Breaking News : આટલા વર્ષો બાદ, સચિન તેંડુલકરે BCCI વિશે કર્યો એક સનસનાટીભર્યો ખુલાસો
સચિન તેંડુલકરે BCCI સાથેના પોતાના અનુભવો પર મોટો ખુલાસો કર્યો છે. તેમણે જણાવ્યું કે તેમની કેપ્ટનશીપ દરમિયાન ટીમ પસંદગીમાં તેમને સંપૂર્ણ સ્વતંત્રતા મળતી નહોતી.
ભારતીય ક્રિકેટના મહાન બેટ્સમેન સચિન તેંડુલકરે લાંબા સમય બાદ ભારતીય ક્રિકેટ કંટ્રોલ બોર્ડ (BCCI) સાથે જોડાયેલા પોતાના અનુભવ વિશે ખુલાસો કર્યો છે. તેમના એક નિવેદનને લઈને ક્રિકેટ જગતમાં ચર્ચા શરૂ થઈ છે. સચિને પોતાની કેપ્ટનશિપના દિવસોને યાદ કરતાં જણાવ્યું કે તે સમયે તેમને ટીમની પસંદગી કરવા માટે સંપૂર્ણ સ્વતંત્રતા મળતી નહોતી. સાથે જ તેમણે આજના સમયની BCCI અને 1990ના દાયકાની BCCI વચ્ચેનો તફાવત પણ સમજાવ્યો હતો.
મંગળવારે Reddit પર યોજાયેલા 'Ask Me Anything' સેશન દરમિયાન સચિન તેંડુલકરે ચાહકોના સવાલોના જવાબ આપ્યા હતા. આ દરમિયાન તેમને પોતાની કેપ્ટનશિપના અનુભવ વિશે પણ પૂછવામાં આવ્યું હતું. તેના જવાબમાં સચિને કહ્યું કે ભારતીય ટીમનું નેતૃત્વ કરવું તેમના માટે ગર્વ અને સન્માનની વાત હતી. જોકે, તે સમયે તેમને પોતાની ટીમ પસંદ કરવાની સંપૂર્ણ છૂટ નહોતી. તેમણે વધુમાં જણાવ્યું કે આજની BCCI 1990ના દાયકાની સરખામણીએ ઘણી વધારે વ્યાવસાયિક બની છે. તે સમયગાળો ભારતીય ક્રિકેટ માટે પણ પડકારજનક રહ્યો હતો.
સચિન તેંડુલકરે પોતાની 24 વર્ષની આંતરરાષ્ટ્રીય ક્રિકેટ કારકિર્દી દરમિયાન અનેક દિગ્ગજ કેપ્ટનો સાથે ક્રિકેટ રમી છે. કૃષ્ણમાચારી શ્રીકાંતથી લઈને એમએસ ધોની સુધીના કેપ્ટનોના નેતૃત્વમાં તેમણે ભારતીય ટીમનું પ્રતિનિધિત્વ કર્યું હતું. જોકે, જ્યારે તેમને પોતાના મનપસંદ ભારતીય કેપ્ટન વિશે પૂછવામાં આવ્યું ત્યારે તેમણે સૌરવ ગાંગુલી અને એમએસ ધોનીનાં નામ લીધાં હતાં. સચિને જણાવ્યું હતું કે તેમના મનપસંદ કેપ્ટનોની યાદીમાં સૌરવ ગાંગુલી અને એમએસ ધોની સૌથી ઉપર છે. બંને કેપ્ટનોના નેતૃત્વમાં ભારતીય ક્રિકેટ ટીમે આંતરરાષ્ટ્રીય સ્તરે નોંધપાત્ર સફળતા મેળવી હતી અને ટીમને નવી ઊંચાઈઓ સુધી પહોંચાડી હતી.
સચિન તેંડુલકરે પોતાની કારકિર્દીમાં કુલ છ વનડે વર્લ્ડ કપ રમ્યા હતા. જોકે, વર્લ્ડ ચેમ્પિયન બનવાનું તેમનું સપનું સાકાર થવામાં લાંબો સમય લાગ્યો હતો. આખરે 2011માં એમએસ ધોનીની કેપ્ટનશિપ હેઠળ ભારતીય ટીમે વર્લ્ડ કપ જીત્યો અને સચિનનું વર્ષો જૂનું સપનું પૂરું થયું.
આ પહેલાં 2003ના વર્લ્ડ કપમાં સૌરવ ગાંગુલીના નેતૃત્વ હેઠળ ભારતીય ટીમ ફાઇનલ સુધી પહોંચી હતી. તે ટુર્નામેન્ટમાં સચિન તેંડુલકરે શાનદાર બેટિંગ કરતાં સૌથી વધુ રન બનાવ્યા હતા, પરંતુ ફાઇનલમાં ઓસ્ટ્રેલિયા સામે ભારતને હારનો સામનો કરવો પડ્યો હતો. પરિણામે વર્લ્ડ કપ જીતવાનું તેમનું સપનું અધૂરું રહ્યું હતું.
સચિન તેંડુલકરે માત્ર ભારતીય કેપ્ટનો જ નહીં, પરંતુ દક્ષિણ આફ્રિકાના કેપ્ટન ટેમ્બા બાવુમાની પણ પ્રશંસા કરી હતી. તેમણે બાવુમાના નેતૃત્વ અને દૃઢ નિશ્ચયને બિરદાવતાં કહ્યું કે તેમણે જવાબદારી સંભાળી અને દક્ષિણ આફ્રિકાની ટીમને શાનદાર પરિણામો અપાવવામાં મહત્વની ભૂમિકા ભજવી છે.
સચિનના મતે, દક્ષિણ આફ્રિકાની ટીમે ICC ટાઇટલ જીતવું વિશ્વ ક્રિકેટ માટે મોટી સિદ્ધિ છે. બાવુમાએ જે રીતે ટીમનું નેતૃત્વ કર્યું છે તે ખરેખર પ્રશંસનીય છે. સચિન તેંડુલકરના આ નિવેદનથી તેમની કેપ્ટનશિપના સમયગાળા અને તે સમયની ભારતીય ક્રિકેટ વ્યવસ્થાને લઈને ફરી એકવાર ચર્ચા શરૂ થઈ છે. ખાસ કરીને ટીમ પસંદગીમાં સંપૂર્ણ સ્વતંત્રતા ન હોવા અંગેની તેમની વાતે ક્રિકેટ ચાહકોનું ધ્યાન ખેંચ્યું છે.
