દુનિયાની સૌથી મોટી સોનાની ઈંટ! અડધા ટનથી વધુ વજન, કિંમત ₹687 કરોડ
દુનિયાની સૌથી મોટી અને ભારે સોનાની ઈંટ બનાવીને એક દેશે નવો વિશ્વ વિક્રમ સર્જી દીધો છે. અડધા ટનથી વધુ વજન ધરાવતી આ ઈંટ 24 કેરેટના શુદ્ધ સોનામાંથી તૈયાર કરવામાં આવી છે, જેની કિંમત આશરે ₹687 કરોડ આંકવામાં આવી રહી છે. ખાસ વાત એ છે કે, 35 થી વધુની એક્સપર્ટ્સની ટીમે 1,400°C તાપમાને સોનું પીગળાવીને આ કારનામું કરી બતાવ્યું છે.
દુનિયાભરમાં દરરોજ અનોખા અને હેરાન કરી દેનારા કારનામા થતા રહે છે. કેટલાંક કારનામા તો ઈતિહાસના પાનાઓ અને 'ગિનીસ વર્લ્ડ રેકોર્ડ્સ' માં પણ નોંધાઈ જાય છે. આવો જ એક અદ્ભુત રેકોર્ડ કાંગારૂ દેશ ઓસ્ટ્રેલિયાના નામે નોંધાયો છે, જેણે દુનિયાની સૌથી મોટી અને ભારે સોનાની ઈંટ (ગોલ્ડ બાર) બનાવીને તહેલકો મચાવી દીધો છે.
વેસ્ટર્ન ઓસ્ટ્રેલિયા સ્થિત પર્થ મિન્ટ દ્વારા ઢાળવામાં આવેલી આ સોનાની ઈંટનું વજન અડધા ટનથી પણ વધુ છે. તેને સત્તાવાર રીતે દુનિયાની સૌથી વિશાળ અને બહુમૂલ્ય સોનાની ઈંટ તરીકે માન્યતા મળી છે. પર્થ મિન્ટ દ્વારા બનાવવામાં આવેલી આ વિશાળકાય ગોલ્ડ બારનું કુલ માપ અને શુદ્ધતા જોઈને દરેક કોઈ હેરાન છે. 24 કેરેટના શુદ્ધ સોનામાંથી તૈયાર કરાયેલી આ ઈંટનું કુલ વજન આશરે 521.2 કિલોગ્રામ છે.
સામાન્ય રીતે બજારમાં મળતું શુદ્ધ સોનું 99.99 ટકા (ફોર-નાઈન્સ) શુદ્ધતાનું હોય છે પરંતુ આ ખાસ ઈંટને 99.999 ટકા (ફાઈવ-નાઈન્સ) ની રેકોર્ડ શુદ્ધતા સાથે બનાવવામાં આવી છે. ભારતીય રૂપિયામાં આ અડધા ટનથી પણ ભારે સોનાની ઈંટની અનુમાનિત કિંમત આશરે 687 કરોડ રૂપિયા આંકવામાં આવી છે.
આ ખાસ સિદ્ધિ સાથે ઓસ્ટ્રેલિયાએ બે વર્ષ પહેલાં દુબઈની એક મિન્ટ દ્વારા બનાવવામાં આવેલી 300 કિલોગ્રામ સોનાની ઈંટના પાછલા વર્લ્ડ રેકોર્ડને તોડી નાખ્યો છે. પર્થ મિન્ટ પોતાની આ ઐતિહાસિક અને કલાત્મક કૃતિને "પીપલ્સ બાર" નામ આપ્યું છે. પર્થ મિન્ટના ચીફ એક્ઝિક્યુટિવ ઓફિસર (CEO) પોલ ગ્રાહમના જણાવ્યા અનુસાર, 'ફાઈવ-નાઈન્સ' એટલે કે 99.999% શુદ્ધતાનું સોનું ઢાળવું એ કોઈ સરળ કામ નથી.
આ પ્રોજેક્ટની કલ્પના એક વર્ષ પહેલાં કરવામાં આવી હતી અને મુખ્ય ઈંટને ઢાળતા પહેલાં મિન્ટના કારીગરોએ નિયમ મુજબ એક 'પ્રેક્ટિસ રન' પણ પૂરો કર્યો હતો જેથી કોઈ ભૂલ ન રહી જાય. આ વિશાળ ગોલ્ડ બારને ઢાળવો એ માત્ર સોનાને પીગળાવવાનું કામ નહોતું પરંતુ તે એન્જિનિયરિંગ અને સાયન્સની એક મોટી કસોટી હતી. તેને તૈયાર કરવામાં 35 થી પણ વધુ મેટલર્જિસ્ટ્સ, વૈજ્ઞાનિકો અને એક્સપર્ટ્સની ટીમ દિવસ-રાત લાગેલી હતી. મિન્ટની અત્યાધુનિક 'ફ્લેમલેસ કાસ્ટિંગ ચેમ્બર' ટેકનોલોજીનો ઉપયોગ કરીને સોનાને પહેલાં આશરે 1,400°C ના અત્યંત તાપમાન પર પીગળાવવામાં આવ્યું હતું.
આ પછી ખૂબ જ સાવધાની સાથે તેને એક વિશાળ બીબામાં ઢાળવામાં આવ્યું અને કલાકો સુધી એક નિયંત્રિત વાતાવરણમાં ધીમે ધીમે ઠંડુ થવા દેવાયું. ઝીણવટભર્યા આયોજન અને ઉચ્ચ ટેકનિકલ ચોકસાઈના કારણે જ આટલી મોટી માત્રામાં સોનાની ગુણવત્તા અને શુદ્ધતા જાળવી શકાઈ હતી. ઓસ્ટ્રેલિયાનો આ કારનામો હવે દુનિયાભરના જ્વેલર્સ, રોકાણકારો અને સામાન્ય લોકો વચ્ચે ઉત્સુકતાનું કેન્દ્ર બન્યો છે.
