Breaking News : ICCની મોટી જાહેરાત, વલસાડના હેનીલ પટેલ સહિત 14 વર્ષીય ખેલાડી વૈભવ સૂર્યવંશી આ ટીમમાં સામેલ
ભારતીય અંડર-19 ક્રિકેટ માટે ગર્વની ક્ષણ સર્જાઈ છે. 14 વર્ષીય **વૈભવ સૂર્યવંશી**એ વધુ એક ઐતિહાસિક સિદ્ધિ હાંસલ કરી છે. ICC U19 મેન્સ ક્રિકેટ વર્લ્ડ કપ 2026 માં ભારતની યાદગાર જીતના નાયક રહેલા વૈભવને ICC દ્વારા જાહેર કરાયેલી ‘ટીમ ઓફ ધ ટુર્નામેન્ટ’માં સ્થાન મળ્યું છે.
વૈભવના શાનદાર પ્રદર્શનથી ભારતીય U19 ટીમે વર્લ્ડ કપનો ખિતાબ જીત્યો હતો. ઇંગ્લેન્ડ સામેની ફાઇનલમાં માત્ર 80 બોલમાં 175 રનની વિસ્ફોટક ઇનિંગ રમવા બદલ તેમને પ્લેયર ઓફ ધ ટુર્નામેન્ટ જાહેર કરવામાં આવ્યા હતા. હવે આ પ્રદર્શનના આધારે ICCની પસંદગી પેનલે તેમને ટૂર્નામેન્ટની શ્રેષ્ઠ ટીમમાં સામેલ કર્યા છે.
આ ટીમની પસંદગી ICCની વિશેષ પેનલ દ્વારા કરવામાં આવી હતી, જેમાં ઇયાન બિશપ (કન્વીનર), લિડિયા ગ્રીનવે, એન્ડી ફ્લાવર અને ટેલફોર્ડ વાઇઝનો સમાવેશ થતો હતો. વૈભવ સાથે ભારતના બે અન્ય ખેલાડીઓ કનિષ્ક ચૌહાણ અને હેનિલ પટેલને પણ આ ખાસ 12 સભ્યોની ટીમમાં સ્થાન મળ્યું છે.
ફાઇનલમાં વૈભવનો ધમાકો
ઇંગ્લેન્ડ સામેની ફાઇનલમાં વૈભવ સૂર્યવંશીની 175 રનની ઇનિંગ સમગ્ર ટૂર્નામેન્ટની સૌથી યાદગાર ક્ષણોમાંથી એક રહી. તેમની આ ઇનિંગના કારણે ભારતે ખિતાબ જીત્યો અને અનેક રેકોર્ડ તૂટ્યા. બીજી તરફ, કનિષ્ક ચૌહાણે સમગ્ર ટૂર્નામેન્ટ દરમિયાન બેટ અને બોલ બંનેથી સતત યોગદાન આપ્યું, જ્યારે હેનિલ પટેલે પોતાની ઘાતક બોલિંગથી સૌનું ધ્યાન ખેંચ્યું. હેનિલે કુલ 11 વિકેટ ઝડપી હતી, જેમાં યુનાઇટેડ સ્ટેટ્સ સામે માત્ર 16 રન આપી 5 વિકેટ લેવાનો શાનદાર સ્પેલ પણ સામેલ છે.
ઇંગ્લેન્ડના ખેલાડીઓનું પ્રભાવશાળી પ્રદર્શન
ફાઇનલમાં રનર-અપ રહેલા ઇંગ્લેન્ડના ત્રણ ખેલાડીઓને પણ ટૂર્નામેન્ટ ટીમમાં સ્થાન મળ્યું છે. વિકેટકીપર-બેટ્સમેન થોમસ રીવ્સને ટીમનો કેપ્ટન બનાવવામાં આવ્યો છે. તેમણે ટૂર્નામેન્ટમાં 66ની સરેરાશથી 330 રન બનાવ્યા હતા અને ઓસ્ટ્રેલિયા સામે સેમિફાઇનલમાં તેમની સદી ખાસ યાદગાર રહી હતી.
ટૂર્નામેન્ટમાં સૌથી વધુ 16 વિકેટ લેનાર મેની લમ્સડેન અને 444 રન સાથે સર્વોચ્ચ રન સ્કોરર બેન મેયસને પણ આ ટીમમાં સામેલ કરવામાં આવ્યા છે. બેન મેયસે સ્કોટલેન્ડ સામે 191 રનની શાનદાર ઇનિંગ રમી હતી.
અન્ય દેશોના સ્ટાર ખેલાડીઓનો સમાવેશ
શ્રીલંકાના વિરન ચામુદિતા ને પણ ટીમમાં સ્થાન મળ્યું છે. તેમણે જાપાન સામે 192 રનની ઐતિહાસિક ઇનિંગ રમી હતી. અફઘાનિસ્તાનના ફૈઝલ ખાન શિનોઝાદા અને નુરિસ્તાની ઓમરઝાઈ એ પોતાની ટીમને સેમિફાઇનલ સુધી પહોંચાડવામાં મહત્વપૂર્ણ ભૂમિકા ભજવી હતી. ફૈઝલે આયર્લેન્ડ અને ભારત સામે સતત બે સદી ફટકારી હતી, જ્યારે નુરિસ્તાનીએ ટૂર્નામેન્ટમાં 14 વિકેટ લીધી હતી.
ઓસ્ટ્રેલિયાના કેપ્ટન ઓલિવર પીક એ બે સદી ફટકારી હતી. સાથે જ પાકિસ્તાનના અલી રઝા અને વેસ્ટ ઈન્ડિઝના ડાબોડી સ્પિનર વિટલ લોજ એ પણ પોતાની બોલિંગથી પ્રભાવ પાડ્યો હતો.
ICC U19 વર્લ્ડ કપ 2026 ટીમ ઓફ ધ ટુર્નામેન્ટ
વૈભવ સૂર્યવંશી (ભારત), વિરન ચામુદિતા (શ્રીલંકા), ફૈઝલ ખાન શિનોઝાદા (અફઘાનિસ્તાન), થોમસ રીવ્સ (વિકેટકીપર અને કેપ્ટન – ઇંગ્લેન્ડ), ઓલિવર પીક (ઓસ્ટ્રેલિયા), બેન મેયસ (ઇંગ્લેન્ડ), કનિષ્ક ચૌહાણ (ભારત), નુરિસ્તાની ઓમરઝાઈ (અફઘાનિસ્તાન), વિટલ લોજ (વેસ્ટ ઈન્ડિઝ), અલી રઝા (પાકિસ્તાન), મેની લમ્સડેન (ઇંગ્લેન્ડ) અને હેનિલ પટેલ (ભારત).
Published On - 8:38 pm, Sun, 8 February 26
