અદાણી કેસમાં હવે આવ્યું વ્હાઇટ હાઉસનું નિવેદન, ભારત સાથેના સંબંધો કહી દીધી મોટી વાત
અદાણી ગ્રુપ પર અબજો ડોલરની લાંચ અને છેતરપિંડીના આરોપો લાગ્યા છે. અમેરિકન કોર્ટે ધરપકડ વોરંટ જાહેર કર્યું છે. વ્હાઇટ હાઉસે જણાવ્યું કે તેઓ આરોપોથી વાકેફ છે. આ મામલો અદાણી ગ્રીન એનર્જી સાથે સંકળાયેલ છે.
અદાણી ગ્રૂપના વડા ગૌતમ અદાણી ફરી એકવાર મુશ્કેલીમાં ફસાયા છે. તેમના પર અબજો ડોલરની લાંચ લેવાનો અને સરકારી અધિકારીઓ અને અમેરિકન રોકાણકારો સાથે છેતરપિંડી કરવાનો આરોપ લાગ્યો છે. તેમની સામે અમેરિકન કોર્ટમાં કેસ નોંધવામાં આવ્યો છે. કોર્ટે તેમની સામે ધરપકડ માટે વોરંટ બહાર પાડ્યું છે. તે જ સમયે, આ સમગ્ર મામલે અમેરિકાથી વ્હાઇટ હાઉસનું નિવેદન સામે આવ્યું છે.
અદાણી કેસમાં વ્હાઇટ હાઉસના પ્રવક્તા કરીન જીન-પિયરે કહ્યું છે કે અમે અદાણી પર લાગેલા આરોપોથી વાકેફ છીએ. તેમની સામેના આરોપો જાણવા અને સમજવા માટે અમારે યુએસ સિક્યોરિટીઝ એન્ડ એક્સચેન્જ કમિશન અને ડિપાર્ટમેન્ટ ઓફ જસ્ટિસ પાસે જવું પડશે. જ્યાં સુધી ભારત અને અમેરિકા વચ્ચેના સંબંધોનો સવાલ છે, હું માનું છું કે બંને દેશો વચ્ચે મજબૂત સંબંધ છે અને મને ખાતરી છે કે આ સંબંધ ભવિષ્યમાં પણ ચાલુ રહેશે. ખરેખર, આ એક એવો મામલો છે, જેના સંબંધમાં તમે SEC અને DOJ સાથે સીધી વાત કરી શકો છો. ભારત અને અમેરિકા વચ્ચેના સંબંધો મજબૂત છે.
ન્યૂયોર્કની ફેડરલ કોર્ટમાં થયેલી સુનાવણીમાં ગૌતમ અદાણી સહિત 8 લોકો પર અબજોની છેતરપિંડી અને લાંચ લેવાનો આરોપ મૂકવામાં આવ્યો છે. અદાણી ગ્રુપે આ આરોપોને નકારી કાઢ્યા છે. હકીકતમાં, યુનાઇટેડ સ્ટેટ્સ એટર્ની ઓફિસનું કહેવું છે કે ભારતમાં સૌર ઉર્જા સંબંધિત કોન્ટ્રાક્ટ મેળવવા માટે અભાનીએ ભારતીય અધિકારીઓને 265 મિલિયન ડોલર (લગભગ 2200 કરોડ રૂપિયા)ની લાંચ આપી હતી.
જો કે, અદાણી ગ્રુપે એક નિવેદન જારી કરીને તમામ આરોપોને નકારી કાઢ્યા હતા અને તેમને પાયાવિહોણા ગણાવ્યા હતા. જૂથે જણાવ્યું હતું કે યુનાઇટેડ સ્ટેટ્સ ડિપાર્ટમેન્ટ ઓફ જસ્ટિસ અને યુનાઇટેડ સ્ટેટ્સ સિક્યોરિટીઝ એન્ડ એક્સચેન્જ કમિશન દ્વારા અદાણી ગ્રીન એનર્જી લિમિટેડના ડિરેક્ટરો વિરુદ્ધ કરવામાં આવેલા આરોપો પાયાવિહોણા છે. અમે તેમનું ખંડન કરીએ છીએ. અદાણી જૂથે કહ્યું કે યુએસ જસ્ટિસ ડિપાર્ટમેન્ટે પોતે કહ્યું કે અત્યારે આ માત્ર આરોપો છે. જ્યાં સુધી તેઓ દોષિત સાબિત ન થાય ત્યાં સુધી આરોપીઓને નિર્દોષ ગણવામાં આવે છે.
વાસ્તવમાં આ સમગ્ર મામલો અદાણી ગ્રુપની કંપની અદાણી ગ્રીન એનર્જી લિમિટેડ અને અન્ય એક ફર્મ સાથે સંબંધિત છે. આ કેસ યુએસ કોર્ટમાં 24 ઓક્ટોબર, 2024 ના રોજ નોંધવામાં આવ્યો હતો, જેની સુનાવણી બુધવારે થઈ હતી. અદાણી ઉપરાંત, સાગર અદાણી, વિનીત એસ જૈન, રણજીત ગુપ્તા, સિરિલ કેબેનિસ, સૌરભ અગ્રવાલ, દીપક મલ્હોત્રા અને રૂપેશ અગ્રવાલ સામેલ છે.
અદાણી પર લાંચની આ રકમ વસૂલવા માટે અમેરિકન, વિદેશી રોકાણકારો અને બેંકો સાથે ખોટું બોલવાનો આરોપ છે. સાગર અને વિનીત અદાણી ગ્રીન એનર્જી લિમિટેડના અધિકારી છે. સાગર ગૌતમ અદાણીનો ભત્રીજો છે. ગૌતમ અદાણી અને સાગર વિરુદ્ધ ધરપકડ વોરંટ જારી કરવામાં આવ્યું છે.