Paris 2024: ઓલિમ્પિક પહેલા ભારતીય ટેનિસ સ્ટાર માટે આવ્યા સારા સમાચાર, કારકિર્દીની સર્વશ્રેષ્ઠ રેન્કિંગ હાંસલ કરી
ઓલિમ્પિક પહેલા ભારતીય ટેનિસ સ્ટાર સુમિત નાગલ માટે સારા સમાચાર સામે આવ્યા છે. સુમિત નાગલે લેટેસ્ટ ATP રેન્કિંગમાં 68મો ક્રમાંક હાંસલ કરી કારકિર્દીની સર્વશ્રેષ્ઠ રેન્કિંગ હાંસલ કરી છે. 26 વર્ષીય નાગલને ATP રેન્કિંગમાં પાંચ સ્થાનનો ફાયદો થયો છે. ઓલિમ્પિક પહેલા સુમિત નાગલની રેન્કિંગમાં મોટી છલાંગ ભારતના ઓલિમ્પિક અભિયાન માટે ખૂબ જ સારા સમાચાર છે.
સુમિત નાગલે 2024માં ત્રણ ગ્રાન્ડ સ્લેમ - ઓસ્ટ્રેલિયન ઓપન, ફ્રેન્ચ ઓપન અને વિમ્બલડનમાં મુખ્ય ડ્રો માં ક્વોલિફાય કર્યું હતું. તેણે ઓસ્ટ્રેલિયન ઓપનમાં 31મા ક્રમાંકિત એલેક્ઝાન્ડર બુબ્લિકને સીધા સેટમાં હરાવ્યો હતો. 35 વર્ષમાં ગ્રાન્ડ સ્લેમમાં ક્રમાંકિત ખેલાડીને હરાવનાર નાગલ પ્રથમ ભારતીય પુરૂષ ખેલાડી બન્યો હતો.
નાગલ રોલેન્ડ ગેરોસ અને વિમ્બલ્ડનમાં પ્રથમ રાઉન્ડમાં જ બહાર થઈ ગયો હતો. જોકે છેલ્લા પાંચ વર્ષમાં વિમ્બલ્ડન મેન્સ સિંગલ્સની મુખ્ય ડ્રો મેચ રમનાર નાગલ પ્રથમ ભારતીય ખેલાડી હતો. નાગલને વર્ષ 2024ના પહેલા છ મહિનામાં સતત સારા પ્રદર્શનનું ઈનામ મળ્યું છે અને તેણે પુરુષોની સિંગલ્સ ઈવેન્ટ માટે પેરિસ 2024 ઓલિમ્પિક્સનો ક્વોટા મેળવ્યો હતો.
સુમિત નાગલ ટોક્યો 2020 પછી તેની બીજી ઓલિમ્પિક રમતમાં ભાગ લેશે. તે ઓલિમ્પિકમાં પુરૂષ સિંગલ્સ ટેનિસમાં રમનાર લિએન્ડર પેસ બાદ માત્ર બીજો ભારતીય ખેલાડી બનશે. ઓલિમ્પિક બ્રોન્ઝ મેડલ વિજેતા લિએન્ડર પેસે 1992 અને 2000 ની વચ્ચે સતત ત્રણ વખત ઓલિમ્પિકમાં પુરુષોની સિંગલ્સ સ્પર્ધામાં ભાગ લીધો હતો.
Published On - 7:29 pm, Tue, 16 July 24
