મૅગ્નેશિયમ સપ્લિમેન્ટ્સને ટૉફીની જેમ ખાવાનો નવો ટ્રેન્ડ કેટલો જોખમી? નિષ્ણાતો પાસેથી જાણો તેના ગંભીર ગેરફાયદા
સ્ટ્રેસ દૂર કરવા અને સારી ઊંઘ માટે મૅગ્નેશિયમ સપ્લિમેન્ટ્સને રંગીન કેન્ડી કે ચોકલેટની જેમ ખાવાનો ક્રેઝ વધ્યો છે. આડેધડ સેવનથી હાઇપરમેગ્નેસીમિયા, લો બીપી અને કિડની પર શું અસર થાય છે? જાણો નિષ્ણાતનો અભિપ્રાય.
આજકાલ વિટામિન્સ અને મિનરલ્સના સપ્લિમેન્ટ્સનું નિયમિત સેવન કરવું એક ફેશન કે ટ્રેન્ડ બની ગયું છે. આજકાલ સોશિયલ મીડિયા રીલ્સ પર પણ આવો જ એક હેલ્થ ટ્રેન્ડ ખૂબ ઝડપથી વાયરલ થઈ રહ્યો છે, જેમાં લોકો મૅગ્નેશિયમ જેલી કે અન્ય સપ્લિમેન્ટ્સને રંગબેરંગી ટૉફીની જેમ ખાઈ રહ્યા છે અને તેમને તે ખાવું હેલ્ધી તેમજ કૂલ લાગે છે. અનેક રિપોર્ટ્સમાં સામે આવ્યું છે કે લોકો કોઈપણ તબીબી સલાહ વિના માત્ર સ્ટ્રેસ દૂર કરવા, રાત્રે સારી ઊંઘ મેળવવા કે સ્નાયુઓના દુખાવાથી રાહત મેળવવા માટે તેનું સેવન કરી રહ્યા છે. પરંતુ કોઈપણ વિટામિન કે મિનરલને કેન્ડીના રૂપમાં આડેધડ ખાવાથી શરીરને મોટું નુકસાન થઈ શકે છે.
નિષ્ણાતનું કહેવું છે કે, મૅગ્નેશિયમની સૌથી પહેલી અને મોટી અસર પેટ પર પડે છે. તેનું વધુ પડતું સેવન પેટમાં પાણીનું પ્રમાણ ખેંચે છે, જેના લીધે ગંભીર ઝાડા, પેટમાં તીવ્ર દુખાવો અને ગેસની સમસ્યા થઈ શકે છે.
વધુ પડતું સેવન કેટલું જોખમી? મૅગ્નેશિયમ શરીર માટે જરૂરી તત્વ છે, પરંતુ તેને ચોક્કસ મર્યાદાથી વધુ ન લેવું જોઈએ. જ્યારે તેને વધુ પડતી માત્રામાં શરીરમાં લેવામાં આવે છે, ત્યારે લોહીમાં મૅગ્નેશિયમનું સ્તર ખતરનાક રીતે વધી જાય છે, જેને મેડિકલ ભાષામાં ‘હાઇપરમેગ્નેસીમિયા’ (Hypermagnesemia) કહેવામાં આવે છે. કોઈપણ વ્યક્તિએ દિવસમાં 350 મિલીગ્રામથી વધુ મૅગ્નેશિયમ ન લેવું જોઈએ, અન્યથા તે શરીરમાં ઝેર સમાન સાબિત થઈ શકે છે.
શરીરને થતા અન્ય મોટા નુકસાન: બ્લડ પ્રેશરમાં અચાનક ઘટાડો: મૅગ્નેશિયમના ઓવરડોઝથી રક્તવાહિનીઓ અત્યંત શિથિલ (રિલેક્સ) થઈ જાય છે, જેના પરિણામે બ્લડ પ્રેશર અચાનક ઘટી જાય છે. તેનો ઓવરડોઝ હૃદયની નર્વસ સિસ્ટમ પર પણ માઠી અસર કરે છે. આ ઉપરાંત ફેફસાંના સ્નાયુઓ વધુ પડતા રિલેક્સ થવાથી શ્વાસ લેવામાં પણ તકલીફ થઈ શકે છે.
કિડની પર વધારાનું ભારણ: કિડની શરીરમાંથી વધારાના મિનરલ્સ બહાર કાઢવાનું કામ કરે છે. આવા સપ્લિમેન્ટ્સનું રોજેરોજ આડેધડ સેવન કિડની પર વધારાનો તણાવ પેદા કરે છે, જે ખાસ કરીને કિડનીની બીમારી ધરાવતા દર્દીઓ માટે અત્યંત ગંભીર સાબિત થઈ શકે છે.
દાંત અને શુગરને નુકસાન: આ ગમી કેન્ડીઝ ટૉફી જેવી લાગે તે માટે તેમાં આર્ટિફિશિયલ શુગર, ફ્લેવર્સ અને સીરપ ઉમેરવામાં આવે છે. તેનું સતત સેવન કરવાથી દાંતમાં સડો (કેવિટી) થઈ શકે છે અને વધારાની કેલરીના કારણે વજન વધવા તેમજ હાઇ બ્લડ શુગરનું જોખમ રહે છે.
જો ઊંઘ ન આવતી હોય કે થાક લાગતો હોય તો તરત જ મૅગ્નેશિયમ કેપ્સ્યુલ કે ગમીઝ ખાવાને બદલે લીલા પાંદડાવાળા શાકભાજી, બદામ, કાજુ અને તજ જેવા કુદરતી સ્ત્રોતોનો આહારમાં સમાવેશ કરવો જોઈએ. કોઈપણ સપ્લિમેન્ટ શરૂ કરતાં પહેલાં હંમેશા ડૉક્ટરની સલાહ લેવી અનિવાર્ય છે.
