સોનાના ભાવમાં ફરી જોવા મળી શકે છે ‘જંગી ઉછાળો’ પણ…, આ નવા રિપોર્ટે ભલભલાને વિચારતા કરી દીધા
જો તમે પણ કિંમતી ધાતુ સોનામાં રોકાણ કરો છો અથવા ખરીદી કરવાનું વિચારી રહ્યા છો, તો ગ્લોબલ ઇન્વેસ્ટમેન્ટ બેંકનો આ નવો રિપોર્ટ તમારા હોશ ઉડાવી શકે છે. વર્ષ 2026ના અંત સુધીમાં બજારમાં કેવા મોટા ઉલટફેર થશે અને વ્યાજ દરોમાં ફેરફારને કારણે કિંમતો પર કેવું દબાણ આવશે, તેને લઈને એક ખાસ અહેવાલ સામે આવ્યો છે.
સોનાના ભાવમાં ફરી એકવાર વધારો જોવા મળી શકે છે અને ભાવ વર્તમાન સ્તરથી 15 ટકાથી વધુ વધી શકે છે. જો કે, હવે સોનામાં એટલો વધારો નહીં થાય, જેટલો અંદાજ પહેલા લગાવવામાં આવી રહ્યો હતો. આ વાત ગ્લોબલ ઇન્વેસ્ટમેન્ટ બેંક Goldman Sachs ના નવા અહેવાલમાં સામે આવી છે. Goldman Sachs એ વર્ષ 2026 ના અંત સુધી સોનાના ભાવના પોતાના અંદાજમાં ઘટાડો કર્યો છે. બેંકનું માનવું છે કે, વર્ષના બીજા ભાગમાં સોનાના ભાવમાં વધારો જારી રહી શકે છે પરંતુ તે અગાઉના અંદાજ કરતાં ઓછો રહેશે. બીજી તરફ બેંકે આશંકા વ્યક્ત કરી છે કે, જો વ્યાજ દરો વધશે તો સોનામાં વધારો વધુ ઓછો રહી શકે છે.
બેંકે ડિસેમ્બર 2026 માટે સોનાનો ટાર્ગેટ ભાવ 500 ડોલર પ્રતિ ઔંસ ઘટાડીને 4,900 ડોલર પ્રતિ ઔંસ કરી દીધો છે. Goldman Sachs ના એલીના થોમસ અને ડાન સ્ટ્રુયવેને એક રિપોર્ટમાં જણાવ્યું છે કે, લાંબાગાળાના દૃષ્ટિકોણથી સોનાને લઈને તેમનો અભિગમ સકારાત્મક બનેલો છે પરંતુ ટૂંકાગાળામાં ભાવ પર દબાણ જોવા મળી શકે છે. તેમનું માનવું છે કે, હાલમાં સોનામાં ઘટાડાનું જોખમ રહેલું છે, જ્યારે મધ્યમ ગાળામાં તે ફરીથી મજબૂત થવાની સંભાવના છે.
બેંકે જણાવ્યું કે, યુએસ ફેડરલ રિઝર્વના વ્યાજ દરોને લઈને બદલાયેલા સેન્ટિમેન્ટ્સ આ સુધારેલા અંદાજનું મુખ્ય કારણ છે. હવે Goldman Sachs ને આશા નથી કે, ફેડ વર્ષ 2026 માં વ્યાજ દરોમાં પહેલાની જેમ ઘટાડો કરશે. આના કારણે ગોલ્ડ આધારિત એક્સચેન્જ ટ્રેડેડ ફંડ્સ (ETF) માં રોકાણ પ્રવાહનો અંદાજ પણ ઘટાડવામાં આવ્યો છે.
