‘વર્ષ 2026’માં ટેકનોલોજીના નવા યુગની શરૂઆત! 10,000mAh બેટરીવાળા મોબાઈલ ટૂંક સમયમાં જ માર્કેટમાં ધમાકેદાર ‘એન્ટ્રી’ મારશે
10,000mAh બેટરી ધરાવતા સ્માર્ટફોન ટૂંક સમયમાં જ માર્કેટમાં 'એન્ટ્રી' મારશે. મળતી માહિતી મુજબ, આ નવા સ્માર્ટફોન વધુ સમય સુધી બેટરી બેકઅપ આપશે અને આવનારા સમયમાં 'હાઈ કેપેસિટી બેટરી' મોબાઈલ ટેકનોલોજીમાં મોટો બદલાવ લાવશે.
આવનારું નવું વર્ષ એટલે કે 2026 એ એવું વર્ષ બની શકે છે, જ્યારે સ્માર્ટફોન સંપૂર્ણપણે પાવર બેંકમાં બદલાઈ જશે. આગલા વર્ષે એવા ફોન લોન્ચ થવાની તૈયારી છે, જેમાં 10,000mAh સુધીની મોટી બેટરી હશે. અહેવાલો સૂચવે છે કે, આ ફોન વર્ષ 2026 ની શરૂઆતમાં લોન્ચ થઈ શકે છે.
મળતી માહિતી મુજબ, Xiaomi પાસે આવા બે ફોન પાઇપલાઇનમાં છે, જેમાંથી એક આ મહિને લોન્ચ થઈ શકે છે. જો કે, વર્ષ 2026 માં માત્ર Xiaomi જ નહીં પરંતુ ઘણી મોટી બ્રાન્ડ્સ પણ આ 'પાવરબેંક' ફોન રેસમાં ઉતરવા માટે તૈયાર છે. આવતા વર્ષે સ્માર્ટફોન બેટરીના આંકડા એક નવા સ્તરે પહોંચી શકે છે.
અત્યાર સુધી, લોકો ફોન ચાર્જ કરવા માટે 10,000mAh અથવા 20,000mAh પાવર બેંકનો ઉપયોગ કરતા હતા પરંતુ હવે તે જ કેપેસિટી સીધી ફોનની અંદર જોવા મળશે. મોટી બેટરીવાળા ફોન પહેલા પણ લોન્ચ કરવામાં આવ્યા છે અને Duracell જેવી બ્રાન્ડ્સે પણ આવા પ્રોડક્ટ્સ રજૂ કર્યા હતા.
હવે ફરક એ છે કે, મેઈન્સ્ટ્રીમ બ્રાન્ડ્સ 'સિલિકોન કાર્બન બેટરી' ટેકનોલોજીનો ઉપયોગ કરી રહ્યા છે. આ ટેકનોલોજીની મદદથી વધુ ડેન્સિટી ધરાવતી બેટરીને પાતળા ફોનમાં ફિટ કરી શકાય છે. વર્ષ 2025 માં લોન્ચ થયેલા કેટલાક ફોનમાં 7,500mAh બેટરી છે, જે લગભગ 8mm જાડાઈ અને આશરે 215 ગ્રામ વજન ધરાવે છે.
હવે આ ટેકનોલોજીનો ઉપયોગ કરીને Redmi વર્ષ 2026 માં 10,000mAh બેટરીવાળા ફોન લોન્ચ કરવાની તૈયારી કરી રહ્યું છે. આ ફોનમાં 100W વાયરડ ફાસ્ટ ચાર્જિંગ સપોર્ટ મળશે અને ફોનની જાડાઈ 8.5mm થી ઓછી હોઈ શકે છે. Honor પણ આવાં જ સ્પેસિફિકેશનવાળા ફોન રજૂ કરવાની યોજના બનાવી રહ્યું છે. Oppo, OnePlus અને Realme જેવી બ્રાન્ડ્સ પણ આ સેગમેન્ટમાં એન્ટ્રી કરે તેવી અપેક્ષા છે. Realme એ તો પહેલેથી જ 15,000mAh બેટરીવાળા ફોનનું ટીઝર જાહેર કરી દીધું છે.
