NPS બન્યું વધુ નફાકારક, રોકાણકારો માટે ખૂલી નવી તકો, આજે જ જાણી લો
નેશનલ પેન્શન સિસ્ટમ (NPS) ના રોકાણકારો માટે PFRDA એ નિયમોમાં મોટા ફેરફારો કર્યા છે. હવે સોના-ચાંદીના ETF, નિફ્ટી 250 ઇન્ડેક્સ અને વૈકલ્પિક રોકાણ ભંડોળ (AIF) જેવી નવી સંપત્તિ શ્રેણીઓમાં રોકાણ કરી શકાશે.
ટાટા પેન્શન મેનેજમેન્ટના CEO કુરિયન જોસેફે જણાવ્યું હતું કે, નવા રોકાણ નિયમો NPS ને વધુ આધુનિક બનાવે છે. સોના-ચાંદીના ETF, AIF, REIT, InvIT અને મ્યુનિસિપલ બોન્ડ જેવા નવા એસેટ વર્ગો પોર્ટફોલિયોમાં વૈવિધ્યકરણ લાવશે, જેના કારણે જોખમ સંચાલન સાથે વળતર વધવાની સંભાવના રહેશે.
નવા નિયમો અનુસાર, NPS, UPS અને APY માટે સરકારી બોન્ડમાં મહત્તમ 65 ટકા સુધી, કોર્પોરેટ દેવામાં 45 ટકા સુધી અને ટૂંકા ગાળાના દેવામાં 10 ટકા સુધી રોકાણ કરી શકાય છે. તે ઉપરાંત, ઇક્વિટી રોકાણની મર્યાદા મહત્તમ 25 ટકા રાખવામાં આવી છે, જેમાં હવે નિફ્ટી 250 ઇન્ડેક્સ અને સેન્સેક્સ/નિફ્ટી ETFનો સમાવેશ થાય છે. વૈકલ્પિક અને અન્ય રોકાણોમાં મહત્તમ 5 ટકા સુધી રોકાણ કરવાની મંજૂરી આપવામાં આવી છે. તેમાં ગોલ્ડ અને સિલ્વર ETF (AUMના 1 ટકા સુધી), AIF કેટેગરી I અને II, REITs, InvITs અને એસેટ-બેક્ડ સિક્યોરિટીઝનો સમાવેશ થાય છે.
આ ફેરફારો પેન્શન રોકાણોમાં વૈવિધ્યકરણ વધારશે, ફુગાવા અને બજારના ઉતાર-ચઢાવ સામે વધુ સારું રક્ષણ આપશે અને લાંબા ગાળે ઉત્તમ વળતરની સંભાવના ઊભી કરશે. સ્પષ્ટ છે કે હવે NPS માત્ર સુરક્ષિત યોજના જ નથી, પરંતુ વધુ વૈવિધ્યસભર અને વળતરલક્ષી પેન્શન વિકલ્પ બની રહી છે.(નોંધ : અહીં આપવામાં આવેલી માહિતી ફક્ત આપની જાણકારી માટે છે, કોઈ પણ રોકાણ કરવામાં પહેલા નિષ્ણાતોની સલાહ લેવી જરૂરી છે.)
