IND vs ENG : માન્ચેસ્ટર ટેસ્ટના 42 કલાક પહેલા ઈંગ્લેન્ડે પ્લેઈંગ-11 ની કરી જાહેરાત, 8 વર્ષ બાદ આ ખેલાડીનું કમબેક

ભારત સામેની ટેસ્ટ શ્રેણીમાં 2-1થી આગળ ચાલી રહેલા યજમાન ઈંગ્લેન્ડે ચોથી ટેસ્ટ માટે પોતાની પ્લેઈંગ ઈલેવનની જાહેરાત કરી છે. આશ્ચર્યજનક વાત એ છે કે ઈંગ્લેન્ડે ટેસ્ટ મેચના 24 કલાક પહેલા નહીં, પરંતુ 42 કલાક પહેલા પોતાના 11 ખેલાડીઓના નામ જાહેર કર્યા હતા. ટેસ્ટ શ્રેણીની ચોથી મેચ 23 જુલાઈથી માન્ચેસ્ટરના ઓલ્ડ ટ્રેફોર્ડ સ્ટેડિયમ ખાતે શરૂ થવા જઈ રહી છે અને આ માટે ઈંગ્લેન્ડે પોતાના પ્લેઈંગ-11માં ફેરફાર કર્યો છે. લગભગ 8 વર્ષની લાંબી રાહ જોયા બાદ સ્પિનર લિયામ ડોસન ટીમમાં પરત ફર્યો છે.

ઈંગ્લેન્ડની ટીમમાં એક ફેરફાર

ઈંગ્લેન્ડે લોર્ડ્સ ટેસ્ટમાં ટીમ ઈન્ડિયાને 22 રનથી હરાવ્યું અને શ્રેણીમાં 2-1ની લીડ મેળવી. આ મેચમાં ઈંગ્લેન્ડ માટે છેલ્લી વિકેટ સ્પિનર શોએબ બશીરે લીધી હતી. પરંતુ બશીરની આ વિકેટ આ શ્રેણીમાં તેની છેલ્લી વિકેટ સાબિત થઈ કારણ કે તે આંગળીની ઈજાને કારણે શ્રેણીમાંથી બહાર હતો. ઈંગ્લેન્ડના પસંદગીકારોએ ચોથી અને પાંચમી ટેસ્ટ માટે ડાબોડી સ્પિન ઓલરાઉન્ડર લિયામ ડોસનનો ટીમમાં સમાવેશ કર્યો હતો.

ડોસન 8 વર્ષ પછી ટીમમાં સામેલ

ઈંગ્લેન્ડે ડોસનના રૂપમાં પ્લેઈંગ ઈલેવનમાં ફક્ત એક જ ફેરફાર કર્યો છે. એટલે કે ખરાબ ફોર્મ છતાં, ઓપનર જેક ક્રોલી અને વાઈસ કેપ્ટન ઓલી પોપને બીજી તક આપવામાં આવી છે. જ્યાં સુધી ડોસનનો સવાલ છે, આ 35 વર્ષીય ખેલાડીની કહાની ભારતીય ટીમના બેટ્સમેન કરુણ નાયર જેવી જ છે. નાયરની જેમ, ડોસને પણ 2016ની ભારત-ઈંગ્લેન્ડ ટેસ્ટ શ્રેણીમાં ડેબ્યૂ કર્યું હતું પરંતુ તે 2017માં 3 મેચ પછી બહાર થઈ ગયો હતો. આ પછી, જેમ નાયરે આ ઈંગ્લેન્ડ શ્રેણીમાંથી વાપસી કરી હતી, તેવી જ રીતે આ અંગ્રેજી સ્પિનરને પણ બીજી તક મળી છે.

ઈંગ્લેન્ડની પ્લેઈંગ 11

બેન સ્ટોક્સ (કેપ્ટન), જેક ક્રોલી, બેન ડકેટ, ઓલી પોપ, જો રૂટ, હેરી બ્રુક, જેમી સ્મિથ, લિયામ ડોસન, ક્રિસ વોક્સ, બ્રાયડન કાર્સ અને જોફ્રા આર્ચર.

આ પણ વાંચો: IND vs ENG : માન્ચેસ્ટર ટેસ્ટમાં કેવી હશે ટીમ ઈન્ડિયાની પ્લેઈંગ 11 ? મોહમ્મદ સિરાજે આપી મોટી અપડેટ

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો