંધાના અને હરલીન દેઓલે 45-45 રનની ઈનિંગ રમી હતી. રિચા ઘોષ પણ 38 રન બનાવીને અણનમ રહી હતી.

આ પણ વાંચો: IND vs ENG : એક દિવસ પહેલા ટીમમાં નામ પણ નહોતું, હવે માન્ચેસ્ટરમાં કરશે ડેબ્યૂ !

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો