Breaking News : નવસારીમાં ઈન્ડિગો હેલિકોપ્ટરનું ટેકનિકલ ખામીને કારણે ઇમરજન્સી લેન્ડિંગ, જુઓ
નવસારી જિલ્લાના મગોબ ભાઠા નજીક એક હેલિકોપ્ટરનું ટેકનિકલ ખામીને કારણે ઇમરજન્સી લેન્ડિંગ કરાયું હતું. ઉડાન દરમિયાન સમસ્યા સર્જાતા પાયલોટે સતર્કતા દાખવી.
નવસારી જિલ્લાના જલાલપોર તાલુકાના મગોબ ભાઠા ગામ નજીક આજે એક ઈન્ડિગો કંપની સાથે સંકળાયેલા હેલિકોપ્ટરનું ઇમરજન્સી લેન્ડિંગ કરવું પડ્યું હતું. ઉડાન દરમિયાન અચાનક ટેકનિકલ સમસ્યા ઉભી થતાં પાયલોટે સાવચેતીના ભાગરૂપે હેલિકોપ્ટરને ખુલ્લા મેદાનમાં સુરક્ષિત રીતે ઉતારવાનો નિર્ણય લીધો હતો.
માહિતી અનુસાર, નિરમા કંપનીના કામકાજ સાથે જોડાયેલું આ હેલિકોપ્ટર નિયમિત ઉડાન પર હતું. દરમિયાન ટેકનિકલ ખામી જણાતા પાયલોટે તાત્કાલિક પરિસ્થિતિ પર કાબૂ મેળવી નજીકના વિસ્તારને પસંદ કરી સલામત લેન્ડિંગ કર્યું હતું.
બંને પાયલોટની સતર્કતાને કારણે મોટી દુર્ઘટના ટળી હોવાનું માનવામાં આવી રહ્યું છે.
હેલિકોપ્ટર અચાનક ગામ નજીક ઉતરતાં સ્થાનિક લોકોમાં ઉત્સુકતા સાથે થોડો ભયનો માહોલ પણ સર્જાયો હતો. ઘટનાની જાણ થતાં જ મરોલી પોલીસની ટીમ સ્થળ પર પહોંચી હતી અને આસપાસ સુરક્ષા વ્યવસ્થા ગોઠવી હતી, જેથી લોકોની ભીડને નિયંત્રિત કરી શકાય.
સદનસીબે આ ઘટનામાં કોઈ જાનહાનિ કે ઇજાના સમાચાર સામે આવ્યા નથી. હાલ ટેકનિકલ નિષ્ણાતોની ટીમ હેલિકોપ્ટરમાં આવેલી ખામીનું કારણ શોધવા માટે તપાસ કરી રહી છે. પ્રાથમિક રીતે ટેકનિકલ ફોલ્ટને કારણે ઇમરજન્સી લેન્ડિંગ કરાયું હોવાનું માનવામાં આવી રહ્યું છે.
