POMIS : રોકાણ ફક્ત 1000 રૂપિયાનું, દર મહિને નિશ્ચિત આવક આપશે પોસ્ટ ઓફિસની આ યોજના
પોસ્ટ ઓફિસ માસિક આવક યોજના (POMIS) ઓછું જોખમ ધરાવતી અને સરકારી ગેરંટીવાળી નિશ્ચિત આવક યોજના છે. વરિષ્ઠ નાગરિકો અને ગૃહિણીઓ માટે આ ઉત્તમ વિકલ્પ છે.
જો તમે ઓછા જોખમમાં નિશ્ચિત આવક મેળવવા માગતા હો, તો પોસ્ટ ઓફિસ માસિક આવક યોજના (POMIS) તમારા માટે એક ઉત્તમ વિકલ્પ બની શકે છે. આ એક સરકારી ગેરંટી ધરાવતી યોજના છે જેમાં તમે દર મહિને નક્કી રકમ જમા કરીને વ્યાજ રૂપે આવક મેળવી શકો છો. ખાસ કરીને વરિષ્ઠ નાગરિકો, પેન્શનરો અને ગૃહિણીઓ માટે આ યોજના ખૂબ જ ઉપયોગી છે, કારણ કે તે સ્થિર અને જોખમમુક્ત આવક આપે છે.
આ યોજનામાં તમે ફક્ત ₹1,000થી રોકાણ શરૂ કરી શકો છો. વ્યક્તિગત ખાતામાં મહત્તમ ₹9 લાખ સુધી અને સંયુક્ત ખાતામાં ₹15 લાખ સુધીનું રોકાણ કરી શકાય છે. હાલ આ યોજનાનો વ્યાજ દર 7.4% પ્રતિ વર્ષ છે. ઉદાહરણ તરીકે, જો કોઈ વ્યક્તિ ₹9 લાખનું રોકાણ કરે, તો તેને દર મહિને આશરે ₹5,550 મળશે, જ્યારે સંયુક્ત ખાતામાં ₹15 લાખ રોકાણ કરવાથી દર મહિને આશરે ₹9,250ની આવક મળી શકે છે.
આ યોજનાનો સમયગાળો પાંચ વર્ષનો છે. આ સમય દરમિયાન જમા રકમ ઉપાડી શકાતી નથી, પરંતુ કેટલીક ખાસ પરિસ્થિતિઓમાં આંશિક ઉપાડની મંજૂરી આપવામાં આવે છે. જો કે આ યોજના હેઠળ કર લાભ મળતો નથી, પરંતુ સરકારી ગેરંટીના કારણે તમારું મૂડીરોકાણ સંપૂર્ણપણે સુરક્ષિત રહે છે.
આ યોજના હેઠળ ખાતું ખોલવા માટે તમારે નજીકની પોસ્ટ ઓફિસમાં જઈને જરૂરી દસ્તાવેજો સાથે અરજી કરવી પડશે. તેમાં આધાર કાર્ડ, પાન કાર્ડ અને પાસપોર્ટ સાઈઝના ફોટોગ્રાફ જેવા દસ્તાવેજોની જરૂર પડે છે. સૌથી મોટી વાત એ છે કે આ યોજના હેઠળ કોઈ છુપા ચાર્જીસ કે ફી નથી.
જો તમે શેરબજારના જોખમોથી દૂર રહીને દર મહિને નિશ્ચિત આવક મેળવવા માંગો છો, તો પોસ્ટ ઓફિસ માસિક આવક યોજના (POMIS) તમારા માટે એક સંપૂર્ણ અને વિશ્વસનીય વિકલ્પ છે.
