Tongue Biting While Eating : જમતી વખતે વારંવાર જીભ કચડાય જાય છે? શરીર આપી રહ્યું છે આ સંકેત!
જમતી વખતે અચાનક દાંત વચ્ચે જીભ આવી જવી અને જીભ કચડાય જવી એ ઘણા લોકો સાથે થતી સમસ્યા છે. મોટાભાગના લોકો માને છે કે આ ઉતાવળમાં જમવાને કારણે થાય છે. પરંતુ જો વારંવાર આવું થતું હોય, તો તેની પાછળ દાંતની રચના, જીભમાં સોજો અથવા શરીરમાં પોષક તત્ત્વોની ઊણપ જેવા કારણો પણ હોઈ શકે છે.
જો દાંત તૂટેલો હોય, તેની ધાર તીક્ષ્ણ હોય અથવા દાંતનું ફિલિંગ યોગ્ય રીતે ન થયું હોય, તો ચાવતી વખતે જીભને ઈજા થઈ શકે છે. દાંતની ગોઠવણી બરાબર ન હોય તો પણ જીભ વારંવાર દાંત વચ્ચે આવી શકે છે. આવી સમસ્યા સતત થતી હોય તો દંત ચિકિત્સક પાસે તપાસ કરાવવી જોઈએ.
ક્યારેક જીભમાં સોજો આવવાથી તે સામાન્ય કરતાં મોટી થઈ જાય છે. આવી સ્થિતિમાં ખોરાક ચાવતી વખતે જીભ દાંત વચ્ચે ફસાઈ જવાની શક્યતા વધી જાય છે. એલર્જી, ઈજા, ચેપ અથવા અન્ય તબીબી સમસ્યાઓને કારણે જીભમાં સોજો આવી શકે છે. જો જીભમાં અચાનક વધારે સોજો આવે અને શ્વાસ લેવામાં કે ગળવામાં તકલીફ થાય, તો તાત્કાલિક તબીબી સારવાર લેવી જરૂરી છે.
શરીરમાં વિટામિન B12, ફોલેટ અથવા આયર્નની ઊણપ હોય તો જીભમાં બળતરા, દુખાવો અથવા સોજો થઈ શકે છે. આવી તકલીફને કારણે જમતી વખતે અસ્વસ્થતા પણ થઈ શકે છે. જો જીભમાં સતત બળતરા રહેતી હોય અને સાથે થાક કે નબળાઈ અનુભવાતી હોય, તો ડૉક્ટરની સલાહ લેવી યોગ્ય છે.
જમતી વખતે ખૂબ ઝડપથી ચાવવું, ખોરાક ખાતાં વાતો કરવી અથવા ખાવા પર પૂરતું ધ્યાન ન આપવું એ જીભ કચડાયનાં સામાન્ય કારણો છે. આદતને કારણે ક્યારેક જીભ દાંત વચ્ચે આવી જાય છે અને ઈજા થાય છે. આ સમસ્યા ઘટાડવા માટે ધીમે ધીમે જમવું, ખોરાકને સારી રીતે ચાવવો અને જમતી વખતે વાત કરવાનું ટાળવું જોઈએ.
જો જમતી વખતે જીભ પર ઈજા થઈ જાય, તો સૌથી પહેલાં સ્વચ્છ પાણીથી મોં સાફ કરી લો. જો જીભમાંથી લોહી નીકળતું હોય, તો સ્વચ્છ જાળી અથવા કપડાથી ઘા પર હળવું દબાણ આપો. ઘા રૂઝાય ત્યાં સુધી ગરમ, તીખો અને ખાટો ખોરાક ખાવાનું ટાળો, જેથી દુખાવો અને બળતરા ન વધે. જો લોહી નીકળવાનું બંધ ન થાય, ઘા વધારે ઊંડો હોય, જીભમાં વધુ સોજો આવે અથવા ગળવામાં તકલીફ થાય, તો તરત જ ડૉક્ટરની સલાહ લો.
જો વારંવાર જીભ કચડાય જાય, ઘા રૂઝાતો ન હોય, જીભમાં સતત દુખાવો રહે અથવા ચાવવામાં મુશ્કેલી પડતી હોય, તો ડૉક્ટર અથવા દંત ચિકિત્સક પાસે તપાસ કરાવવી જોઈએ. જીભમાં અચાનક ગંભીર સોજો આવે અથવા શ્વાસ લેવામાં તકલીફ થાય, તો તાત્કાલિક સારવાર લેવી જરૂરી છે. ( Disclaimer: આ લેખ માત્ર જાણકારી માટે છે. તેનો ઉપયોગ પુર્વે આપ આપના તબીબ અથવા તજજ્ઞોની સલાહ ખાસ લેવી જરૂરી છે. )
