પુતિનની કાર કેમ છે આટલી ખાસ ? PM મોદીની કાર કરતા કેટલી અલગ ?
રશિયાના રાષ્ટ્રપતિ વ્લાદિમીર પુતિન વિશ્વના સૌથી શક્તિશાળી લોકોમાંથી એક છે. ત્યારે તેમની ઓફિસિયલ કાર પણ તેમના વ્યક્તિત્વને અનુરૂપ એટલી જ પાવરફુલ છે. આ કારને શું ખાસ બનાવે છે અને તે ભારતના વડાપ્રધાન નરેન્દ્ર મોદીની કારથી કેટલી અલગ છે ?
રશિયાના રાષ્ટ્રપતિ વ્લાદિમીર પુતિનનો કાર ચલાવતા ફોટો તમે ઘણી વાર જોયો હશે. વિશ્વના સૌથી શક્તિશાળી લોકોમાંના એક વ્લાદિમીર પુતિનની સત્તાવાર કાર પણ તેમના વ્યક્તિત્વ જેટલી જ શક્તિશાળી છે. તેમની પાસે તેમની સત્તાવાર કાર તરીકે The Aurus Senatનું સ્ટાન્ડર્ડ વર્ઝન અને લિમોઝિન વર્ઝન બંને છે.
Aurus Senat કાર રશિયામાં જ વિકસાવવામાં આવી છે. રાષ્ટ્રપતિ વ્લાદિમીર પુતિન પોતાના માટે માત્ર રશિયન બનાવટની કાર ઇચ્છતા હતા અને તેમની વિનંતી પર જ આ કાર બ્રાન્ડ વિકસાવવામાં આવી હતી. આ કારને રશિયામાં ‘Russian Rolls Royce’ તરીકે લોકપ્રિયતા મળી છે. રાષ્ટ્રપતિ વ્લાદિમીર પુતિનની કારમાં લક્ઝરીની કોઈ કમી નથી, જ્યારે સુરક્ષાની બાબતે પણ એવન છે.
જો વ્લાદિમીર પુતિનની 'The Aurus Senat' કારના લુકની વાત કરીએ તો તે કંઈક અંશે રોલ્સ રોયસ ફેન્ટમ જેવી લાગે છે. તેની ફ્રન્ટ ગ્રીલ એકદમ બોલ્ડ છે, જે ક્રોમ પ્લેટેડ છે. આ કારમાં સ્લીક અને ગોળાકાર આકારના LED હેડલેમ્પ્સ છે, જેમાં DRL ઈન્ટિગ્રેટેડ છે.
આ કારની સ્ટ્રેન્થ વિશે વાત કરીએ તો તેમાં બુલેટપ્રૂફ વિન્ડો ટીન્ટેડ છે. તેના 20 ઇંચના એલોય વ્હીલ્સ પણ બુલેટ પ્રુફ છે. આ કાર એટલી મજબૂત છે કે તે બેલેસ્ટિક મિસાઈલના ઝટકાને સહન કરી શકે છે. આ કારને VR10 લેવલ બેલિસ્ટિક પ્રોટેક્શન રેટિંગ છે. તેમાં એક ગુપ્ત દરવાજો છે, જેમાંથી વ્લાદિમીર પુતિન અકસ્માત સમયે બહાર નીકળી શકે છે.
આ કારમાં ખાસ લક્ઝરી ફીચર્સ આપવામાં આવ્યા છે. તેમાં સેન્ટ્રલ અને રીઅર બંને જગ્યાએ ઈન્ફોટેનમેન્ટ સ્ક્રીન આપવામાં આવી છે. તો આ કારમાં વિસ્ફોટ પ્રૂફ ફ્યુઅલ ટેન્ક, કમ્યુનિકેશન સિસ્ટમ, એર ફિલ્ટરેશન સિસ્ટમ અને ફાયર એક્સટિંગ્યુશિંગ જેવી સિસ્ટમ્સ પણ આપવામાં આવી છે.
આ કારમાં 4.4 લિટર ટ્વીન ટર્બો V8 પેટ્રોલ હાઇબ્રિડ એન્જિન છે. તે 598 હોર્સ પાવર અને 880 ન્યૂટન મીટર ટોર્ક જનરેટ કરે છે. આ કાર માત્ર 6 સેકન્ડમાં 100 કિમીની સ્પીડ પકડી શકે છે. તેમાં 9-સ્પીડ ઓટોમેટિક ગિયરબોક્સ છે.
જો કે, ભારતના પીએમ નરેન્દ્ર મોદી પણ સત્તાવાર રીતે બુલેટપ્રુફ કારનો ઉપયોગ કરે છે. આ કાર છે Mercedes-Maybach S650 Guard. આ કાર 15 કિલો સુધીના TNT હુમલાનો સામનો કરી શકે છે. તે સંપૂર્ણપણે બુલેટ પ્રૂફ છે. આ કારને VR10 બેલિસ્ટિક રેટિંગ પણ મળ્યું છે. તેની ફ્યુઅલ ટેન્ક એટેક પ્રૂફ છે. તે ગેસના હુમલાના કિસ્સામાં ફ્રેશ હવા સપ્લાય કરી શકે છે.
PM નરેન્દ્ર મોદીની કારમાં 6 લીટર ટ્વીન ટર્બો V12 એન્જિન છે. તે 630 BHPનો પાવર જનરેટ કરે છે. તેની અંદાજિત કિંમત 12.5 કરોડ રૂપિયા છે. (Images - Getty Images, PTI)