Vande Bharat Sleeper Train: આ મહિનાથી મુસાફરો માટે વંદે ભારત સ્લીપર ટ્રેન આવશે પાટા પર, જાણો ડિટેલ
નવી દિલ્હીમાં સ્વદેશી ટેક્નોલોજીથી બનેલી વંદે ભારત સ્લીપર ટ્રેને મહત્તમ 180 કિલોમીટર પ્રતિ કલાકની ઝડપ મેળવી છે. આ વર્ષના આ મહિનાથી આ ટ્રેન દેશભરમાં લાંબા અંતર માટે દોડવાનું શરૂ કરશે. રેલ્વે મંત્રી અશ્વિની વૈષ્ણવે આ માહિતી આપી હતી.
સ્વદેશી ટેક્નોલોજીથી બનેલી સેમી-હાઈ સ્પીડ વંદે ભારત સ્લીપર ટ્રેને ગુરુવારે મહત્તમ 180 કિલોમીટર પ્રતિ કલાકની ઝડપ મેળવી હતી. સફળ ટેસ્ટિંગ બાદ વંદે ભારત સ્લીપર ટ્રેન ફેબ્રુઆરી મહિનાથી દેશભરમાં લાંબા અંતર માટે દોડવાનું શરૂ કરશે. આ સાથે મુસાફરો વિશ્વસ્તરીય સુવિધાઓથી સજ્જ વંદે ભારત સ્લીપરમાં ઝડપી અને સુરક્ષિત મુસાફરીનો આનંદ માણી શકશે.
કેન્દ્રીય રેલવે મંત્રી અશ્વિની વૈષ્ણવે ટ્વિટર પર તેમની પોસ્ટમાં કોટા ડિવિઝનમાં સફળ ટ્રાયલનો એક વીડિયો શેર કર્યો છે. જેમાં તેમણે વંદે ભારત સ્લીપર ટ્રેનની મહત્તમ સ્પીડ 180 કિલોમીટર પ્રતિ કલાક હોવાનો ઉલ્લેખ કર્યો છે.
વીડિયોમાં મોબાઈલ પર ટ્રેનની સ્પીડ અને તેની બાજુમાં પાણી ભરેલો ગ્લાસ દેખાય છે. પાણી અને ટ્રેનની ગતિ સ્થિર હોવાનું સ્પષ્ટપણે જોઈ શકાય છે. આ પોસ્ટ ત્રણ દિવસના સફળ ટ્રાયલ પછી આવે છે, જે 2 જાન્યુઆરીએ સમાપ્ત થઈ હતી. વંદે ભારત સ્લીપરનું પરીક્ષણ રાજસ્થાનના બુંદી જિલ્લામાં કોટા અને લબાન વચ્ચે 30 કિમી લાંબી ટ્રાયલ રન પર કરવામાં આવ્યું હતું.
રેલવે બોર્ડના એક વરિષ્ઠ અધિકારીએ જણાવ્યું કે, આ ટ્રાયલ રિસર્ચ ડિઝાઈન એન્ડ સ્ટાન્ડર્ડ ઓર્ગેનાઈઝેશન (RDSO), લખનૌની દેખરેખ હેઠળ જાન્યુઆરી મહિના સુધી ચાલુ રહેશે. આ પછી રેલ્વે સુરક્ષા કમિશનર દ્વારા મહત્તમ ઝડપે ટ્રેનનું મૂલ્યાંકન કરવામાં આવશે. અંતિમ તબક્કો પસાર કર્યા પછી, વંદે ભારત ટ્રેનોને સત્તાવાર રીતે પ્રમાણિત કરવામાં આવશે અને ઇન્ડક્શન અને નિયમિત સેવા માટે ભારતીય રેલ્વેને સોંપવામાં આવશે.
વંદે ભારત સ્લીપર ટ્રેનોને ઓટોમેટિક દરવાજા, અત્યંત આરામદાયક બર્થ, બોર્ડમાં Wi-Fi, લાઇટિંગ અને એરક્રાફ્ટ જેવી સુવિધાઓ સાથે ડિઝાઇન કરવામાં આવી છે.
રેલ્વે મંત્રી અશ્વિની વૈષ્ણવે શુક્રવારે તેમની એક દિવસીય આસામની મુલાકાત દરમિયાન ત્રણ નવી ટ્રેનોને લીલી ઝંડી બતાવી હતી. રેલ્વે મંત્રીએ ગુવાહાટી-નવી લખીમપુર જન શતાબ્દી એક્સપ્રેસ, નવી બોંગાઈગાંવ-ગુવાહાટી પેસેન્જર ટ્રેન અને તિનસુકિયા-નાહરલાગુન એક્સપ્રેસને ગુવાહાટી રેલ્વે સ્ટેશનથી લીલી ઝંડી બતાવી. આ ઉપરાંત વૈષ્ણવે ડિજીટલ માધ્યમથી દિસપુરમાં તેટેલીયા રોડ ઓવરબ્રિજનું પણ ઉદ્ઘાટન કર્યું હતું.
