Hardik Pandya : હાર્દિક પંડ્યાએ તોડ્યા BCCI ના નિયમો, મેદાનની વચ્ચે કરી આ ભૂલ !
હાર્દિક પંડ્યાએ વિજય હજારે ટ્રોફીમાં શાનદાર ઓલરાઉન્ડ પ્રદર્શન કર્યું છે, જેમાં તેણે બેટિંગ અને બોલિંગ બંનેમાં ટીમને જીત અપાવી. જોકે, BCCIની ફિટનેસ સૂચનાઓ વિરુદ્ધ 10 ઓવર બોલિંગ કરતા તે વિવાદમાં ઘેરાયો છે.
હાર્દિક પંડ્યાએ ફરી એકવાર વિજય હજારે ટ્રોફીમાં શાનદાર પ્રદર્શન કર્યું છે, પરંતુ આ વખતે તે પોતાના રમત ઉપરાંત એક વિવાદને કારણે ચર્ચામાં છે. બરોડા અને ચંદીગઢ વચ્ચે રમાયેલા વિજય હજારે ટ્રોફીના 7મા રાઉન્ડની મેચમાં બરોડાએ ચંદીગઢને 149 રનથી પરાજય આપ્યો. આ મેચમાં હાર્દિક પંડ્યા બરોડાની જીતનો મુખ્ય હીરો સાબિત થયો.
પ્રથમ બેટિંગ કરતા બરોડાએ વિશાળ સ્કોર બનાવ્યો. ટીમે નિર્ધારિત 50 ઓવરમાં 391 રન નોંધાવ્યા. તેના જવાબમાં ચંદીગઢની ટીમ 242 રનમાં ઓલઆઉટ થઈ ગઈ. હાર્દિક પંડ્યાએ આ મેચમાં માત્ર 31 બોલમાં 75 રનની ઝંઝાવાતી ઇનિંગ રમી. તેની ઇનિંગમાં 9 છગ્ગા અને 2 ચોગ્ગા સામેલ હતા. પંડ્યાનો સ્ટ્રાઈક રેટ 240થી વધુ રહ્યો, જેના કારણે મેચનો રુખ સંપૂર્ણપણે બરોડાની તરફ વળી ગયો.
પંડ્યાને બોલિંગ કરવાની મનાઈ
બેટિંગ બાદ હાર્દિક પંડ્યા બોલિંગ કરવા માટે પણ મેદાનમાં ઉતર્યો. તેણે માત્ર બોલિંગ જ નહીં, પરંતુ પોતાના સંપૂર્ણ 10 ઓવરનો સ્પેલ પણ પૂર્ણ કર્યો. પંડ્યાએ 10 ઓવરમાં 66 રન આપી 3 મહત્વપૂર્ણ વિકેટ ઝડપી. જોકે, અહીંથી વિવાદ શરૂ થયો, કારણ કે BCCIના સેન્ટર ઓફ એક્સેલન્સ (COE) દ્વારા પંડ્યાને બોલિંગ કરવાની સ્પષ્ટ મંજૂરી આપવામાં આવી નહોતી.
જ્યારે ટીમ ઈન્ડિયાને ન્યૂઝીલેન્ડ સામેની ODI શ્રેણી માટે પસંદ કરવામાં આવી હતી, ત્યારે BCCIએ સ્પષ્ટ રીતે જણાવ્યું હતું કે હાર્દિક પંડ્યા હાલમાં 10 ઓવર બોલિંગ કરવા માટે સંપૂર્ણપણે ફિટ નથી. તેમ છતાં, વિજય હજારે ટ્રોફીની આ મેચમાં પંડ્યાએ પોતાનો સંપૂર્ણ ક્વોટા બોલિંગ કર્યો, જે BCCIની સૂચનાઓ વિરુદ્ધ ગણાય છે.
પંડ્યાને બોર્ડ તરફથી ઠપકો
ઉલ્લેખનીય છે કે હાર્દિક પંડ્યાને આવનારા T20 વર્લ્ડ કપ માટે COE દ્વારા રિઝર્વ ખેલાડી તરીકે રાખવામાં આવ્યો છે. આવી સ્થિતિમાં તેનું ડોમેસ્ટિક ટૂર્નામેન્ટમાં સતત 10 ઓવર બોલિંગ કરવું BCCI માટે ચિંતાનો વિષય બની શકે છે. શક્ય છે કે આ મામલે પંડ્યાને બોર્ડ તરફથી ઠપકો આપવામાં આવે, જોકે એ પણ શક્ય છે કે મેચ પહેલા તેને વિશેષ મંજૂરી આપવામાં આવી હોય.
પ્રદર્શનની વાત કરીએ તો, હાર્દિક પંડ્યાએ વિજય હજારે ટ્રોફીમાં અસાધારણ ફોર્મ બતાવ્યું છે. ચંદીગઢ સામે 75 રનની ઇનિંગ સિવાય, તેણે વિદર્ભ સામે પણ 133 રનની ધમાકેદાર ઇનિંગ રમી હતી. છેલ્લી બે મેચમાં પંડ્યાએ કુલ 20 છગ્ગા ફટકાર્યા છે, જે તેની ફોર્મ અને આત્મવિશ્વાસને દર્શાવે છે.
હવે હાર્દિક પંડ્યા ન્યૂઝીલેન્ડ સામેની આવનારી T20 શ્રેણીમાં ભારતીય ટીમ માટે રમતા જોવા મળશે, જ્યાં તેના ફિટનેસ અને ઓલરાઉન્ડ પ્રદર્શન પર સૌની નજર રહેશે.
છેલ્લા બોલનો રોમાંચ… શ્રેયસ ઐયરની સામે જ મુંબઈની જીત છીનવાઈ ગઈ
Published On - 9:05 pm, Thu, 8 January 26