રિપોર્ટ અનુસાર, બેંકના અર્થશાસ્ત્રીઓએ યુએસ દરોમાં ઘટાડાની સંભવિત સમયસીમાને આગળ વધારી દીધી છે. હવે તેઓ આગામી વર્ષે જૂન અને ડિસેમ્બરમાં દરોમાં ઘટાડાની અપેક્ષા રાખી રહ્યા છે, જ્યારે અગાઉ આ અંદાજ ડિસેમ્બર 2026 અને માર્ચ 2027 માટે લગાવવામાં આવ્યો હતો.
તાજેતરના મહિનાઓમાં, ઘણા પરિબળોને કારણે સોનાના ભાવ દબાણ હેઠળ આવ્યા છે. મધ્ય પૂર્વમાં ચાલી રહેલા સંઘર્ષથી ઊર્જાના ભાવોમાં વધારો થયો. આનાથી એવી આશંકા વધી કે, મોંઘવારીને નિયંત્રિત કરવા માટે કેન્દ્રીય બેંકો કડક નાણાકીય નીતિ અપનાવી શકે છે. ચાલુ સપ્તાહે જ યુએસ ફેડરલ રિઝર્વે વ્યાજ દરો સ્થિર રાખ્યા હતા પરંતુ નીતિ નિર્માતાઓએ આ વર્ષે દરોમાં વધારાની સંભાવનાના સંકેત આપ્યા છે. બીજી તરફ ફેડના નવા ચેરમેન કેવિન વાર્શે પણ મોંઘવારીને નિયંત્રિત કરવી એ પોતાની પ્રાથમિકતા ગણાવી છે.
Goldman Sachs નું કહેવું છે કે, જો ફેડરલ રિઝર્વ વ્યાજ દરોમાં વધારો કરે છે, તો આર્થિક અનિશ્ચિતતાઓ સામે રક્ષણ મેળવવાના સાધન તરીકે સોનાની માંગ નબળી પડી શકે છે. આવી સ્થિતિમાં વર્ષના અંત સુધી સોનાનો ભાવ 4,400 ડોલર પ્રતિ ઔંસ સુધી આવી શકે છે. બેંકના કેટલાક વરિષ્ઠ અધિકારીઓએ પણ મોંઘવારી ઊંચા સ્તરે રહેવાની સ્થિતિમાં વ્યાજ દરોમાં વધારાની સંભાવના વ્યક્ત કરી છે. Goldman Sachs ના વાઇસ ચેરમેન અને ડલાસ ફેડના ભૂતપૂર્વ પ્રમુખ રોબ કેપ્લને તાજેતરમાં જ જણાવ્યું હતું કે, જો મોંઘવારી ઊંચા સ્તરે જળવાઈ રહેશે તો ફેડ સપ્ટેમ્બરથી જ દરો વધારવા પર વિચાર કરી શકે છે.
આ બધા વચ્ચે Goldman Sachs નું માનવું છે કે, સોના માટે કેટલાક સકારાત્મક પરિબળો હજી પણ ઉપલબ્ધ છે. આમાં કેન્દ્રીય બેંકો તરફથી સતત કરવામાં આવી રહેલી ખરીદી મુખ્ય છે. બેંકના અંદાજ મુજબ, આ વર્ષે કેન્દ્રીય બેંકો સરેરાશ 50 ટન અને આગામી વર્ષે અંદાજે 40 ટન પ્રતિ માસ સોનાની ખરીદી કરી શકે છે.
આંતરરાષ્ટ્રીય બજારમાં સોનું હાલમાં અંદાજે 4,168 ડોલર પ્રતિ ઔંસની આસપાસ કારોબાર કરી રહ્યું છે અને તે સતત ત્રીજા સપ્તાહે ઘટાડા તરફ આગળ વધી રહ્યું છે. આ પહેલા જાન્યુઆરીના અંતમાં સોનાના ભાવ રેકોર્ડ સ્તરની નજીક 5,600 ડોલર પ્રતિ ઔંસ સુધી પહોંચી ગયા હતા પરંતુ ત્યાર પછી બજારમાં નબળાઈ જોવા મળી છે.
