Australia Scholarships : ભારતીયોની ફી માફ, 27 લાખ રૂપિયા સ્ટાઇપેન્ડ, PG-PhD માટે ઓસ્ટ્રેલીયાની ટોપ યુનિવર્સિટી વિશે જાણો
ઓસ્ટ્રેલિયાની મેલબોર્ન યુનિવર્સિટી PG અને PhD માટે “Graduate Research Scholarships” આપે છે. ભારતીય વિદ્યાર્થીઓને આ સ્કોલરશીપ હેઠળ સંપૂર્ણ ફી માફી પણ મળી રહી છે.
ઓસ્ટ્રેલિયામાં ઉચ્ચ શિક્ષણ મેળવવાનું સપનું જોતા ભારતીય વિદ્યાર્થીઓ માટે સારા સમાચાર સામે આવ્યા છે. ઓસ્ટ્રેલિયાની પ્રતિષ્ઠિત University of Melbourne દ્વારા ગ્રેજ્યુએટ રિસર્ચ સ્કોલરશીપ માટે અરજીઓ આમંત્રિત કરવામાં આવી છે. આ સ્કોલરશીપ હેઠળ વિદ્યાર્થીઓને સંપૂર્ણ ફી માફી સાથે લાખો રૂપિયાનું સ્ટાઇપેન્ડ પણ આપવામાં આવશે. ખાસ વાત એ છે કે ભારતીય વિદ્યાર્થીઓ પણ આ સ્કોલરશીપ માટે અરજી કરી શકે છે.
ઓસ્ટ્રેલિયન સરકાર વિશ્વભરના પ્રતિભાશાળી વિદ્યાર્થીઓ અને સંશોધકોને પ્રોત્સાહન આપવા માટે વિવિધ યોજનાઓ ચલાવી રહી છે. તે જ અંતર્ગત મેલબોર્ન યુનિવર્સિટી દ્વારા “Graduate Research Scholarships” જાહેર કરવામાં આવી છે. આ સ્કોલરશીપ દ્વારા વિદ્યાર્થીઓને સંશોધન આધારિત માસ્ટર્સ અથવા પીએચડી અભ્યાસક્રમોમાં પ્રવેશ મેળવવાની તક મળશે, તે પણ મોટા ભાગના ખર્ચ વિના.
QS વર્લ્ડ યુનિવર્સિટી રેન્કિંગ મુજબ, University of Melbourne ઓસ્ટ્રેલિયાની અગ્રણી યુનિવર્સિટીઓમાં સ્થાન ધરાવે છે. અહીં વિદ્યાર્થીઓને આધુનિક સંશોધન સુવિધાઓ, આંતરરાષ્ટ્રીય સ્તરની ફેકલ્ટી અને વૈશ્વિક એક્સપોઝર મળશે.
આ સ્કોલરશીપ હેઠળ કુલ 600 વિદ્યાર્થીઓને પસંદ કરવામાં આવશે. પસંદ થયેલા વિદ્યાર્થીઓને 100 ટકા ટ્યુશન ફી માફી ઉપરાંત AU$135,000 સુધીની આર્થિક સહાય આપવામાં આવશે. ભારતીય ચલણ મુજબ આ રકમ આશરે ₹92 લાખથી વધુ થાય છે.
સ્કોલરશીપ હેઠળ વિદ્યાર્થીઓને દર વર્ષે AU$39,500 જેટલું જીવનભથ્થું પણ મળશે, જે આશરે ₹27 લાખ જેટલું થાય છે. ઉપરાંત, મેલબોર્નમાં સ્થળાંતર કરવા માટે વિદ્યાર્થીઓને AU$3,000 સુધીની ગ્રાન્ટ આપવામાં આવશે. આંતરરાષ્ટ્રીય વિદ્યાર્થીઓ માટે આરોગ્ય સુરક્ષા તરીકે Overseas Student Health Cover (OSHC)ની સુવિધા પણ આપવામાં આવશે. માસ્ટર્સ દ્વારા સંશોધન કરતા વિદ્યાર્થીઓને બે વર્ષ સુધી અને પીએચડી વિદ્યાર્થીઓને ચાર વર્ષ સુધી ટ્યુશન ફી માફીનો લાભ મળશે. જ્યારે સ્ટાઇપેન્ડ પીએચડી વિદ્યાર્થીઓને લગભગ 3.5 વર્ષ સુધી આપવામાં આવશે.
આ સ્કોલરશીપ વિવિધ વિષયો માટે ઉપલબ્ધ છે. તેમાં એન્જિનિયરિંગ, માહિતી ટેકનોલોજી, કમ્પ્યુટર સાયન્સ, બિઝનેસ, અર્થશાસ્ત્ર, વિજ્ઞાન, કૃષિ, કાયદો, આરોગ્ય, શિક્ષણ, સંગીત અને દ્રશ્ય કલાઓ જેવા ક્ષેત્રોનો સમાવેશ થાય છે. સ્કોલરશીપ માટે અલગથી અરજી કરવાની જરૂર નથી. જે વિદ્યાર્થીઓ University of Melbourneમાં ગ્રેજ્યુએટ રિસર્ચ ડિગ્રી માટે અરજી કરશે અને પ્રવેશ માટે પાત્ર ગણાશે, તેમનો આપમેળે સ્કોલરશીપ માટે વિચાર કરવામાં આવશે.
પસંદગી પ્રક્રિયામાં વિદ્યાર્થીઓના શૈક્ષણિક પરિણામો, સંશોધન ક્ષમતા, કાર્ય અનુભવ અને આંતરરાષ્ટ્રીય જર્નલમાં પ્રકાશિત થયેલા સંશોધન પેપરને મહત્વ આપવામાં આવશે.આ સ્કોલરશીપ માટે અરજી કરવાની છેલ્લી તારીખ 31 ઓક્ટોબર રાખવામાં આવી છે. ઓસ્ટ્રેલિયામાં ઉચ્ચ શિક્ષણ અને સંશોધનમાં કારકિર્દી બનાવવા ઇચ્છતા વિદ્યાર્થીઓ માટે આ એક મોટી તક માનવામાં આવી રહી છે.
