Sabudana khichdi : ઉપવાસમાં એક વાર આ રીતે બનાવો સાબુદાણાની ખીચડી, જુઓ તસવીરો
નવરાત્રીમાં મોટાભાગના લોકો ઉપવાસ કરતા હોય છે. ત્યારે ફરાળમાં શું ખાવુ તે પ્રશ્ન થતો હોય છે. ઘણી વાર વધારે પ્રમાણમાં ફ્રાય કરેલો ખોરાક ખાવાથી તબિયત લથડી જાય છે. તો આજે આપણે જોઈ શું કે ઉપવાસમાં ખાવા લાયક સાબુદાણાની ખીચડી સરળતાથી કેવી રીતે બનાવી શકાય.
નવરાત્રી દરમિયાન ઉપવાસમાં સાબુદાણાની ખીચડી લોકોને વધુ પસંદ આવે છે. સાબુદાણાની ખીચડી બનાવવા માટે સાબુદાણા, જીરું, મરચાં, મીઠા લીમડાના પાન, બાફેલા બટાટા, શેકેલા શીંગદાણા, લીંબુ, મીઠું, ખાંડ, સૂકું નારિયેળ, તેલ સહિતની સામગ્રી લો.
સૌથી પહેલા સાબુદાણા નાના હોય તો તેને 2-3 કલાક પલાળી રાખો. પરંતુ જો તમે મોટા સાબુદાણાનો ઉપયોગ કરતા હોવ ત્યારે તેને આખી રાત પલાળવા જરુરી છે. જ્યારે સાબુદાણા પલાળો ત્યારે ધ્યાન રાખો કે વાસણમાં જેટલી સપાટી સુધી સાબુદાણા હોય તેટલી જ સપાટી સુધી પાણી રાખવુ વધારે પાણી ન પડે.
હવે એક પેનમાં તેલ લો. તેલ ગરમ થાય ત્યારે જીરું, લીલા મરચા, મીઠા લીમડાના પાન ઉમેરો. ત્યાર બાદ તેમાં બાફેલા બટાટા, સાબુદાણા ઉમેરી બરાબર મિક્સ કરો. આ બાદ ફરાળી મીઠું, હળદર ઉમેરો.
હવે શેકેલા શીંગદાણા ઉમેરી તેમાં ખાંડ, લીંબુનો રસ ઉમેરી બરાબર મિક્સ કરી દો. તેના પર નાળિયેરની છીણ ઉમેરો. હવે સાબુદાણાની ખીચડીને તમે દહીં સાથે સર્વ કરી શકો છો.
ટીપ્સ : જો સાબુદાણા પલાળતી વખતે વધારે પાણી નાખશો તો તે પકાવ્યા પછી ચીકણા બની શકે છે. જો સાબુદાણા સૂકા લાગે તો તમે ઉપરથી એક ચમચી પાણીનો છંટકાવ કરી શકો છો.