IPL 2024 દરમિયાન બાંગ્લાદેશ અને શ્રીલંકા વચ્ચે ટેસ્ટ શ્રેણી પણ ચાલી રહી છે. શ્રીલંકાએ પ્રથમ ટેસ્ટ જીતી હતી અને બીજી ટેસ્ટમાં પણ તેની જીતની શક્યતાઓ છે. ચિત્તાગોંગમાં ચાલી રહેલી બીજી ટેસ્ટના ત્રીજા દિવસે શ્રીલંકાએ બીજા દાવમાં 455 રનની લીડ મેળવી લીધી છે અને હવે બાંગ્લાદેશ માટે આ મેચમાં પુનરાગમન કરવું ઘણું મુશ્કેલ છે. બાંગ્લાદેશે આ ટેસ્ટ શ્રેણીમાં ખૂબ જ ખરાબ પ્રદર્શન કર્યું છે અને એવું લાગે છે કે તેઓ શ્રેણીમાં ક્લીન સ્વીપ કરશે. જો કે, બાંગ્લાદેશના ખેલાડીઓએ ચિત્તાગોંગ ટેસ્ટમાં કંઈક એવું કર્યું છે, જેને જોઈને આ ટીમની મજાક ઉડાવવામાં આવી રહી છે.
ચિત્તાગોંગ ટેસ્ટના ત્રીજા દિવસે બાંગ્લાદેશના બોલરોએ શાનદાર પ્રદર્શન કર્યું અને શ્રીલંકાએ માત્ર 89 રનમાં 6 વિકેટ ગુમાવી દીધી. જો કે આ પછી કંઈક એવું થયું જેણે બધાને ચોંકાવી દીધા. 21મી ઓવરમાં પ્રભાત જયસૂર્યાએ થર્ડ મેન તરફ શોટ રમ્યો અને આશ્ચર્યજનક વાત એ છે કે બાંગ્લાદેશના પાંચ ફિલ્ડર બોલ તરફ દોડ્યા. પ્રથમ, બીજી, ત્રીજી અને ચોથી સ્લિપ સિવાય પોઈન્ટ પર ઊભેલા ખેલાડીએ પણ બોલ તરફ દોડવાનું શરૂ કર્યું. બાંગ્લાદેશી ખેલાડીઓનો આ વીડિયો સોશિયલ મીડિયા પર વાયરલ થઈ રહ્યો છે.
ચિત્તાગોંગ ટેસ્ટની વાત કરીએ તો શ્રીલંકાએ બીજી ઈનિંગમાં 6 વિકેટે 102 રન બનાવ્યા છે. એન્જેલો મેથ્યુ 39 રન બનાવીને અણનમ છે જ્યારે પ્રભાત જયસૂર્યા 3 રન બનાવીને તેની સાથે ક્રિઝ પર છે. બાંગ્લાદેશ તરફથી હસન મહમૂદે 4 અને ખાલિદ અહેમદે 2 વિકેટ ઝડપી છે. આ પહેલા શ્રીલંકાએ પ્રથમ દાવમાં 531 રનનો જંગી સ્કોર બનાવ્યો હતો. નિસાન મધુશંકાએ 57 રન, કરુણારત્નેએ 86 રન અને કુસલ મેન્ડિસે 93 રન બનાવ્યા હતા. ચાંદીમલ- 59, ધનંજય ડી સિલ્વા 70 અને કામિન્દુ મેન્ડિસ 92 રન બનાવવામાં સફળ રહ્યા હતા. જવાબમાં બાંગ્લાદેશની ટીમ પ્રથમ દાવમાં માત્ર 178 રન જ બનાવી શકી હતી. અસિતા ફર્નાન્ડોએ 4, લાહિરુ કુમારા, વિશ્વા ફર્નાન્ડો અને પ્રભાત જયસૂર્યાએ 2-2 વિકેટ લીધી હતી.
આ પણ વાંચો : IPL 2024: મુંબઈ ઘરઆંગણે પણ હારશે તો રાજસ્થાનને ટોચની ટીમ બનતા કોઈ રોકી શકશે નહીં