Gujarat Vidhnsabha: વાહનોમાં ગેરકાયદે બ્લેક ફિલ્મ લગાવવા અંગે 2 વર્ષમાં 1,78,948 કેસ કરાયા

પ્રધાનમંત્રી વીમા ફસલ યોજના હેઠળ 23 લાખ ખેડૂતોને 148 કરોડથી વધુ વળતર ચૂકવાયુ

ગેરકાયદે બ્લેકફિલ્મ અંગે 2 વર્ષમાં રૂ. 5,80,65,468નો વસૂલાયો દંડ
ગુજરાતમાં વાહનોના કાચ ઉપર બ્લેક ફિલ્મ લગાવવી એ ગેરકાયદે છે. ગેરકાયદે બ્લેક ફિલ્મ લગાવવા અંગે છેલ્લા બે વર્ષમાં 1, 78, 948 કેસ કરાયા હોવાનું સરકારે વિધાનસભામાં પુછાયેલા લેખિત પ્રશ્નના જવાબમાં જણાવ્યું છે. તડકાથી બચવા માટે વાહનોના કાચ ઉપર બ્લેક ફિલ્મ લગાવવામાં આવે છે. જો કે બ્લેક ફિલ્મનું સ્તર નક્કી કરેલા માપ કરતા વધુ હોય (ડાર્ક) હોય તો તે ગુન્હો બને છે. આવા વાહનચાલકો સામે પોલીસ અને આરટીઓ સમયાંતરે ડ્રાઈવ કરે છે. છેલ્લા બે વર્ષમાં ગેરકાયદે બ્લેક ફિલ્મ લગાવવા અંગે ગુજરાતભરમાં, 1,78,948 કેસ નોંધવામાં આવ્યા છે. આવા કુલ 5,80,65,468નો દંડ વસુલ કરવામાં આવ્યો છે.

પ્રધાનમંત્રી વીમા ફસલ યોજના હેઠળ બે વર્ષમાં 148 કરોડની ચૂકવણી
ગુજરાતમાં પ્રધાનમંત્રી વીમા ફસલ યોજના હેઠળ છેલ્લા બે વર્ષમાં 148 કરોડની ચૂકવણી કરવામાં આવી તેમ ગુજરાત સરકારે વિધાનસભામાં લેખિત પ્રશ્નના જવાબમાં જણાવ્યુ હતું. ગુજરાતમાં વર્ષ 2020-2021માં પ્રધાનમંત્રી વીમા ફસલ યોજનાનો લાભ લેવા માટે 23 લાખથી વધુ ખેડૂતોએ અરજી કરી હતી. વર્ષ દરમિયાન ખેડૂતોએ રૂપિયા 500 કરોડનુ પ્રિમિયમ ભર્યુ હતું. જ્યારે રાજ્ય સરકારે 1500 કરોડ અને કેન્દ્ર સરકારે પણ 1500 કરોડનું વીમા પ્રિમિયમ ભર્યુ હતું. જેની સામે અસરગ્રસ્ત ખેડૂતોને પ્રધાનમંત્રી વીમા ફસલ યોજના હેઠળ 148 કરોડનું વળતર ચૂકવવામાં આવ્યુ છે.

ટ્રેકટર ખરીદી સહાય માટે 27,624 અરજીઓ પડતર
ગુજરાતમાં ટ્રેકટરની ખરીદી માટે અપાતી સહાય માટે હજુ પણ 27,624 અરજીઓ પડતર હોવાની કબુલાત સરકારે કરી છે. વિધાનસભામાં પુછાયેલા લેખિત પ્રશ્નના જવાબમાં સરકારે કહ્યુ છે કે, ગુજરાત સરકાર દ્વારા ટ્રેકટરની ખરીદી માટે ખેડૂતોને આર્થિક સહાય કરવામાં આવે છે. છેલ્લા બે વર્ષમાં ટ્રેકટરની ખરીદી માટે આવેલ કુલ અરજીમાંથી 40 ટકા અરજીઓ નામંજૂર થઈ છે. 20 ટકા અરજીઓ હજુ પણ વિચારાધીન છે. ટ્રેકટર ખરીદીની સહાય માટે, 1,35,488 અરજીઓ આવી હતી. જે પૈકી 51,122 અરજીઓ નામંજૂર કરાઈ છે. કુલ અરજીઓ પૈકી 27,624 અરજીઓ હજુ પણ પડતર છે. 54,758 જેટલી અરજીઓ ટ્રેકટર ખરીદી સહાય માટે મંજુર કરાઈ છે.