OTP Fraud: OTP ફ્રોડ શું છે અને તેની સામે કેવી રીતે બચવું? જાણો 5 સરળ રીત
OTP (વન-ટાઈમ પાસવર્ડ) ફ્રોડ આજકાલ સાયબર ક્રાઇમના સૌથી સામાન્ય પ્રકારોમાંથી એક છે. સ્કેમર્સ લોકો અલગ-અલગ બહાના કરીને તમને OTP શેર કરાવવા માટે પ્રયત્ન કરે છે. તમે જો એકવાર OTP આપી દો તો તેઓ તમારા બેંક ખાતામાંથી પૈસા ચોરી શકે છે.
તમને એક કોલ આવે છે અને કોલ કરનાર કહે છે કે તેણે ભૂલથી ખરીદી માટે તમારો મોબાઇલ નંબર સબમિટ કર્યો છે અને તે ખરીદી માટેનો OTP તમને મોકલવામાં આવ્યો છે. પછી તેઓ વિનંતી કરે છે કે તમે આ કોડ તેમની સાથે શેર કરો.
તમને એક અજાણ્યા નંબર પરથી કોલ આવે છે અને કોલ કરનાર પોતાને બેંક અધિકારી હોવાનો દાવો કરે છે. તેઓ તમને એમ કહીને ડરાવવાનો પ્રયાસ કરશે કે બેંકને તમારા ખાતામાં શંકાસ્પદ ટ્રાન્જેક્શન મળી આવ્યા છે અને વધુ નાણાકીય નુકસાન અટકાવવા માટે તમારો PIN અથવા OTP શેર કરવાની જરૂર છે.
હેકર્સ તમારી સામે ડિલિવરી એજન્ટ અથવા ઓનલાઈન વેપારીઓ તરીકે પોતાને રજૂ કરી શકે છે. તેઓ તમારો OTP માંગશે અને દાવો કરશે કે તેમને ઓર્ડર રદ કરવાની અથવા રિફંડ જારી કરવાની જરૂર છે.
સ્કેમર્સ તમને કોલ કરી શકે છે અથવા સંદેશા મોકલી શકે છે જેમાં દાવો કરવામાં આવશે કે તમે ઇનામ, એવોર્ડ અથવા લોટરી જીતી છે અને તેને રિડીમ કરવા માટે OTP ની જરૂર છે.
OTP છેતરપિંડીથી પોતાને બચાવવા માટે તમને મળેલ OTP ક્યારેય કોઈની સાથે શેર કરશો નહીં. કોઈ બેંક એજન્ટ, પોલીસ અધિકારી કે સરકારી અધિકારી તમારો બેંક PIN કે OTP માંગશે નહીં.
યાદ રાખો જ્યારે તમે OTPનો ઉપયોગ કરશો ત્યારે જ તમારા ખાતામાંથી પૈસા ઉપાડવામાં આવશે, નહીં તો નહીં. OTP તમારા ખાતામાં ક્રેડિટ કરવા માટે ઉપયોગમાં લેવાશે નહીં. OTP SMS ધ્યાનથી વાચવો જોઈએ. SMS સામાન્ય રીતે OTP શેના માટે છે તે સમજાવે છે.
ઓનલાઈન ખરીદી કરતા પહેલા વેપારીને ચકાસો. તેમની સત્તાવાર વેબસાઇટ અને તેમના વેબપેજ પરની વિગતો તપાસો. જો તમને હજુ પણ ખાતરી ન હોય, તો કેશ ઓન ડિલિવરી વિકલ્પ પસંદ કરો.
નાણાકીય ચેતવણીઓ અથવા ઉત્પાદન ઑફર્સ ધરાવતા અજાણ્યા સ્ત્રોતોમાંથી કોઈપણ લિંક્સ, ઇમેઇલ્સ અથવા સંદેશાઓ પર ક્લિક કરશો નહીં.
ફક્ત સુરક્ષિત નેટવર્ક દ્વારા ડિજિટલ ચુકવણી કરવી. નાણાકીય વ્યવહારો માટે જાહેર Wi-Fi નો ઉપયોગ કરવાનું ટાળો, કારણ કે આ હેક થઈ શકે છે. તમારા ઓનલાઈન એકાઉન્ટ્સ માટે મજબૂત પાસવર્ડનો ઉપયોગ કરો અને શક્ય હોય ત્યાં 2-ફેક્ટર ઓથેન્ટિકેશન (2FA) ચાલુ કરો.
