શું તમે ક્યારેય વિચાર્યું છે કે, ‘ટિશ્યુ પેપર’ હંમેશા સફેદ રંગના જ કેમ હોય છે? આ રહ્યું તેની પાછળનું ‘અસલી રહસ્ય’
ઘર હોય, ઓફિસ હોય કે પછી કોઈ હોટેલ-રેસ્ટોરન્ટ, ટિશ્યુ પેપરનો ઉપયોગ આજે દરેક જગ્યાએ થાય છે. આ પરથી શું તમે ક્યારેય વિચાર્યું છે કે, મોટાભાગના ટિશ્યુ પેપર સફેદ રંગના જ કેમ હોય છે? આ માત્ર દેખાવની વાત નથી પરંતુ તેની પાછળ અનેક કારણો જોડાયેલા છે. આ જ કારણ છે કે, સમગ્ર વિશ્વમાં સૌથી વધુ સફેદ ટિશ્યુ પેપરનો જ ઉપયોગ કરવામાં આવે છે.
સફેદ રંગને સામાન્ય રીતે શુદ્ધતા અને સાફ-સફાઈ સાથે જોડીને જોવામાં આવે છે. ટિશ્યુ પેપરનો ઉપયોગ ચહેરો, હાથ અથવા ખાવા-પીવાની વસ્તુઓ સાથે જોડાયેલો હોય છે, તેથી સફેદ રંગ લોકોમાં તે સાફ અને સુરક્ષિત હોવાનો ભરોસો પેદા કરે છે.
રંગીન ટિશ્યુ પેપર બનાવવા માટે ડાઈ અને કેમિકલનો ઉપયોગ કરવામાં આવે છે. કેટલાક લોકોની સ્કીન (ત્વચા) સેન્સિટિવ હોય છે, એવામાં રંગોમાં રહેલા તત્વો એલર્જી અથવા બળતરાનું કારણ બની શકે છે. કામની વાત એ છે કે, સફેદ ટિશ્યુમાં આવા રંગો હોતા નથી. આથી તે સ્કીન માટે વધુ સુરક્ષિત માનવામાં આવે છે.
ચહેરા અને ત્વચા પર ઉપયોગમાં લેવાતી વસ્તુઓમાં જેટલા ઓછા કેમિકલ હોય, તેટલું વધુ સારું માનવામાં આવે છે. સફેદ ટિશ્યુ પેપરમાં રંગ ઉમેરવાની જરૂર પડતી નથી, જેનાથી ત્વચા પર રિએક્શન અથવા ઇન્ફેક્શનનું જોખમ ઓછું થઈ શકે છે.
ટિશ્યુ પેપરને એવી રીતે બનાવવામાં આવે છે કે, તે પાણીના સંપર્કમાં આવતાની સાથે જ સરળતાથી તૂટી જાય અને જલ્દી ઓગળી જાય. સફેદ ટિશ્યુમાં સામાન્ય રીતે રંગ અને ભારે કેમિકલ ઉમેરવામાં આવતા નથી, તેથી તે સરળતાથી ડિસ્પોઝ (નષ્ટ) થઈ જાય છે.
રંગીન ટિશ્યુ બનાવવા માટે ઘણા પ્રકારના કેમિકલનો ઉપયોગ કરવામાં આવે છે. બીજીબાજુ, સફેદ ટિશ્યુમાં ઓછા કેમિકલનો ઉપયોગ થાય છે, જેનાથી પર્યાવરણને ઓછું નુકસાન થાય છે. સાથે જ કચરો ફેંકવો કે નષ્ટ કરવો પણ સરળ બની જાય છે.
જણાવી દઈએ કે, ટિશ્યુ પેપર મોટાપાયે બનાવવામાં આવે છે. તેમાં અલગ-અલગ રંગ અને ડિઝાઇન ઉમેરવાથી ઉત્પાદનનો ખર્ચ વધી શકે છે. એવામાં સફેદ ટિશ્યુ બનાવવામાં ઓછો ખર્ચ થાય છે, તેથી કંપનીઓ અને ગ્રાહકો બંને આને વધુ પસંદ કરે છે.
