ઓસ્ટ્રેલિયાના આ ખેલાડીએ અધવચ્ચેથી છોડી PSL, આ છે મુખ્ય કારણ

ઓસ્ટ્રેલિયાના ઓલ રાઉન્ડર જેમ્સ ફોકનર (James Faulkner) એ પાકિસ્તાન સુપર લીગ (Pakistan Super League) ને વચ્ચેથી જ છોડી દીધી છે. લીગની ફ્રેન્ચાઇઝી નાણા નહીં આપવાના કારણે જેમ્સ ફોકનરે આ નિર્ણય લીધો છે. તેણે કહ્યું કે પાકિસ્તાન ક્રિકેટ બોર્ડ (Pakistan Cricket Board) એ નિયમોનું પાલન નથી કર્યું અને સતત મારી સાથે ખોટુ બોલવાનું ચાલુ રાખ્યું.

ક્રેટા ગ્લેડિએટર્સ માટે છેલ્લી ત્રણ મેચમાં નહીં રમનાર જેમ્સ ફોકનરને લઇને કહેવામાં આવી રહ્યું છે કે તેનો ગુસ્સો વધી ગયો છે. ESPNCricinfo પ્રમાણે ફોકનર બાકી રહેલ નાણાને લઇને પીસીબી સાથે વાત કરી રહ્યો હતો. શુક્રવારે આ વાત એટલી હદે ખરાબ થઇ ગઇ કે જેમ્સ ફોકનરે એરપોર્ટ પર જતા પહેલા પીસીબીના એક અધિકારી સાથે વાત કર્યા બાદ લોબી ફ્લોરની બાલકનીમાંથી પોતાનું બેટ અને હેલમેટ ફેકી દીધું.

એ પહેલા તેણે બે ટ્વીટ કરતા પાકિસ્તાનના ક્રિકેટ ચાહકોની માફી માંગી હતી. પાકિસ્તાન સુપર લીગમાં તેને મળેલ  ટ્રીટમેન્ટને  પોતાનું અપમાન ગણાવ્યું છે. આ વચ્ચે પાકિસ્તાન ક્રિકેટ બોર્ડે એક નિવેદન જાહેર કરતા કહ્યું કે ફોકનરની વાતો ખોટી અને ભ્રામક છે અને તેના આરોપો પર ખેદ વ્યક્ત કર્યો છે. સાથે એ પણ કહ્યું છે કે બોર્ડ જલ્દી એક વિસ્તૃત નિવેદન જાહેર કરશે.

ઈએસપીએન પ્રમાણે ગ્લેડિએટર્સે આ વિવાદથી પોતાને દુર રાખતા કહ્યું કે ખેલાડીનો વિવાદ પીસીબી સાથે છે, એવામાં તેનો કોઇ લેવા-દેવા નથી. જોકે ખેલાડીઓને તેમની ચુકવણી પીસીબી તરફથી ફ્રેન્ચાઇઝીથી નાણા મળે તે પહેલા જ કરવામાં આવે છે. એવામાં સંપુર્ણ કેસ શું છે તે બોર્ડના જણાવ્યા બાદ જ ખ્યાલ આવશે. આ સિઝનમાં ફોકનરે પાકિસ્તાન સુપર લીગમાં કુલ 6 મેચ રમી છે. જેમાં તેણે 6 વિકેટ ઝડપી છે અને 49 રન બનાવ્યા છે. પાકિસ્તાન સુપર લીગમાં ખેલાડીઓને વધુ રકમ પણ નથી મળતી. ખેલાડીઓની કેટેગરી પ્રમાણે રકમ આપવામાં આવે છે. આઈપીએલની જેમ તેમાં હરાજી નથી થતી.

આ પણ વાંચો : Pro Kabaddi League: સિઝન 2ની ચેમ્પિયન યુ મુમ્બા સામે પ્લેઓફની ટીકિટ મેળવવા માટે મેટ પર ઉતરશે ગુજરાતની ટીમ

આ પણ વાંચો : INDvSL: રોહિત શર્મા ભારતીય ટેસ્ટ ટીમનો સુકાની બન્યો, રહાણે-પુજારાને પડતા મુકાયા, શ્રીલંકા સામેની T20 અને ટેસ્ટ ટીમની જાહેરાત