15 વર્ષ પછી PPF માં રૂપિયા જમા ન કરાવો તો શું થાય ? ઇન્વેસ્ટ કરેલ રકમ પર વ્યાજ મળશે કે નહીં ? જાણો નિયમ
પબ્લિક પ્રોવિડન્ટ ફંડ (PPF) રોકાણકારો માટે સૌથી વિશ્વસનીય બચત યોજનાઓમાંની એક છે. આ યોજનાની પાકતી મુદત 15 વર્ષ છે પરંતુ વાત એમ છે કે, જો રોકાણકાર આ સમયગાળા પછી બીજા રૂપિયા જમા કરાવવાનું બંધ કરી દે, તો પછી તે ખાતાનું શું થશે અને તેના પર વ્યાજ મળશે કે નહીં?
PPF ખાતાની ખાસ વિશેષતા એ છે કે, મેચ્યોરિટી પછી પણ રોકાણકારો પાસે ખાતું બંધ કરવાનો અને ફંડ ઉપાડવાનો વિકલ્પ હોય છે. જો કોઈ રોકાણકાર એક્સ્ટેંશન ફોર્મ ભરતો નથી અને કોઈ નવું ફંડ જમા કરતો નથી, તો ખાતું નિષ્ક્રિય એક્સ્ટેંશન (Passive Extension) મોડમાં પ્રવેશ કરે છે. આવી સ્થિતિમાં, નવી રકમ જમા ન થાય તો પણ બાકી રકમ પર વ્યાજ મળતું રહે છે.
રોકાણકારો PPF માં વાર્ષિક ઓછામાં ઓછા ₹500 અને વધુમાં વધુ ₹1.5 લાખ જમા કરાવી શકે છે. આ રોકાણ આવકવેરા કાયદાની કલમ 80C હેઠળ ટેક્સ છૂટ મળે છે. વધુમાં, મળેલ વ્યાજ પણ ટેક્સ ફ્રી હોય છે. આ જ કારણ છે કે, PPF યોજના લાંબાગાળાના રોકાણકારો અને ટેક્સ પ્લાનિંગ કરનારા લોકોમાં લોકપ્રિય છે.
પાકતી મુદત પછી રોકાણકારો ખાતાને 5 વર્ષ માટે લંબાવી શકે છે. આ સમય દરમિયાન, તેઓ નવી રકમ જમા કરાવી શકે છે અથવા તો ફક્ત જૂના બેલેન્સ પર વ્યાજ મેળવવાનું ચાલુ રાખી શકે છે.
જો રોકાણકાર એક્ટિવ રીતે એક્સ્ટેન્શન વિકલ્પ પસંદ કરે છે, તો તેને દર વર્ષે ઓછામાં ઓછા 500 રૂપિયા જમા કરાવવા ફરજીયાત રહેશે. જો કે, જો તેઓ નિષ્ક્રિય એક્સ્ટેંશન (Passive Extension) મોડ પસંદ કરે છે, તો તેઓ કોઈપણ નવી રકમ ઉમેર્યા વિના પણ વ્યાજ મેળવતા રહેશે. હાલમાં, PPF વાર્ષિક 7.1% વ્યાજ દર આપે છે.
આનો અર્થ એ થયો કે, જો કોઈ રોકાણકારના ખાતામાં 10 લાખ રૂપિયાનું બેલેન્સ હોય અને તે કોઈ નવી રકમ ઉમેરતો નથી, તો પણ તેને દર વર્ષે લગભગ 71,000 રૂપિયાનું વ્યાજ મળશે.
Published On - 9:01 pm, Fri, 21 November 25
