‘માસ્ટર્સ કરવા અમેરિકા ન આવો’, ભારતીય સ્ટુડન્ટને કોણે આપી સલાહ? નથી મળી રહ્યા વિઝા અને નોકરી..!
ભારતીય વિદ્યાર્થીઓને અમેરિકામાં માસ્ટર્સ કરવા સામે નિષ્ણાત ધવલ પટેલે ચેતવણી આપી છે. ઊંચો ખર્ચ (લગભગ $1 લાખ), વિઝા અને નોકરીની સમસ્યાઓના કારણે ઘણા વિદ્યાર્થીઓ અભ્યાસ પછી ભારત પાછા ફરે છે.
યુએસમાં ઉચ્ચ શિક્ષણ મેળવવાનું સપનું ઘણા ભારતીય વિદ્યાર્થીઓનું હોય છે. દર વર્ષે મોટી સંખ્યામાં વિદ્યાર્થીઓ અમેરિકાની વિવિધ યુનિવર્સિટીઓમાં માસ્ટર ડિગ્રી માટે જાય છે.
સારી યુનિવર્સિટી, વૈશ્વિક એક્સપોઝર અને અભ્યાસ બાદ નોકરીની તકને ધ્યાનમાં રાખીને વિદ્યાર્થીઓ અમેરિકા જવાનું પસંદ કરે છે. જોકે, હાલની સ્થિતિને જોતા કેટલાક નિષ્ણાતો વિદ્યાર્થીઓને આ નિર્ણય લેતા પહેલા ખર્ચ અને રોજગારની તકોનું યોગ્ય મૂલ્યાંકન કરવાની સલાહ આપી રહ્યા છે.
AI અને ડેટા ક્ષેત્રના પ્રોફેશનલ તથા Codebasicsના સ્થાપક ધવલ પટેલે સોશિયલ મીડિયા પર ભારતીય વિદ્યાર્થીઓને અમેરિકા જઈને માસ્ટર ડિગ્રી મેળવવા અંગે મહત્વની સલાહ આપી છે. તેમણે એક પોસ્ટમાં લખ્યું હતું કે, “માસ્ટર ડિગ્રી મેળવવા માટે અમેરિકા ન આવો.” પોતાની વાત સમજાવતા તેમણે તાજેતરમાં ન્યૂ જર્સીની Stevens Institute of Technologyમાંથી માસ્ટર ડિગ્રી પૂર્ણ કરેલા એક વિદ્યાર્થી સાથે થયેલી વાતચીતનો ઉલ્લેખ કર્યો હતો.
ધવલ પટેલના જણાવ્યા મુજબ, તે વિદ્યાર્થીએ જણાવ્યું કે તેના ઘણા સહાધ્યાયીઓને અભ્યાસ પૂર્ણ કર્યા બાદ અમેરિકામાં નોકરી મળી શકી નથી. કેટલાક વિદ્યાર્થીઓને H-1B વિઝા સંબંધિત મુશ્કેલીઓનો પણ સામનો કરવો પડ્યો અને અંતે તેઓ ભારત પરત ફર્યા.
તેમણે વધુમાં જણાવ્યું કે અમેરિકામાં બે વર્ષના માસ્ટર અભ્યાસનો કુલ ખર્ચ લગભગ $1 લાખ સુધી પહોંચી શકે છે, જેમાં ટ્યુશન ફી ઉપરાંત રહેવા, ખાવા-પીવા અને અન્ય ખર્ચનો સમાવેશ થાય છે. જોકે, વાસ્તવિક ખર્ચ યુનિવર્સિટી, કોર્સ અને શહેર પ્રમાણે અલગ હોઈ શકે છે.
આવી સ્થિતિમાં શિક્ષણ માટે લોન લેતા વિદ્યાર્થીઓએ ખાસ સાવચેતી રાખવી જરૂરી છે. જો અભ્યાસ બાદ તરત નોકરી ન મળે, તો લોનના EMI ચૂકવવા મુશ્કેલ બની શકે છે.
તેથી અમેરિકામાં અભ્યાસ માટે જતાં પહેલાં વિદ્યાર્થીઓએ માત્ર યુનિવર્સિટીની રેન્કિંગ નહીં, પરંતુ કોર્સનું જોબ માર્કેટ, કુલ ખર્ચ, સ્કોલરશિપ, ઇન્ટર્નશિપની તકો અને આંતરરાષ્ટ્રીય વિદ્યાર્થીઓ માટેના વર્ક ઓથોરાઇઝેશન નિયમો પણ તપાસવા જોઈએ. અમેરિકામાં માસ્ટર ડિગ્રી મેળવવી ખરાબ વિકલ્પ નથી, પરંતુ આ નિર્ણય સારા પગારની આશા કરતાં વાસ્તવિક ખર્ચ, જોખમ અને સંભવિત ROIને ધ્યાનમાં રાખીને લેવો વધુ યોગ્ય છે.
