LPG Booking Update : 1 મહિનામાં તમે કેટલા LPG સિલિન્ડર બુક કરી શકો છો ? ઘરે લગ્ન કે કોઈ ફંક્શન હોય તો કેટલા સિલિન્ડર મળે, જાણો નિયમ
દેશમાં LPG ગેસ પુરવઠા પર આંતરરાષ્ટ્રીય તણાવની અસર થઈ રહી છે, જેના કારણે સરકારે નવા નિયમો અમલમાં મુક્યા છે. BPCL ગ્રાહકો હવે દર મહિને લિમિટેડ સિલિન્ડર બુક કરાવી શકશે. મહત્વનું છે કે ઘરે જો કોઈ લગ્ન કે અન્ય પ્રસંગ હોય તો તેના માટે પણ ખાસ પ્રક્રિયા છે.
દેશમાં LPG ગેસની પરિસ્થિતિ ધીમે ધીમે બદલાઈ રહી છે. ખાડી દેશોમાં ચાલી રહેલા તણાવની અસર હવે ભારતના ગેસ પુરવઠા પર પણ જોવા મળી રહી છે. આ સ્થિતિને ધ્યાનમાં રાખીને સરકાર અને તેલ કંપનીઓ દરેક ઘર સુધી ગેસનો પૂરતો અને સમાન પુરવઠો સુનિશ્ચિત કરવા માટે નવા નિયમો અમલમાં મૂકી રહી છે. તેથી, જો તમે LPG ગેસ સિલિન્ડરનો ઉપયોગ કરો છો, તો આ નવા નિયમો વિશે જાણવું ખૂબ જ જરૂરી બની ગયું છે.
ભારત પેટ્રોલિયમ કોર્પોરેશન લિમિટેડ (BPCL) ના નવા નિયમો મુજબ, એક સામાન્ય ગ્રાહક દર મહિને વધુમાં વધુ બે ઘરેલુ LPG સિલિન્ડર બુક કરાવી શકે છે. જો કોઈ ગ્રાહક આ મર્યાદા કરતાં વધુ સિલિન્ડર બુક કરાવવાનો પ્રયાસ કરે, તો સિસ્ટમ તે બુકિંગને રોકી શકે છે અથવા વધારાની ચકાસણી માટે મોકલી શકે છે.
સરકાર દર નાણાકીય વર્ષ (1 એપ્રિલ થી 31 માર્ચ) દરમિયાન પ્રતિ ગ્રાહક 12 સબસિડીવાળા LPG સિલિન્ડર ઉપલબ્ધ કરાવે છે. આ ઉપરાંત, જરૂર મુજબ ગ્રાહકો સબસિડી વિના વધારાના 3 સિલિન્ડર પણ ખરીદી શકે છે. આ રીતે એક વર્ષમાં કુલ 15 સિલિન્ડર સુધી બુકિંગ કરવાની મર્યાદા નક્કી કરવામાં આવી છે.
સિલિન્ડર બુકિંગ વચ્ચેનો સમયગાળો પણ હવે વધારવામાં આવ્યો છે. પહેલા જ્યાં 21 દિવસ પછી ફરી સિલિન્ડર બુક કરાવી શકાતો હતો, ત્યાં હવે આ સમય 25 દિવસ કરવામાં આવ્યો છે. એટલે કે, ગ્રાહકોને આગામી બુકિંગ માટે થોડો વધુ સમય રાહ જોવી પડશે. ઉપરાંત, LPG સિલિન્ડર બુક કરાવવા માટે અપડેટેડ KYC કરાવવું હવે ફરજિયાત બનાવવામાં આવ્યું છે. જો KYC પૂર્ણ ન હોય, તો બુકિંગમાં મુશ્કેલી આવી શકે છે અથવા બુકિંગ નકારી શકાય છે.
BPCL દ્વારા વધારાના સિલિન્ડર માટે નવી પ્રક્રિયા પણ અમલમાં મૂકવામાં આવી છે. જો કોઈ ગ્રાહક પોતાનો 12 સિલિન્ડરનો વાર્ષિક ક્વોટા પૂર્ણ કરી ચૂક્યો હોય અને વધુ સિલિન્ડર બુક કરાવવા માંગતો હોય, તો તેને ‘Hello BPCL’ એપ્લિકેશન દ્વારા અરજી કરવી પડશે. આ એપમાં ગ્રાહકને કેટલાક પ્રશ્નોના જવાબ આપવા પડશે, જેમ કે ઘરમાં કેટલા સભ્યો છે, ઘરે કોઈ સમારંભ કે લગ્ન છે કે નહીં અને કેટલા મહેમાનો આવવાના છે. આ માહિતીના આધારે નક્કી કરવામાં આવશે કે વધારાના સિલિન્ડરની મંજૂરી આપવી કે નહીં.
આ નવા નિયમો પાછળનું મુખ્ય કારણ ગેસ પુરવઠા પર ઉભી થયેલી આંતરરાષ્ટ્રીય પરિસ્થિતિ છે. ભારત પોતાની ગેસની જરૂરિયાતનો મોટો ભાગ આયાત દ્વારા પૂર્ણ કરે છે, જેમાં ખાડી દેશોનું મહત્વપૂર્ણ યોગદાન છે. ત્યાં ચાલી રહેલા તણાવને કારણે પુરવઠા પર અસર પડી રહી છે. તેથી સરકાર ગેસનું યોગ્ય વિતરણ થાય અને દરેક સુધી સરળતાથી પહોંચે તે માટે આ પગલાં લઈ રહી છે.
