Breaking News: ટીમ ઈન્ડિયાના ખેલાડીએ માત્ર 32 વર્ષની ઉંમરે લીધી નિવૃત્તિ, WTC ફાઈનલનો હતો ભાગ
IPL 2026 પૂર્ણ થયાના ચાર દિવસ બાદ અને ભારત-અફઘાનિસ્તાન ટેસ્ટ સિરીઝ શરુ થવાના બે દિવસ પહેલા ટીમ ઈન્ડિયાના ખેલાડીએ નિવૃત્તિની જાહેરાત કરી હતી. માત્ર 32 વર્ષની ઉંમરે આ ખેલાડીએ આંતરરાષ્ટ્રીય ક્રિકેટમાંથી સંન્યાસ લઈ ચોંકાવી દીધા હતા. આ ખેલાડી વર્લ્ડ ટેસ્ટ ચેમ્પિયનશીપ ફાઈનલ રમનાર ભારતીય ટીમનો ભાગ હતો. તેણે ટીમ ઈન્ડિયા માટે પોતાની છેલ્લી મેચ 2024 માં રમી હતી.
ભારતીય ક્રિકેટ ટીમના વિકેટકીપર-બેટ્સમેન શ્રીકર ભરતે માત્ર 32 વર્ષની ઉંમરે આંતરરાષ્ટ્રીય ક્રિકેટમાંથી નિવૃત્તિ લીધી છે. જોકે તેની આંતરરાષ્ટ્રીય કારકિર્દી ખૂબ લાંબી ન હતી, તેણે ટેસ્ટ ક્રિકેટમાં ટીમ ઈન્ડિયા માટે વિકેટ પાછળ મહત્વપૂર્ણ ભૂમિકાઓ ભજવી હતી. શ્રીકર ભરતે 2024 માં ઈંગ્લેન્ડ સામે ટીમ ઈન્ડિયા માટે છેલ્લી ટેસ્ટ મેચ રમી હતી, અને ત્યારથી, તે ભારતીય ટીમમાં સ્થાન મેળવવા માટે સંઘર્ષ કરી રહ્યો હતો.
શ્રીકર ભરતે નિવૃત્તિ લીધી
કેએસ ભરતે સોશિયલ મીડિયા પર એક પોસ્ટ દ્વારા નિવૃત્તિની જાહેરાત કરી હતી. ભરતે નિવૃત્તિ દરમિયાન ભારતના બે મહાન કેપ્ટનો વિરાટ કોહલી અને રોહિત શર્માનો ખાસ આભાર માન્યો. તેણે કહ્યું કે આ બે દિગ્ગજોની કેપ્ટનશીપ હેઠળ રમવું અને તેમની પાસેથી શીખવું એ તેની કારકિર્દીનો શ્રેષ્ઠ અનુભવ હતો. ભરતના મતે ડ્રેસિંગ રૂમમાં આ સિનિયર ખેલાડીઓ પાસેથી મળેલા સમર્થન અને માર્ગદર્શનની તે હંમેશા કદર કરે છે.
BCCI, કેપ્ટન, કોચ, ફેન્સનો આભાર માન્યો
કેએસ ભરતે લખ્યું, “ગર્વ સાથે, હું આંતરરાષ્ટ્રીય ક્રિકેટમાંથી નિવૃત્તિની જાહેરાત કરું છું. મારા દેશ માટે રમવું એ મારા જીવનનું સૌથી મોટું સન્માન રહ્યું છે. આ યાત્રા માટે ઘણી ધીરજ અને શક્તિની જરૂર હતી, પરંતુ ટેસ્ટ મેચોમાં ભારતનું પ્રતિનિધિત્વ કરવું એ દરેક ક્ષણ મૂલ્યવાન હતી. BCCI અને મારી કારકિર્દી દરમિયાન મને મળેલા બધા કોચ અને મેનેજમેન્ટનો આભાર, જેમણે મને બિનશરતી ટેકો આપ્યો. મારા બધા સાથી ખેલાડીઓનો, અમે સાથે શેર કરેલી બધી ક્ષણો અને સિદ્ધિઓ માટે હું હૃદયપૂર્વક આભાર વ્યક્ત કરું છું, જેમણે મારી કારકિર્દી દરમિયાન મને મદદ કરી, અને તમારા બધા વિના, મારા માટે મારું સ્વપ્ન પૂર્ણ કરવું અને આટલા વર્ષો સુધી આ ક્રિકેટ રમવી શક્ય ન હોત.”
શ્રીકર ભારતની આંતરરાષ્ટ્રીય કારકિર્દી
શ્રીકર ભરતે પોતાની આંતરરાષ્ટ્રીય કારકિર્દીમાં ટીમ ઈન્ડિયા માટે કુલ સાત મેચ રમી હતી. આ સમયગાળા દરમિયાન, તેણે 20.09 ની સરેરાશથી 221 રન બનાવ્યા હતા. જોકે આમાં કોઈ સદી કે અડધી સદીનો સમાવેશ થતો ન હતો, શ્રીકર ભરતે વિકેટકીપર તરીકે અસાધારણ રીતે સારું પ્રદર્શન કર્યું, જેના કારણે તે 2023 ની વર્લ્ડ ટેસ્ટ ચેમ્પિયનશિપની ફાઈનલમાં ટીમ ઈન્ડિયાનો ભાગ હતો.
Breaking News: અંડરવર્લ્ડ ડોન દાઉદ ઈબ્રાહિમની IPL પર હતી નજર, ખરીદવા માંગતો હતો ટીમ, લલિત મોદીનો ચોંકાવનારો દાવો, જુઓ VIDEO
Published On - 8:11 pm, Thu, 4 June 26
