Rule Change: SBIના ક્રેડિટ કાર્ડનો ઉપયોગ કરનાર માટે મોટા સમાચાર, બદલાઇ જશે આ નિયમ
ભારતમાં ક્રેડિટ કાર્ડનો ઉપયોગ કરનારાની સંખ્યામાં દિવસે દિવસે વધારો થતો જઇ રહ્યો છે. અલગ અલગ બેંક તેમના ક્રેડિટ કાર્ડની ઓફર પણ આપતી હોય છે. હવે SBI કાર્ડ્સ 15 જુલાઈથી તેના ક્રેડિટ કાર્ડ વપરાશકર્તાઓ માટે ઘણા મોટા ફેરફારો કરવા જઈ રહ્યું છે. આમાં કાર્ડધારકોને આપવામાં આવતી લઘુત્તમ રકમ અને હવાઈ અકસ્માત કવર સંબંધિત ફેરફારોનો સમાવેશ થાય છે.
SBI કાર્ડ દ્વારા વેબસાઇટ પર શેર કરવામાં આવેલી માહિતી અનુસાર, 15 જુલાઈ, 2025 થી અમલમાં આવનારો મોટો ફેરફાર ક્રેડિટ કાર્ડ બિલની ન્યૂનતમ રકમ સાથે સંબંધિત છે. ફેરફારની વાત કરીએ તો હવે SBI તરફથી કુલ બાકી બિલ રકમના 2 ટકા સાથે, GST રકમના 100 ટકા, EMI બેલેન્સ, ફી, ફાઇનાન્સ ચાર્જ, ઓવરલિમિટ રકમ (જો કોઈ હોય તો) પણ MAD માં સમાવવામાં આવશે, એટલે કે વપરાશકર્તા માટે ન્યૂનતમ બાકી રકમ વધવાની છે.
ક્રેડિટ કાર્ડની ન્યૂનતમ બાકી રકમનો અર્થ એ છે કે દર મહિને તમારા બાકી બિલનો તે ભાગ હોય છે, જે તમારે ખાતરીપૂર્વક ચૂકવવો પડે છે જેથી મોડી ચુકવણીના ચાર્જ ટાળી શકાય. તે 2 થી 5 ટકા સુધીની હોય છે.
જો કે આ ફક્ત એક સુવિધા છે જેના દ્વારા ક્રેડિટ કાર્ડ વપરાશકર્તા ડિફોલ્ટ ટાળી શકે છે, પરંતુ તે ચૂકવ્યા પછી પણ બાકી ચુકવણી પર વ્યાજ વસૂલવામાં આવે છે અને તેથી MAD ચુકવણીને બદલે સમગ્ર બાકી બિલ ચૂકવવાનું ફાયદાકારક છે.
SBI ક્રેડિટ કાર્ડ સંબંધિત બીજો ફેરફાર 15 જુલાઈથી લાગુ થવા જઈ રહ્યો છે, જે ક્રેડિટ કાર્ડ વપરાશકર્તાઓની તમામ શ્રેણીઓને અસર કરશે. SBI કાર્ડ એલીટ, SBI કાર્ડ માઈલ્સ એલીટ અને SBI કાર્ડ માઈલ્સ પ્રાઇમ વપરાશકર્તાઓ માટે ઉપલબ્ધ મફત એર એક્સિડેન્ટ કવર સમાપ્ત થવા જઈ રહ્યું છે.
SBI કાર્ડ્સ કાર્ડધારકોને 1 કરોડ રૂપિયા સુધીનું મફત એર એક્સિડેન્ટ વીમા કવર પૂરું પાડતા હતા, જે હવે બંધ થવા જઈ રહ્યું છે. આ સુવિધા અન્ય SBI કાર્ડ્સ પર પણ ઉપલબ્ધ છે, જેમ કે SBI કાર્ડ પ્રાઇમ અને SBI કાર્ડ પલ્સ પર આ હવાઈ અકસ્માત કવર 50 લાખ રૂપિયા સુધીનું છે અને તે પણ બંધ થઈ જશે.
