અમેરિકામાં ભારતીય વિદ્યાર્થીઓ માટે મોટો ઝટકો! આ નિયમમાં ફેરફારથી વધી શકે છે મુશ્કેલીઓ
અમેરિકાના D/S (Duration of Status) નિયમોમાં મોટા ફેરફારો આવી રહ્યા છે, જે F-1 વિઝા ધરાવતા ભારતીય વિદ્યાર્થીઓને સીધી અસર કરશે. હવે નિશ્ચિત સમયગાળાની વિઝા વ્યવસ્થા લાગુ પડશે, જેથી વિઝા એક્સ્ટેન્શન, વધારાના ખર્ચ અને અનિશ્ચિતતા વધશે.
US Duration of Status Rules: US Duration of Status Rules: અમેરિકામાં અભ્યાસ કરવા ઇચ્છતા ભારતીય વિદ્યાર્થીઓ માટે ચિંતાજનક સમાચાર સામે આવ્યા છે. રાષ્ટ્રપતિ ડોનાલ્ડ ટ્રમ્પના વહીવટીતંત્રે વિદેશી વિદ્યાર્થીઓ માટે લાગુ પડતા મહત્વપૂર્ણ D/S (Duration of Status) નિયમમાં ફેરફાર કરવાની પ્રક્રિયા આગળ ધપાવી છે. આ નિર્ણયનો સીધો પ્રભાવ F-1 વિઝા પર અભ્યાસ કરતા વિદ્યાર્થીઓ, J-1 એક્સચેન્જ વિઝિટર્સ અને I વિઝા ધરાવતા મીડિયા કર્મચારીઓ પર પડી શકે છે.
અમેરિકાના ડિપાર્ટમેન્ટ ઓફ હોમલેન્ડ સિક્યુરિટી (DHS) દ્વારા રજૂ કરાયેલા અંતિમ નિયમને મેનેજમેન્ટ એન્ડ બજેટ ઓફિસ (OMB) દ્વારા મંજૂરી આપવામાં આવી છે. આ મંજૂરી બાદ હવે નિયમને ફેડરલ રજિસ્ટરમાં પ્રકાશિત કરવામાં આવશે, જે તેના અમલીકરણ તરફનું મહત્વપૂર્ણ પગલું માનવામાં આવે છે.
હાલમાં અમેરિકામાં F-1 વિઝા પર અભ્યાસ કરતા વિદ્યાર્થીઓને "Duration of Status" એટલે કે D/S હેઠળ રહેવાની મંજૂરી આપવામાં આવે છે. આ વ્યવસ્થામાં વિદ્યાર્થીઓ માટે કોઈ નિશ્ચિત પ્રસ્થાન તારીખ નક્કી કરવામાં આવતી નથી. વિદ્યાર્થીઓ તેમનો અભ્યાસક્રમ પૂર્ણ થાય ત્યાં સુધી કાનૂની રીતે અમેરિકામાં રહી શકે છે. તેમની વિઝા સ્થિતિ સીધી રીતે તેમના અભ્યાસક્રમ સાથે જોડાયેલી હોય છે.
પ્રસ્તાવિત નિયમ મુજબ હવે વિદેશી વિદ્યાર્થીઓ માટે નિશ્ચિત સમયગાળાની વિઝા વ્યવસ્થા લાગુ કરવામાં આવી શકે છે. સામાન્ય રીતે મહત્તમ ચાર વર્ષનો સમયગાળો નક્કી કરવાની જોગવાઈ રાખવામાં આવી છે. જો કોઈ વિદ્યાર્થીનો અભ્યાસક્રમ ચાર વર્ષથી વધુ સમયનો હોય, તો તેને વિઝા એક્સ્ટેન્શન માટે અલગથી અરજી કરવી પડશે.
વિઝા એક્સ્ટેન્શન માટે વિદ્યાર્થીઓએ ફરીથી સરકારી ફી ચૂકવવી પડશે. ઉપરાંત બાયોમેટ્રિક્સ પ્રક્રિયા, કાનૂની સલાહ અને અન્ય વહીવટી ખર્ચ પણ વધવાની શક્યતા છે. દરેક એક્સ્ટેન્શન અરજી સાથે વિઝા મંજૂર થશે કે નહીં તેની અનિશ્ચિતતા પણ વિદ્યાર્થીઓ માટે ચિંતાનો વિષય બની શકે છે.
ભારતીય વિદ્યાર્થીઓ માટે આ ફેરફાર અનેક પડકારો ઊભા કરી શકે છે. જો વિઝા એક્સ્ટેન્શન અરજી નકારવામાં આવે, તો વિદ્યાર્થીઓને અભ્યાસ અધવચ્ચે જ છોડીને પોતાના દેશમાં પરત ફરવું પડી શકે છે. હાલમાં ડિગ્રી પૂર્ણ થયા બાદ વિદ્યાર્થીઓને Optional Practical Training (OPT) માટે અરજી કરવા અથવા નોકરી શોધવા માટે 60 દિવસનો ગ્રેસ પીરિયડ આપવામાં આવે છે. નવા પ્રસ્તાવ હેઠળ આ સમયગાળો ઘટાડીને 30 દિવસ કરવાનો વિચાર કરવામાં આવ્યો છે. જેના કારણે વિદ્યાર્થીઓ પર ઝડપથી કારકિર્દી સંબંધિત નિર્ણય લેવાનું દબાણ વધશે.
આ ઉપરાંત, જો વિઝા એક્સ્ટેન્શન પ્રક્રિયા પેન્ડિંગ હોય, તો OPT મેળવવામાં પણ વિક્ષેપ આવી શકે છે. પરિણામે ઘણા વિદ્યાર્થીઓને અમેરિકામાં રહીને કામ કરવાની તક ગુમાવવી પડી શકે છે. ભારતીય વિદ્યાર્થીઓ ઘણીવાર અભ્યાસ દરમિયાન પોતાનો મેજર બદલે છે અથવા MS બાદ PhD જેવી વધુ ડિગ્રી મેળવવાનું પસંદ કરે છે. નવા નિયમો આવી શૈક્ષણિક લવચીકતાને મર્યાદિત કરી શકે છે.
તાજેતરના Open Doors Report અનુસાર, 2024-25 શૈક્ષણિક વર્ષ દરમિયાન અમેરિકામાં અંદાજે 3.6 લાખ ભારતીય વિદ્યાર્થીઓ અભ્યાસ કરી રહ્યા હતા. આ સંખ્યા અમેરિકામાં રહેલા કુલ 11 લાખ આંતરરાષ્ટ્રીય વિદ્યાર્થીઓના લગભગ 31 ટકા જેટલી છે. ભારત હજુ પણ અમેરિકામાં અભ્યાસ કરતા વિદેશી વિદ્યાર્થીઓનો સૌથી મોટો સ્ત્રોત દેશ છે. નવા નિયમો અમલમાં આવ્યા બાદ ભારતીય વિદ્યાર્થીઓ માટે અમેરિકામાં ઉચ્ચ શિક્ષણ મેળવવાનો માર્ગ વધુ જટિલ અને ખર્ચાળ બની શકે છે. સાથે જ વિઝા સંબંધિત અનિશ્ચિતતા વધતાં ભવિષ્યમાં અમેરિકા પસંદ કરનારા વિદ્યાર્થીઓની સંખ્યામાં પણ અસર જોવા મળી શકે છે.
