Bajra Khichdi Recipe : બાજરીની હેલ્ધી અને ટેસ્ટી ખીચડી ઘરે બનાવો, જાણો સંપૂર્ણ રેસિપી
શિયાળામાં મોટાભાગના લોકોને ગરમ વસ્તુઓ ખાવાનું પસંદ હોય છે. ત્યારે તમે અવનવી હેલ્ધી અને ટેસ્ટી વાનગીઓ શું બનાવવી તેને લઈને કેટલાક લોકોને મૂંઝવણ હોય છે. તો આજે અમે તમને જણાવી શું કે ઘરે સરળતાથી બાજરીની ખીચડી કેવી રીતે બનાવી શકાય.
ભરશિયાળમાં બાજરીનું સેવન કરવું ખૂબ જ લાભકારક છે. બાજરીની ખીચડી બનાવવા માટે મગની દાળ, બાજરી, બટાકા, મીઠું, ઘી, લીલા વટાણા, ગાજર, ટામેટા, આદુ મરચાની પેસ્ટ, હિંગ, લાલ મરચું, હળદર, ધાણા જીરું સહિતની સામગ્રીની જરુર પડશે.
સૌ પ્રથમ બાજરીને સાફ કરી પાણીથી ધોઈને મિક્સર જારમાં હળવું ગ્રાઈન્ડ કરી લો. જેથી બાજરીની ખીચડી ઝડપથી બનાવી શકાય છે. હવે મગની દાળને સારી રીતે સાફ કરીને પાણીથી ધોઈ લો.
હવે એક પેનમાં અથવા કુકરમાં ઘી અથવા તેલ મુકો. તેલ ગરમ થાય એટલે તેમાં જીરું, હિંગ, મીઠો લીમડો ઉમેરો. ત્યારબાદ તેમાં આદુ - મરચાની પેસ્ટ, કાપેલા બટાકા, લીલા વટાણા, ટામેટા સહિત તમને પસંદ હોય તે શાકભાજી કાપીને નાખી બરાબર મિક્સ કરો.
હવે કુકરમાં બાજરી અને મગની દાળ ઉમેરી બરાબર મિક્સ કરી દો. ત્યારબાદ તેમાં 2 કપ પાણી ઉમેરી તેમાં સ્વાદ અનુસાર મીઠું, લાલ મરચું ઉમેરી ખીચડીને થવા દો. હવે એક વઘારીયામાં ઘી ગરમ કરી તેમાં જીરું, હિંગ, લીલા લસણનો વઘાર કરીને ખીચડીમાં ઉમેરી મિક્સ કરો.
બાજરીની ખીચડી સર્વ કરવા માટે તૈયાર છે. તો તમે આ ખીચડીને ઘી , છાશ સાથે ગરમા ગરમ સર્વ કરી શકો છો. આ ખીચડી તમે ડીનર અને લંચમાં પણ ખાઈ શકો છો.