Railway Rules: મુસાફરી દરમિયાન ટ્રેન ટિકિટ ખોવાઈ ગઈ? હવે આગળ શું? રેલવેનો આ નિયમ તમને ખબર છે કે નહીં?
ભારતીય રેલવે આમ જોવા જઈએ તો યાત્રા માટેનું સાધન નથી પરંતુ લાખો લોકોના જીવનનો એક મહત્વપૂર્ણ ભાગ છે. દરરોજ, લાખો મુસાફરો કામ, અભ્યાસ, પરિવાર અથવા મુસાફરી માટે ટ્રેનનો ઉપયોગ કરે છે. એવામાં સવાલ એ છે કે, યાત્રા દરમિયાન ટિકિટ ખોવાઈ જાય તો શું કરવું?
રેલ મુસાફરી દરમિયાન જો મુસાફરની ટિકિટ ખોવાઈ જાય તો ગભરાવાની જરૂર નથી. સૌ પ્રથમ એ જાણવું મહત્વપૂર્ણ છે કે, તમારી 'ટિકિટ' કાઉન્ટર ટિકિટ છે કે ઈ-ટિકિટ? જણાવી દઈએ કે, સ્ટેશન પર રિઝર્વેશન ફોર્મ ભરીને કાઉન્ટર ટિકિટ મેળવવામાં આવે છે, જ્યારે ઈ-ટિકિટ IRCTC વેબસાઇટ અથવા મોબાઇલ એપ્લિકેશન દ્વારા બુક કરવામાં આવે છે.
જો કાઉન્ટર ટિકિટ ખોવાઈ જાય, તો મુસાફરોએ ચીફ રિઝર્વેશન સુપરવાઇઝર (CRS) ને લેખિત અરજી સબમિટ કરવી પડે છે. સ્લીપર ક્લાસ માટે ₹50 અને AC ક્લાસ માટે ₹100 ફીની જરૂર પડશે. ફી જમા કરાવ્યા પછી 'ડુપ્લિકેટ ટિકિટ' આપવામાં આવે છે, જે સંપૂર્ણપણે માન્ય ગણાય છે.
જો ટ્રેનમાં ચઢ્યા પછી ટિકિટ ખોવાઈ જાય, તો તાત્કાલિક TTE (ટિકિટ ચેકર) નો સંપર્ક કરો. PNR નંબર, સ્ક્રીનશોટ અથવા ઈ-ટિકિટ મેસેજ બતાવીને ઓળખની પુષ્ટિ કરવામાં આવે છે. પુરાવા વિના પણ TTE પ્રવાસ કાર્યક્રમ અથવા ચાર્ટના આધારે ઓળખ ચકાસી શકે છે.
ઈ-ટિકિટ હોય તો મુસાફરી દરમિયાન ID બતાવવું ફરજિયાત છે. ID ભૂલી જવાથી મુસાફરને ટિકિટ વગરનો ગણવામાં આવે છે. આવા કિસ્સામાં, મુસાફર ભાડું અને દંડ ચૂકવીને તે જ બર્થ પર મુસાફરી ચાલુ રાખી શકે છે.
મુસાફરોની સુવિધા માટે ભલામણ કરવામાં આવે છે કે, તમે હંમેશા તમારા ફોનમાં તમારી ઈ-ટિકિટનો સ્ક્રીનશોટ પાડો અને તેની પ્રિન્ટેડ કોપી પણ સાથે રાખો. તમારી કાઉન્ટર ટિકિટને સુરક્ષિત જગ્યાએ રાખો. તમારા આઈડી અને ટિકિટને એકસાથે રાખવાથી કોઈપણ મુશ્કેલી ટાળી શકાય છે.
આ રેલવે નિયમો મુસાફરીને સરળ બનાવતા નથી પરંતુ મુસાફરોને સલામત અને ટેન્શન-ફ્રી મુસાફરીની ખાતરી પણ આપે છે.
