ગુજરાતી સોશિયલ મીડિયા ઈન્ફ્લુએન્સર રિદ્ધિ સુથારનો આપઘાત, જાણો શું હતી ઘટના, જુઓ Photos
ખેડાના કણજરી ગામ નજીક એક કેનાલમાંથી જાણીતા ઇન્સ્ટાગ્રામ ઇન્ફ્લુએન્સર રિદ્ધિ સુથારનો મૃતદેહ મળી આવ્યો છે. પોલીસે આપઘાતની આશંકા વ્યક્ત કરી છે.
આપઘાતની ઘટના પહેલાં, રિદ્ધિએ પોતાની અમદાવાદ પાસિંગની હોન્ડા કાર (GJ-01-HZ-0260) કેનાલની બાજુમાં પાર્ક કરી હતી. ત્યારબાદ, તેણે નહેરમાં ઝંપલાવી દીધું. વડતાલ પોલીસે સ્થાનિક તરવૈયાઓની મદદથી મૃતદેહને બહાર કાઢ્યો અને પોસ્ટમોર્ટમ માટે મોકલી આપ્યો.
આ ઘટનાના કારણે રિદ્ધિના ફોલોઅર્સ અને પરિવારજનોમાં શોકનું મોજું છવાઈ ગયું છે. પોલીસે ઘટનાના કારણો જાણવા માટે રિદ્ધિના અંગત જીવન અને સંબંધોની તપાસ શરૂ કરી છે.
આપઘાત પાછળનું ચોક્કસ કારણ હજુ સુધી જાણી શકાયું નથી. પોલીસે મૃતકના પિતા હિરેન નંદલાલ સુથાર દ્વારા અપમૃત્યુની ફરિયાદ નોંધીને તપાસને આગળ ધપાવી છે. કણજરી બીટના જમાદારના જણાવ્યા અનુસાર, યુવતીએ કોઈ અગમ્ય કારણોસર આ પગલું ભર્યું હોવાની શક્યતા છે.
આ અણધારી ઘટનાએ સમગ્ર વિસ્તારમાં ચિંતાનો માહોલ સર્જી દીધો છે. લોકો માટે હંમેશાં પ્રેરણારૂપ બની રહેલી રિદ્ધિ સુથારનો અચાનક વિદાય સમગ્ર સમાજ માટે આઘાતજનક બની છે.
